ປະທານສານສູງສຸດຢ້ຽມຢາມ ແລະ ເຮັດວຽກທີ່ແຂວງໄຊຍະບູລີ

ໃນລະຫວ່າງວັນທີ 1-2 ເມສາຜ່ານມາ, ທ່ານ ນາງ ວຽງທອງ ສີພັນດອນ ເລຂາທິການສູນກາງພັກ ເລຂາຄະນະບໍລິຫານງານພັກ ປະທານສານປະຊາຊົນສູງສຸດ ພ້ອມຄະນະໄດ້ລົງຢ້ຽມຢາມ ແລະ ເຮັດວຽກທີ່ແຂວງໄຊຍະບູລີ. ໃນໂອກາດນີ້, ທ່ານປະທານສານ ພ້ອມຄະນະ ໄດ້ພົບປະໂອ້ລົມ ຊຶ່ງໄດ້ຈັດຂຶ້ນຢູ່ທີ່ສະໂມສອນຫ້ອງວ່າການແຂວງໄຊຍະບູລີ ໂດຍມີປະທານສະພາປະຊາຊົນແຂວງ, ກໍາມະການພັກແຂວງ, ຫົວໜ້າ, ຮອງຫົວໜ້າພະແນກການ, ກົມກອງ, ມີປະທານສານເຂດ ພ້ອມດ້ວຍພະນັກງານຫຼັກແຫຼ່ງພາຍໃນສານແຂວງເຂົ້າຮ່ວມ.
    ໃນພິທີ, ທ່ານ ຄໍາສິງ ສີບົວພັນ ປະທານສານປະຊາຊົນແຂວງ ໄດ້ລາຍງານການຈັດຕັ້ງປະຕິບັດວຽກງານໃນ 1 ປີຜ່ານມາວ່າ: ໃນໄລຍະໜຶ່ງປີຜ່ານມາ ສານປະຊາຊົນແຂວງໄດ້ປັບປຸງພັດທະນາແບບແຜນ ແລະ ກົນໄກການດໍາເນີນຄະດີໃຫ້ມີຄວາມວ່ອງໄວ ແລະ ຮັບປະກັນຄຸນນະພາບ ຄົ້ນຄວ້າກົນໄກສົ່ງເສີມໃຫ້ຂະແໜງການທີ່ກ່ຽວຂ້ອງກັບການດໍາເນີນຄະດີມີສ່ວນຮ່ວມໃນການປະກອບສ່ວນຂໍ້ມູນຫຼັກຖານໃຫ້ແກ່ສານ, ຕິດຕາມການດໍາເນີນຄະດີ, ໄດ້ຈັດຕັ້ງຄະນະສານເຄື່ອນທີ່ຕັດສິນຢູ່ທ້ອງຖິ່ນຮາກຖານບ່ອນທີ່ຄູ່ຄວາມອາໄສຢູ່ອັນໄດ້ເຮັດໃຫ້ການພິຈາລະນາຕັດສິນຄະດີຂອງສານໄວຂຶ້ນ. ໃນ 1 ປີ ຜ່ານມາ ສານປະຊາຊົນທົ່ວແຂວງ ມີຄະດີຄ້າງມາທັງໝົດ 44 ເລື່ອງ, ຂັ້ນຕົ້ນ 40 ເລື່ອງ, ຂັ້ນອຸທອນ 4 ເລື່ອງ ມີຄະດີເຂົ້າໃໝ່ 668 ເລື່ອງ, ຂັ້ນຕົ້ນ 659 ເລື່ອງ, ຂັ້ນອຸທອນ 9 ເລື່ອງ ລວມຄະດີທັງໝົດທົ່ວແຂວງ 712 ເລື່ອງ. ໃນນີ້, ຂັ້ນຕົ້ນ 699 ເລື່ອງ, ຂັ້ນອຸທອນ 13 ເລື່ອງ ກວມເອົາ 1,82% ຂອງຄະດີທັງໝົດ ແກ້ໄຂແລ້ວ 645 ເລື່ອງ ກວມເອົາ 90,59%; ຄະດີຄ້າງມີ 67 ເລື່ອງ ກວມເອົາ 9,41%, ຄະດີສານຕັດສິນແລ້ວຄູ່ຄວາມບໍ່ພໍໃຈມີການຂໍອຸທອນ 13 ເລື່ອງ ເທົ່າກັບ 1,86%, ຂໍລົບລ້າງ 3 ເລື່ອງ ເທົ່າກັບ 0,3% ທຽບໃສ່ປີຜ່ານມາຄະດີຫຼຸດລົງ 157 ເລື່ອງ ເທົ່າກັບ 22,05% ຄະດີແກ້ໄຂແລ້ວໃຫ້ຄູ່ຄວາມເສຍຄ່າທໍານຽມສານອາກອນໃຫ້ລັດມີມູນຄ່າ 159 ລ້ານກວ່າກີບ ຕັດສິນປັບໃໝ່ເປັນເງິນ 16 ຕື້ 863 ລ້ານກວ່າກີບ, ຮັບຊັບ ແລະ ວັດຖຸສິ່ງຂອງທີ່ພົວພັນກັບການກະທໍາຜິດຄື: ຢາບ້າ ນໍ້າໜັກ 122.882,6 ກຼາມ, ຢາຝິ່ນ 973,3 ກຼາມ ເງິນບາດ 10 ລ້ານກວ່າບາດ, ໂທລະສັບ 160 ກວ່າເຄື່ອງ, ລົດຈັກ 54 ຄັນ, ລົດໃຫຍ່ 5 ຄັນ ໃນຄະດີທີ່ເກີດຂຶ້ນຜ່ານມາຫຼາຍກວ່າໝູ່ແມ່ນຄະດີຍາດແຍງມູນມໍລະດົກ, ຄະດີຄອບຄົວສາຍຜົວເມຍຂໍຢ່າຮ້າງ, ຄະດີການຄ້າສັນຍາກູ້ຢືມ, ຄະດີເດັກ, ການລັກຊັບ. ຈາກນັ້ນ ທິມງານສານປະຊາຊົນສູງສຸດໄດ້ມີຄໍາເຫັນເຈາະຈິ້ມຊັກຖາມ ແລະ ບາງບັນຫາກໍໄດ້ມີການຊີ້ແຈ້ງເພື່ອເຮັດໃຫ້ວຽກງານສານປະຊາຊົນທົ່ວແຂວງມີຄວາມລະອຽດ ແລະ ຕັດສິນຖືກຕ້ອງວ່ອງໄວຂຶ້ນ.
 ຕ້ອນທ້າຍ ທ່ານ ນາງ ວຽງທອງ ສີພັນດອນ ໄດ້ເນັ້ນໜັກໃຫ້ຄະນະນໍາສານທຸກຂັ້ນຈົ່ງໄດ້ສຶບຕໍ່ເສີມຂະຫຍາຍສິດເປັນເຈົ້າຕັ້ງໜ້າສຶກສາອົບຮົມແນວຄິດໃຫ້ດີ ປະຕິບັດວຽກງານຂອງຕົນດ້ວຍຄວາມຮັບຜິດຊອບສູງ ເຮັດວຽກຕ້ອງເປັນໝູ່ຄະນະ ແລະ ເປັນເອກະພາບກັນ ສຶບຕໍ່ຕັ້ງໜ້າຜັນຂະຫຍາຍວຽກງານສາມສ້າງຕິດພັນກັບການດໍາເນີນຄະດີສາມຂັ້ນຂອງສານເຂົ້າສູ່ລວງເລີກ. ເອົາໃຈໃສ່ຊຸກຍູ້ກວດກາການປະຕິບັດໜ້າທີ່, ປະເມີນຜູ້ພິພາກສາ ແລະ ພະນັກງານໃຫ້ມີຄຸນນະພາບ, ບໍາລຸງສ້າງພະນັກງານໃຫ້ມີຄວາມຮູ້ ຄວາມສາມາດທາງດ້ານວິຊາສະເພາະ ແລະ ຮັບປະກັນການດໍາເນີນຄະດີໃຫ້ມີຄວາມຄົບຖ້ວນຮອບດ້ານ ແລະ ພາວະວິໃສ.  
  (ຂ່າວ+ພາບ: ບຸນທີ)