ປະທານປະເທດໂອ້ລົມພະນັກງານຫຼັກແຫຼ່ງເມືອງຊຽງເງິນ

ວັນທີ 6 ຕຸລາ ຜ່ານມາ ທ່ານ ທອງລຸນ ສີສຸລິດ ປະທານປະເທດ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກຢູ່ເມືອງຊຽງເງິນ ແຂວງຫຼວງພະບາງ ໂດຍໄດ້ພົບປະໂອ້ລົມພະນັກງານຫຼັກແຫຼ່ງຂອງເມືອງ ຢູ່ສະໂມສອນໃຫຍ່ຂອງເມືອງ, ໂອກາດນີ້ ທ່ານ ສົມແວວເພັດ ເຈົ້າເມືອງຊຽງເງິນ ໄດ້ລາຍງານຜົນສຳເລັດ ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງຊຽງເງິນ ທ່ານກ່າວວ່າ: ໂດຍພາຍໃຕ້ການນຳພາ-ຊີ້ນຳ ຂອງອົງຄະນະພັກເມືອງ ສາມາດເຮັດໃຫ້ເສດຖະກິດຂອງເມືອງ ໄດ້ມີການເຕີບໂຕຢ່າງຕໍ່ເນື່ອງ, ໝັ້ນທ່ຽງ ແລະຖືກທິດ ສະເລ່ຍ 5,9% ຕໍ່ປີ, ລາຍຮັບໄດ້ 14 ລ້ານກວ່າກີບ ຫຼື ເທົ່າກັບ 734 ໂດລາ ຕໍ່ຄົນຕໍ່ປີ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ປະຊາຊົນບັນດາເຜົ່າຢູ່ທ່າງທຳມາຫາກິນ, ມີວຽກເຮັດງານທຳນັບມື້ນັບຫຼາຍ, ຊີວິດການເປັນຢູ່ນັບມື້ນັບມີຄວາມສະດວກສະບາຍ, ໂຄງລ່າງພື້ນຖານຫຼາຍດ້ານໄດ້ຮັບການພັດທະນາດີຂຶ້ນ, ປັດຈຸບັນມີເສັ້ນທາງເຂົ້າເຖິງແຕ່ລະບ້ານ ທຽວໄດ້ 2 ລະດູ ກວມ 71,42% ແລະ ທຽວໄດ້ລະດູດຽວ ກວມ 28,58%, ມີບ້ານທີ່ໄດ້ຊົມໃຊ້ໄຟຟ້າແຫ່ງຊາດ ທັງໝົດ 45 ບ້ານ ກວມ 91,83%, ບ້ານຊົມໃຊ້ໄຟຟ້ານອກລະບົບມີ 4 ບ້ານກວມ 8,16%, ຜ່ານການປະເມີນມາດຖານຕາມດຳລັດ 348 ປັດຈຸບັນ ຄອບຄົວທຸກຍາກ ຍັງເຫຼືອ 1.297 ຄອບຄົວ ເຫັນວ່າຫຼຸດລົງ 55 ຄອບຄົວ, ບ້ານທຸກຍາກຕາມດຳລັດ 348 ຍັງເຫຼືອ 14 ບ້ານ ເຫັນວ່າຫຼຸດລົງ 5 ບ້ານ, ມີຄອບຄົວພັດທະນາ 4.397 ຄອບຄົວ ຫຼຸດລົງ 1.128 ຄອບຄົວ, ບ້ານພັດທະນາ 11 ບ້ານ ຫຼຸດລົງ 27 ບ້ານ. ໂອກາດນີ້ ທ່ານ ທອງລຸນ ສີສຸລິດ ໄດ້ເນັ້ນໃຫ້ອົງການປົກຄອງເມືອງ ສືບຕໍ່ຊຸກຍູ້ປະຊາຊົນສຸມໃສ່ການຜະລິດໃຫ້ເປັນສິນຄ້າ ຕາມທ່າແຮງບົ່ມຊ້ອນ ເພື່ອເຮັດໃຫ້ເສດຖະກິດຂອງບ້ານ ຂອງເມືອງມີຄວາມເຂັ້ມແຂງ ຄຽງຄູ່ກັບການສຶກສາອົບຮົມລູກຫຼານ ແລະ ພະນັກງານຮຸ່ນສືບທອດ ເຂົ້າໃຈຕໍ່ແນວທາງຂອງພັກ ຫຼີກເວັ້ນການມົ້ວສຸມຢາເສບຕິດ ແລະ ການເຊື່ອຖືຂ່າວບິດເບືອນແນວທາງຂອງພັກ-ລັດ ຜ່ານສື່ສັງຄົມອ່ອນລາຍ. 
ພາຍຫຼັງສຳເລັດການໂອ້ລົມພະນັກງານຫຼັກແຫຼ່ງຂອງເມືອງຊຽງເງິນ ທ່ານ ທອງລຸນ ສີສຸລິດ ປະທານປະເທດພ້ອມດ້ວຍຄະນະ ໄດ້ເດີນທາງໄປຢ້ຽມຢາມໂຮງງານຜະລິດນ້ຳດື່ມມີນິໂຣ ຊຶ່ງຕັ້ງຢູ່ບ້ານດອນກາງ ນະຄອນ- ຫຼວງພະບາງ ຕື່ມອີກ. ແຫຼ່ງຂ່າວ: ແຂວງຫຼວງພະບາງ