 |
ງານມະຫາກໍາພືດສວນໂລກທີ່ຈັດຂຶ້ນໃນຄັ້ງນີ້ ຖືເປັນງານພືດສວນໂລກລະດັບນາໆຊາດຄັ້ງທໍາອິດ ໃນພາກຕາເວັນອອກສ່ຽງເໜືອ ທີ່ໄດ້ຮັັບການຮັບຮອງຈາກສະມາຄົມພືດສວນລະຫວ່າງປະເທດ ຫຼື AIPH ພາຍໃຕ້ແນວຄິດ “ຄວາມຫຼາກຫຼາຍທັງໝົດຂອງຊີວິດ: ສາຍສໍາພັນຂອງຄົນ, ສາຍນໍ້າ ແລະ ພືດພັນ ສູ່ການດໍາລົງຊີວິດທີ່ຍືນຍົງ”.
 |
ພາຍໃນງານມີສວນນາໆຊາດລວມ 32 ສວນ ຈາກ 17 ປະເທດ ແລະ 2 ອົງກອນນາໆຊາດ ລວມເຖິງສວນຂອງໜ່ວຍງານໄທ 16 ສວນ; ສວນຂອງປະເທດລາວ ໄດ້ຈັດ 1 ສວນ (ສວນພຶກສາສາດ) ຊຶ່ງເປັນສວນແບບກາງແຈ້ງ-ໃນຮົ່ມ ສິ່ງທີ່ນໍາໄປວາງສະແດງຂອງລາວປະກອບມີ: ຮູບພາບຈໍາລອງ ພະທາດຫຼວງວຽງຈັນ, ທົ່ງໄຫຫີນ, ປະຕູໄຊ, ແຄນລາວ, ຜະລິດຕະພັນ ເຂົ້າ, ກາເຟ, ຊາ ແລະ ຫັດຖະກໍາແພໄໝຂອງຊົນເຜົ່າໃນລາວ ແລະ ອື່ນໆ ຊຶ່ງໄດ້ສ້າງຄວາມດຶງດູດໃຈໃຫ້ແກ່ຜູ້ມາທ່ຽວຊົມພາຍໃນງານ; ສວນຈັດສະແດງພັນໄມ້ຫຼາຍກວ່າ 50 ສວນ ມີໄມ້ດອກ ໄມ້ປະດັບໝູນວຽນຫຼາຍກວ່າ 1 ລ້ານຕົ້ນ; ຈັດສະແດງນະວັດຕະກໍາກະສິກໍາ, ສິລະປະວັດທະນະທໍາທີ່ຫຼາກຫຼາຍ ແລະ ກິດຈະກໍາກວ່າ 200 ລາຍການ ຕະຫຼອດໄລຍະເວລາ 134 ວັນ (ນັບຕັ້ງແຕ່ວັນທີ 1 ພະຈິກ 2026-14 ມີນາ 2027).
 |
ນາຍົກລັດຖະມົນຕີ ແຫ່ງຣາຊະອານາຈັກໄທ ໄດ້ກ່າວວ່າ: ງານນີ້ເປັນຂົວເຊື່ອມພາກອີສານສູ່ເວທີໂລກ, ສົ່ງເສີມກະສິກໍາສີຂຽວ, ເສດຖະກິດ BCG, ຍົກລະດັບກະສິກໍາ, ການທ່ອງທ່ຽວ ແລະ ສ້າງລາຍໄດ້ໝູນວຽກງນພູມມີພາກ ຄາດວ່າຫຼາຍກວ່າ 20,000 ລ້ານບາດ. ກາຍເປັນໂອກາດໃຫ້ຊາວກະສິກອນ ແລະ ຜູ້ປະກອບການຈາກທົ່ວໂລກ ໄດ້ແລກປ່ຽນຄວາມຮູ້ ແລະ ຕໍ່ຍອດນະວັດຕະກໍາ ເພື່ອການດໍາລົງຊີວິດຢ່າງຍືນຍົງ.
ບັນຍາກາດໃນພິທີເຕັມໄປດ້ວຍການສະແດງສິລະປະວັດທະນະທໍາພື້ນບ້ານອີສານຊຶ່ງມີຄະນະລັດຖະມົນຕີ, ຄະນະທູຕານຸທູດ, ຜູ້ແທນອົງກອນລະຫວ່າງປະເທດ, ຜູ້ບໍລິຫານພາກລັດ, ພາກເອກະຊົນ ແລະ ປະຊາຊົນເຂົ້າຮ່ວມຢ່າງຟົດຟື້ນ.
(ແຫຼ່ງຂ່າວ: ກສ)
ຄໍາເຫັນ