 |
ກອງປະຊຸມດັ່ງກ່າວ ມີຜູ້ເຂົ້າຮ່ວມຈາກພາກລັດຂັ້ນແຂວງ ແລະ ຂັ້ນສູນກາງຈໍານວນ 80 ທ່ານຊຶ່ງມາຈາກສໍານັກງານນາຍົກລັດຖະມົນຕີ, ກະຊວງອຸດສາຫະກໍາ ແລະ ການຄ້າ, ກະຊວງການເງິນ, ກະຊວງກະສິກໍາ ແລະ ສິ່ງແວດລ້ອມ, ກະຊວງປ້ອງກັນປະເທດ, ຄະນະກໍາມະການສົ່ງເສີມ ແລະ ຄຸ້ມຄອງການລົງທຶນ, ຄະນະໂຄສະນາອົບຮົມສູນກາງພັກ ແລະ ອໍານາດການປົກຄອງຈາກແຂວງໄຊສົມບູນ ແລະ ແຂວງຊຽງຂວາງ.
ກອງປະຊຸມໄດ້ດຳເນີນໂດຍການເປັນປະທານ ຂອງ ທ່ານ ຈັນສະແຫວງ ບຸນຍົງ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ; ຮ່ວມເປັນປະທານໂດຍທ່ານ ທອງປະເສີດ ໄຊຍາລາດ, ຮອງປະທານຄະນະກໍາມະການປົກຄອງ ແຂວງໄຊສົມບູນ ແລະ ທ່ານ ຫົງຄໍາ ພິມມະສານ, ຮອງປະທານຄະນະກໍາມະການປົກຄອງ ແຂວງຊຽງຂວາງ.
ຄະນະຜູ້ບໍລິຫານທີ່ເປັນຕົວແທນຂອງບໍລິສັດ ແມ່ນນໍາໂດຍທ່ານ ເດວິດ ຣີດ, ຜູ້ອໍານວຍການໃຫຍ່ບໍລິສັດ ພູເບ້ຍ ມາຍນິງ, ທ່ານ ຫຼໍ ເຈິ້ນ, ຮອງຜູ້ຈັດການໃຫຍ່, ທ່ານ ນາງ ມະນີລັດ ອາຣຸນລັງສີ, ຜູ້ຈັດການອາວຸໂສຝ່າຍປະສານງານພາຍນອກ ແລະ ທ່ານ ນາງ ວັນນະລີ ພູນສະຫວັດ, ຜູ້ຈັດການພະແນກພົວພັນລັດຖະບານ.
ຕະຫຼອດໄລຍະການປະຊຸມເຄິ່ງມື້, ບໍລິສັດໄດ້ໃຫ້ຜູ້ເຂົ້າຮ່ວມຮັບຊົມວີດີໂອຄວາມຍາວ 20 ນາທີ ກ່ຽວກັບການດໍາເນີນງານລະດັບສາກົນຂອງບໍລິສັດ ແລະ ການດໍາເນີນການຂຸດຄົ້ນຢູ່ລາວ ທີ່ຊະນະເລີດລາງວັນຕ່າງໆ. ຜູ້ເຂົ້າຮ່ວມຍັງໄດ້ຮັບຟັງກ່ຽວກັບການປະກອບສ່ວນຂອງບໍລິສັດ ທາງດ້ານການເງິນ ແລະ ເສດຖະກິດໃຫ້ແກ່ແຂວງໄຊສົມບູນ ແລະ ລັດຖະບານຂັ້ນສູນກາງ, ແລະການພັດທະນາຊຸມຊົນ, ໂຄງການປັບປຸງຊີວິດການເປັນຢູ່ຂອງບໍລິສັດ ທີ່ຜ່ານການສົມທຽບມາດຕະຖານການປະເມີນລະດັບສາກົນ. ຕົວແທນຂອງບໍລິສັດ ພູເບ້ຍ ມາຍນິງ ຍັງໄດ້ນໍາສະເໜີໃຫ້ເຫັນຄວາມເປັນເລີດດ້ານການດໍາເນີນງານທີ່ເຂັ້ມແຂງ, ຄວາມປອດໄພ ແລະ ຄວາມເອົາໃຈໃສ່ດ້ານສິ່ງແວດລ້ອມ, ໂຄງການເຕີບໂຕຕ່າງໆ ແລະ ບໍ່ທີ່ວາງແຜນຂຸດຄົ້ນໄວ້ໃນຕໍ່ໜ້າຢູ່ລາວ.
ຫຼັງຈາກນັ້ນກອງປະຊຸມ ຍັງເປີດໂອກາດໃຫ້ບໍລິສັດ ພູເບ້ຍ ມາຍນິງ ແລະ ລັດຖະບານຂັ້ນແຂວງ ແລະ ຂັ້ນສູນກາງ ສາມາດປຶກສາຫາລືຫຼາຍບັນຫາທີ່ຈໍາເປັນຕ້ອງໄດ້ຮັບການແກ້ໄຂ ເພື່ອຊ່ວຍບໍລິສັດບັນລຸເປົ້າໝາຍໃນການເຕີບໂຕ ແລະ ການພັດທະນາທີ່ມຸ້ງໝັ້ນໃຫ້ຜົນປະໂຫຍດແກ່ລັດຖະບານ ແລະ ປະຊາຊົນລາວ.
ທ່ານ ເດວິດ ຣີດ, ຜູ້ອໍານວຍການໃຫຍ່ບໍລິສັດ ພູເບ້ຍ ມາຍນິງ, ໄດ້ກ່າວຢໍ້າເປົ້າໝາຍໄລຍະຍາວຂອງຜູ້ຖືຮຸ້ນຂອງບໍລິສັດ ແພນອອສ໌ ເພື່ອສືບຕໍ່ລົງທຶນ ແລະ ດໍາເນີນການຂຸດຄົ້ນຂອງພວກເຂົາຢູ່ລາວ.
ທ່ານ ເດວິດ ກ່າວວ່າ “ໃນນາມຜູ້ຖືຮຸ້ນຂອງບໍລິສັດ ແພນອອສ໌, ກວ່າງຕົງ ຣາຍຊິງ ໂຮລດິງ ກຼຸບ (GDRH), ພວກເຮົາມີຄວາມພ້ອມທີ່ຈະສະໜັບສະໜູນໂຄງການເຕີບໂຕຕ່າງໆຂອງບໍລິສັດ ພູເບ້ຍ ມາຍນິງຢູ່ລາວ ແລະ ຮ່ວມມືກັບພາກລັດໃນທຸກຂັ້ນ.
ບໍລິສັດ ແພນອອສ໌ ແລະ ບໍລິສັດ ພູເບ້ຍ ມາຍນິງ ຢໍ້າຈຸດຢືນເປົ້າໝາຍຂອງ GDRH ເພື່ອສືບຕໍ່ສົ່ງເສີມການພັດທະນາເສດຖະກິດ-ສັງຄົມ ແລະ ປະກອບສ່ວນເຂົ້າໃນຄວາມຈະເລີນຮຸ່ງເຮືອງຂອງລາວ.”
ກອງປະຊຸມຍັງຊ່ວຍໃຫ້ບໍລິສັດ ພູເບ້ຍ ມາຍນິງ ແລະ ພາກລັດໃນທຸກຂັ້ນ ສືບຕໍ່ການຮ່ວມມືອັນເຂັ້ມແຂງ ເພື່ອໂອກາດຕ່າງໃນຫຼາຍປີຕໍ່ໜ້ານີ້.”
ຄໍາເຫັນ