ໃນອາທິດຜ່ານມານີ້ ຢູ່ທີສະໂມສອນຂອງເມືອງ, ອົງການໃຈບຸນສາກົນປະຈໍາ ສປປ ລາວໄດ້ມອບເຂົ້າສານໜຽວໃຫ້ແກ່ຄອບຄົວທີໄດ້ຮັບຜົນກະທົບໃນການຜະລິດເຂົ້ານາປີ 2024 ຈາກໄພພິບັດທໍາມະຊາດ (ພາຍຸຢາກິ) ໃນຕົ້ນເດືອນກັນຍາ 2024 ຜານມາ ຢູ່ເມືອງວຽງພູຄາ ແຂວງຫຼວງນໍ້າທາ.ໂດຍການເຂົ້າຮ່ວມຂອງທ່ານ ນາງ ເຮືອ ສົມຫວັງ ຮອງເຈົ້າເມືອງວຽງພູຄາ ປະທານຄະນະກໍາມະການຄຸ້ມຄອງໄພພິບັດຂັ້ນເມືອງ, ທ່ານ ຈອນ ຟຣາຍເອີ້ ຫົວໜ້າແຜນງານໂຄງການ ອົງການໃຈບຸນສາກົນປະຈໍາ ສປປ ລາວ (DIC) ພ້ອມດ້ວຍທິມງານ, ມີພາກສ່ວນກ່ຽວຂ້ອງຈາກສູນກາງ ແລະ ທ້ອງຖິ່ນ, ຕະຫຼອດຮອດຄອບຄົວເປົ້າໝາຍເຂົ້າຮ່ວມ.
ໃນພິທີ, ປະທານຄະນະກໍາມະການຄຸ້ມຄອງໄພພິບັດຂັ້ນເມືອງ ກໍໄດ້ລາຍງານຜົນກະທົບຈາກໄພພິບັດນໍ້າຖ້ວມຜົນຜະລິດຢູ່ເມືອງວຽງພູຄາວ່າ: ຜ່ານມາທາງການນໍາເມືອງກໍໄດ້ລົງເກັບກໍາຂໍ້ມູນທີຖືກຜົນກະທົບ ໂດຍສະເພາະແມ່ນນໍ້າຖ້ວມຜົນຜະລິດເຂົ້ານາປີ, ດິນເຊາະເຈື່ອນເນື້ອທີນາ, ເນື້ອທີສວນ, ດິນເຊາະເຈື່ອນຖົມເຮືອນປະຊາຊົນຈໍານວນໜຶ່ງ. ການຊ່ວຍເຫຼືອເຂົ້າໃຫ້ແກ່ປະຊາຊົນເມືອງວຽງພູຄາຄັ້ງນີ້, ແມ່ນໄດ້ຜ່ານການສະເໜີຂອງສູນກາງແນວລາວສ້າງຊາດ ຕໍ່ກັບອົງການໃຈບຸນສາກົນປະຈໍາ ສປປ ລາວ (DIC) ຊຶ່ງໄດ້ຮັບການຊ່ວຍເຫຼືອເປັນເຂົ້າສານໜຽວຈໍານວນ 8 ໂຕນ ກັບ 16 ກິໂລ ລວມມູນຄ່າ 160,320,000 ກີບ, ອົງການແນວລາວສ້າງຊາດແຂວງມອບເຂົ້າສານໜຽວຈໍານວນ 500 ກິໂລ ເປັນເງິນ 10,000,000 ກີບ, ລວມມູນຄ່າທັງໝົດ 170,320,000 ກີບ. ໃນໂອກາດດັ່ງກ່າວ. ທ່ານ ຈອນ ຟຣາຍເອີ້ ໄດ້ກ່າວມອບເຂົ້າສານໜຽວໃຫ້ເມືອງ ແລະ ທາງເມືອງກໍໄດ້ມອບຕໍ່ໃຫ້ຫ້ອງການແນວລາວສ້າງຊາດເມືອງເພື່ອມອບຕໍ່ໃຫ້ຄອບຄົວເປົ້າໝາຍ ຈໍານວນ 797 ຄອບຄົວ, ຄອບຄົວໜຶ່ງຈະໄດ້ຮັບເຂົ້າສານ ຈໍານວນ 12 ກິໂລ.
(ຂ່າວ: ຄໍາປິງ)
ຄໍາເຫັນ