 |
ທ່ານ ຕຸ້ຍແກ້ວ ໄຊຍະສານ ໃຫ້ສຳພາດວ່າ: ໂຄງການກູດເນເບີສ໌ລາວ ໄດ້ຮັບການຊ່ວຍເຫຼືອຈາກປະເທດສາທາລະນະລັດເກົາຫຼີ ເລີ່ມຈັດຕັ້ງປະຕິບັດວຽກງານ ຢູ່ເມືອງປາກອູແຕ່ປີ 2022 ໂດຍສ້າງຄວາມເຂັ້ມແຂງໃຫ້ແມ່ຍິງ ແລະ ເດັກນ້ອຍ ດ້ານໂພສະນາການ, ວຽກງານສຸຂະນາໄມ, ໃຫ້ທືນກໍ່ສ້າງນໍ້າລິນ, ປັບປຸງສຸກສາລາ ຕິດພັນກັບການຮັກສາສິ່ງແວດລ້ອມ ແລະ ອື່ນໆ. ສຳລັບການແຈກຢາຍ ຢາທຳລາຍໜອນນໍ້າ ແລະ ພົ່ນຢາຂ້າຍຸງລາຍ ໃຫ້ປະຊາຊົນໃນຄັ້ງນີ້, ໄດ້ກຳນົດເອົາ 13 ບ້ານເປົ້າໝາຍ ຄື: ຫາດຍາ, ຫ້ວຍມາດ, ລາດກອກ, ຫາດຊວາ, ບ້ານຝາຍ, ຄົກແສງສຸລິຍາ, ຊ່າງໄຫ, ຫາດປາງ, ຫ້ວຍຄໍ້, ຫາດຄໍ້, ປາກອູ, ຫ້ວຍໂລ ແລະ ບ້ານຫາດຂາມ. ເພື່ອເປັນການທຳລາຍແຫຼ່ງເພາະພັນ ຂອງໜອນນໍ້າຍຸງລາຍທີ່ມັກເກີດຂຶ້ນໃນລະດູຝົນ, ທັງສ້າງຄວາມເຂັ້ມແຂງໃຫ້ແກ່ການຮັກສາສຸຂະພາບແມ່ ແລະ ເດັກ, ປັບປຸງໂພສະນາການ ແລະ ສຸຂະນາໄມ ທີ່ຖືກຕ້ອງໃຫ້ປະຊາຊົນ.
 |
ທ່ານ ນາງ ບົວວຽງ ແພດປະຈຳບ້ານ (ອສບ) ບ້ານຫາດຍາ ໄດ້ຕາງໜ້າປະຊາຊົນ ສະແດງຄວາມຂອບໃຈ ນໍາໂຄງການທີ່ໄດ້ໃຫ້ການຊ່ວຍເຫຼືອ ເປັນຕົ້ນ ໄດ້ເຜີຍແຜ່ຂໍ້ມູນຂ່າວສານກ່ຽວກັບວິທີການປ້ອງກັນ ການແຜ່ລະບາດຂອງພະຍາດໄຂ້ຍຸງລາຍ, ຝຶກອົບຮົມກ່ຽວກັບການປ້ອງກັນ ແລະ ການຕອບໂຕ້ ການແຜ່ລະບາດຂອງພະຍາດໄຂ້ຍຸງລາຍ ໂດຍເນັ້ນໃຫ້ມີການຮັກສາສິ່ງແວດລ້ອມ ແລະ ທຳລາຍແຫຼ່ງເພາະພັນຂອງຍຸງລາຍ ເຊັ່ນ: ຖາງຫຍ້າອ້ອມເຮືອນ, ຖອກນໍ້າໃນພາຊະນະ ທີ່ບໍ່ໄດ້ໃຊ້ຖິ້ມ ເປັນຕົ້ນ ກະໂປະ, ກະປ໋ອງ, ອຸ່ງນໍ້າ, ຢາງຕີນລົດເກົ່າ ແລະ ອື່ນໆ.
 |
ໂອກາດດຽວກັນ ໂຄງການໄດ້ແຈກຢາຍມຸ້ງຍອມຢາ, ອຸປະກອນການແພດ, ຢາປົວພະຍາດໃຫ້ໂຮງໝໍເມືອງ, ສຸກສາລາ ແລະ ປະຊາຊົນທີ່ເຈັບເປັນໂດຍບໍ່ໄດ້ເສຍຄາຕື່ມອີກ.
(ຂ່າວ: ດາວອນ ມະນີວັນ, ພາບ: ທະນູສີນ ອິດທິພົນ)
ຄໍາເຫັນ