 |
ໃນພິທີ, ໄດ້ລາຍງານໂດຍຫຍໍ້ ກ່ຽວກັບຫ່ວງເງິນຜົນງານ ຫຼື ເງິນໂບນັດຂອງບ້ານ ຈຳນວນ 13 ບ້ານ ຂອງໂຄງການຄຸ້ມຄອງປ່າໄມ້ແບບພູມມີທັດ ແລະ ສົ່ງເສີມຊີວິດການເປັນຢູ່ (I-GFLL) ໂດຍໄດ້ຮັບການຊ່ວຍເຫຼືອລ້າຈາກ ກອງທຶນດິນຟ້າອາກາດສີຂຽວ (GCF), ເພື່ອການຮ່ວມມື ແລະ ການພັດທະນາດ້ານເສດຖະກິດ (BMZ) ແລະ ການປະກອບສ່ວນຂອງລັດຖະບານ ເພື່ອກວດກາ ການທໍາລາຍປ່າໄມ້ຢ່າງທັນເຫດການ (PDMS), ສະເພາະແມ່ນຈໍານວນ 13 ບ້ານ ຂອງເມືອງວຽງຄໍາ ແຂວງຫຼວງພະບາງ ໂຄງການຍັງສະເໜີໃຫ້ບັນດາບ້ານເປົ້າໝາຍ ຄວນສ້າງກົນໄກສະໜັບສະໜູນຂະບວນການປັບປຸງ ແລະ ພັດທະນາບ້ານ ຫຼີກລ້ຽງການທໍາລາຍປ່າໄມ້ ເພື່ອຕອບສະໜອງໃຫ້ມີການຫຼຸດຜ່ອນການປ່ອຍທາດອາຍເຮືອນແກ້ວ, ຊຶ່ງທາງກອງທືນປົກປັກຮັກສາສິ່ງແວດລ້ອມ ໄດ້ໂອນເງິນເຂົ້າບັນຊີຂອງບ້ານ ໃນຄັ້ງວັນທີ 10 ທັນວາ 2025 ໃນນີ້: ບ້ານນາແວນ ໄດ້ຮັບ 270 ລ້ານກວ່າກີບ, ບ້ານຫ້ວຍພຽງ 282 ລ້ານກວ່າກີບ, ບ້ານຫາດຫ່ຽນ 244 ລ້ານກວ່າກີບ, ບ້ານປ່າໄຜ່ 226 ລ້ານກວ່າກີບ, ບ້ານນໍ້າລາວ 231 ລ້ານກວ່າກີບ, ບ້ານນານ້ອຍ 308 ລ້ານກວ່າກີບ, ບ້ານນາກາງ 258 ລ້ານກວ່າກີບ, ບ້ານສົບຊາງ 268 ລ້ານກວ່າກີບ, ບ້ານວັງບົງ 241 ລ້ານກວ່າກີບ, ບ້ານຫາດເລົາ 244 ລ້ານກວ່າກີບ, ບ້ານໃໝ່ 237 ລ້ານກວ່າກີບ, ບ້ານດອນຄູນ 225 ລ້ານກວ່າກີບ ແລະ ບ້ານຈ້ອງໃຕ້ 230 ລ້ານກວ່າກີບ ລວມມູນຄ່າທັງໝົດ 3 ຕື້ 270 ລ້ານກວ່າກີບ.
 |
ຕອນທ້າຍປະທານພິທີ ໄດ້ໂອ້ລົມ ເພື່ອເປັນແນວທາງ ໃນການຈັດຕັ້ງປະຕິບັດໃນຕໍ່ໜ້າ ຊຶ່ງທ່ານໄດ້ສະເໜີໃຫ້ ອົງການປົກຄອງບ້ານ ເປັນເຈົ້າການຕິດຕາມ ຊຸກຍູ້ ການຈັດຕັ້ງປະຕິບັດ ການນໍາໃຊ້ເງິນ ໂດຍຖືເປັນໜ້າທີ່ການເມືອງໜຶ່ງ ຄືກັບວຽກງານອື່ນ; ມອບໃຫ້ ຄະນະປະສານງານໂຄງການຂັ້ນແຂວງ, ຂັ້ນເມືອງ ເອົາໃຈໃສ່ ສືບຕໍ່ ຊຸກຍູ້ ຕິດຕາມ ການນໍາໃຊ້ເງິນຂອງບັນດາບ້ານ ທີ່ໄດ້ມອບໄປນັ້ນ ໃຫ້ມີຄວາມຍືນຍົງ ແລະ ເກີດດອກອອກຜົນ ສາມາດເປັນແບບຢ່າງໃຫ້ກັບ ບ້ານອື່ນ ໃນຕໍ່ໜ້າ.
(ຂ່າວ: ບຸນມີ ໄຊຍະກຸມມານ)
ຄໍາເຫັນ