 |
ໃນພິທີດັ່ງກ່າວ, ທ່ານ ພົງໄຊສັກ ອິນທະລາດ ໄດ້ຕາງໜ້າໃຫ້ລັດຖະບານ ສປປ ລາວ ຍ້ອງຍໍຊົມເຊີຍ ແລະ ສະແດງຄວາມຂອບໃຈຢ່າງເລິກເຊິ່ງ ຕໍ່ລັດຖະບານສະຫະລັດ ອາເມຣິກາ ຜ່ານອົງການອາຫານໂລກ (WFP) ທີ່ໄດ້ໃຫ້ການສະໜັບສະໜູນງົບປະມານເປັນເງິນສົດ ຈຳນວນຫຼາຍກວ່າ 19 ຕື້ 260 ລ້ານກວ່າກີບ ເພື່ອນຳມາຊ່ວຍເຫຼືອປະຊາຊົນຜູ້ປະສົບໄພພິບັດນ້ຳຖ້ວມ ຢູ່ 4 ເມືອງຂອງແຂວງສະຫວັນນະເຂດ ຄື: ເມືອງສອງຄອນ, ຈຳພອນ, ໄຊບູລີ ແລະ ເມືອງຊົນນະບູລີ.
ທ່ານຮອງລັດຖະມົນຕີ ໄດ້ໃຫ້ຮູ້ເພີ່ມເຕີມວ່າ: ໃນໄລຍະເດືອນ ກໍລະກົດ ຫາ ເດືອນກັນຍາ 2026 ທີ່ຜ່ານມາ, ສປປ ລາວ ໄດ້ຮັບຜົນກະທົບຈາກໄພພິບັດທາງທໍາມະຊາດໄລຍະຜ່ານມາ ເປັນວົງກວ້າງໃນ 14 ແຂວງທົ່ວປະເທດ, ມີຜູ້ເສຍຊີວິດ 22 ຄົນ ແລະ ຄວາມເສຍຫາຍທາງດ້ານເສດຖະກິດລວມມູນຄ່າສູງເຖິງ 9.141.990.757.337 ກີບ. ເຖິງແມ່ນວ່າລັດຖະບານ ແລະ ບັນດາປະເທດເພື່ອນມິດ ພ້ອມທັງອົງການຈັດຕັ້ງສາກົນ ຈະໄດ້ໃຫ້ການຊ່ວຍເຫຼືອສຸກເສີນມາຢ່າງຕໍ່ເນື່ອງແລ້ວ, ແຕ່ຄວາມຕ້ອງການຕົວຈິງຂອງປະຊາຊົນຍັງມີສູງ; ດັ່ງນັ້ນ ການຊ່ວຍເຫຼືອເປັນເງິນສົດໃນຄັ້ງນີ້ ຈຶ່ງມີຄວາມໝາຍຄວາມສຳຄັນຢ່າງຍິ່ງ ເພື່ອຊ່ວຍໃຫ້ປະຊາຊົນສາມາດນຳໄປຟື້ນຟູຊີວິດການເປັນຢູ່ ແລະ ບັນເທົາຄວາມຫຍຸ້ງຍາກທາງດ້ານເສດຖະກິດຄອບຄົວ ໃຫ້ນັບມື້ນັບດີຂຶ້ນຕາມລຳດັບ.
 |
ທ່ານ ມາກ ອັງເດຣ ໂພຣສ ກ່າວວ່າ: ອີງຕາມຂໍ້ມູນຈາກຄະນະກໍາມະການຄຸ້ມຄອງໄພພິບັດ (DMC), ມີປະຊາຊົນ 400,000 ກວ່າຄົນ ໄດ້ຮັບຜົນກະທົບໃນ 14 ແຂວງ, ມີຜູ້ເສຍຊີວິດ 24 ຄົນ ແລະ ມູນຄ່າເສຍຫາຍທາງເສດຖະກິດຖືກປະເມີນໄວ້ 40 ລ້ານກວ່າໂດລາ ແລະ ອີງຕາມຜົນການປະເມີນດັ່ງກ່າວ, ປະຊາຊົນ 15,000 ຄົນ ໃນ 18 ບ້ານ ຈາກ 4 ເມືອງແຂວງສະຫວັນນະເຂດ ຈະໄດ້ຮັບເງິນສົດຈຳນວນ 60 ໂດລາ/ຄົນ ຊຶ່ງເປັນຈຳນວນເງິນທີ່ຄິດໄລ່ເທົ່າກັບຄວາມຕ້ອງການດ້ານສະບຽງອາຫານເປັນໄລຍະເວລາ 30 ວັນ. ນີ້ກວມເອົາປະມານ 900,000 ໂດລາ ທີ່ຈະຖືກສົ່ງມອບໂດຍກົງໃຫ້ປະຊາຊົນຜູ້ໄດ້ຮັບຜົນກະທົບ ແລະ ເຂົ້າສູ່ລະບົບເສດຖະກິດຂອງແຂວງສະຫວັນນະເຂດ.
ໂຄງການອາຫານໂລກ (WFP) ນຳເອົາຄວາມຊ່ຽວຊານທາງດ້ານວິຊາການ, ຄວາມສາມາດໃນການປະຕິບັດງານ ແລະ ຄວາມພ້ອມທີ່ມີຢູ່ ເພື່ອຊ່ວຍໃຫ້ກາຍເປັນລະບົບທີ່ເຂັ້ມແຂງຂຶ້ນ ແລະ ຊ່ວຍເຫຼືອປະຊາຊົນຜູ້ໄດ້ຮັບຜົນກະທົບຈາກໄພສຸກເສີນໄດ້ໄວຂຶ້ນ. ແຕ່ຄູ່ຮ່ວມມືທີ່ສຳຄັນທີ່ສຸດກໍຄືຕົວຊຸມຊົນເອງ. ໃນມື້ນີ້, ພວກເຮົາບໍ່ພຽງແຕ່ຮັບຮູ້ເຖິງສິ່ງທີ່ບັນດາຄອບຄົວໄດ້ສູນເສຍໄປເທົ່ານັ້ນ, ແຕ່ຍັງລວມເຖິງຄວາມເຂັ້ມແຂງ, ຄວາມຍືດຍຸ່ນ ແລະ ຄວາມມຸ່ງໝັ້ນຂອງພວກເຂົາເຈົ້າໃນການຟື້ນຕົວຄືນໃໝ່.
ໃນນາມຕາງໜ້າໃຫ້ WFP, ຂ້າພະເຈົ້າຂໍສະແດງຄວາມຂອບໃຈຢ່າງຈິງໃຈອີກຄັ້ງໜຶ່ງ ມາຍັງລັດຖະບານສະຫະລັດອາເມຣິກາ, ລັດຖະບານ ສປປ ລາວ, ອົງການປົກຄອງແຂວງສະຫວັນນະເຂດ ແລະ 4 ເມືອງ, ພ້ອມດ້ວຍທຸກໆທ່ານທີ່ມີສ່ວນຮ່ວມໃນການເຮັດໃຫ້ການຊ່ວຍເຫຼືອກູ້ໄພຄັ້ງນີ້ເກີດຜົນສໍາເລັດ ແລະ ເໜືອສິ່ງອື່ນໃດ, ສຳລັບຄອບຄົວ ແລະ ຊຸມຊົນທີ່ໄດ້ຮັບຜົນກະທົບຈາກໄພນໍ້າຖ້ວມ, WFP ຈະຄຽງຂ້າງທ່ານໃນເວລາທີ່ທ່ານກຳລັງຟື້ນຕົວ, ສ້າງສາຊີວິດການເປັນຢູ່ຄືນໃໝ່ ແລະ ມຸ່ງໜ້າໄປສູ່ອະນາຄົດ. ພວກເຮົາສາມາດຮ່ວມມືກັນ ເພື່ອຊ່ວຍຮັບປະກັນວ່າ ເວລາທີ່ໄພພິບັດຄັ້ງຕໍ່ໄປມາຮອດ, ຊຸມຊົນຈະບໍ່ພຽງແຕ່ໄດ້ຮັບການຊ່ວຍເຫຼືອເທົ່ານັ້ນ, ແຕ່ຍັງມີຄວາມພ້ອມທີ່ດີກວ່າເກົ່າ ແລະ ມີຄວາມຍືດຍຸ່ນຫຼາຍຂຶ້ນ.
ພາຍຫຼັງພິທີເປີດຢ່າງເປັນທາງການ, ທີມງານພ້ອມດ້ວຍຕາງໜ້າຄອບຄົວຜູ້ໄດ້ຮັບຜົນປະໂຫຍດ ກໍໄດ້ເລີ່ມຕົ້ນລົງມືຈັດກິດຈະກຳມອບເງິນຊ່ວຍເຫຼືອໂດຍກົງໃຫ້ແກ່ປະຊາຊົນເປົ້າໝາຍ ຢ່າງເປັນລະບຽບຮຽບຮ້ອຍ, ໂປ່ງໃສ ແລະ ຖືກຕ້ອງຕາມຄວາມເປັນຈິງໃນພື້ນທີ່.
(ຂ່າວ: ແສງຈັນ)
ຄໍາເຫັນ