ເປີດບໍລິສັດສາຍສົ່ງໄຟຟ້າແຫ່ງຊາດລາວທີ່ເປັນບໍລິສັດຮ່ວມທຶນລະຫວ່າງລາວ-ຈີນ

ພິທີເປີດການດຳເນີນທຸລະກິດຂອງບໍລິສັດ ສາຍສົ່ງໄຟຟ້າແຫ່ງຊາດລາວ ຈຳກັດ(EDL-T)ໂດຍການຮ່ວມທຶນລະຫວ່າງລາວ-ຈີນຈັດຂຶ້ນໃນທ້າຍເດືອນມັງກອນຜ່ານມາ ທີ່ນະຄອນຫຼວງວຽງຈັນ, ໂດຍມີທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະ ບໍ່ແຮ່,ທ່ານຫວາງຊ້າງອຸປະທູດຊົ່ວຄາວ ສປ ຈີນ ປະຈຳ ສປປ ລາວ,ທ່ານ ເມິ້ງເຈິ້ນຜີງ ປະທານບໍລິສັດຕາຂ່າຍໄຟຟ້າພາກໃຕ້ຈີນ ຈຳກັດ,ທ່ານ ຈັນທະບູນ ສຸກອາລຸນ ຜູ້ອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມດ້ວຍແຂກຖືກເຊີນເຂົ້າຮ່ວມ
ໃນພິທີ, ທ່ານ ໂພໄຊ ໄຊຍະສອນກ່າວວ່າ: ໂຄງການ EDL-T ເປັນໂຄງການຮ່ວມມືທີ່ສຳຄັນໃນຂົງເຂດພະລັງງານໄຟຟ້າລະຫວ່າງລາວ-ຈີນ, ເຊື່ອວ່າຫຼັງຈາກບໍລິສັດໄດ້ເປີດການດຳເນີນທຸລະກິດຢ່າງເປັນທາງການ, ຜ່ານການຮ່ວມມືຢ່າງເຂັ້ມແຂງລະຫວ່າງບໍລິສັດໄຟຟ້າສອງປະເທດລາວ-ຈີນ ຈະຊຸກຍູ້ໃຫ້ລະບົບໄຟຟ້າແຫ່ງຊາດລາວມີຄວາມໝັ້ນຄົງ ແລະ ມີຄວາມສະຖຽນລະພາບດີຂຶ້ນຍົກສູງຄວາມສາມາດການແຂ່ງຂັນດ້ານພະລັງງານໄຟຟ້າ
ໃນພາກພື້ນ, ສົ່ງເສີມການພັດທະນາຂະແໜງການອື່ນໆ ທີ່ປິ່ນອ້ອມ ແລະເສີມຂະຫຍາຍບົດບາດອັນສໍາຄັນສຳລັບການພັດທະນາເສດຖະກິດແຫ່ງຊາດລາວ.
ທ່ານ ຫວາງຊ້າງ ກ່າວວ່າ:ໂຄງການ EDL-T ເປັນຜົນສຳເລັດອັນໃຫຍ່ຫຼວງ ໃນຂົງເຂດເຊື່ອມໂຍງເຊື່ອມຕໍ່ກັນ ລະຫວ່າງລາວ-ຈີນ, ການເຂົ້າສູ່ການດຳເນີນງານຢ່າງເປັນທາງການຂອງໂຄງການ EDL-Tຈະລົງເລິກ ການຮ່ວມມືດ້ານພະລັງງານໄຟຟ້າລະຫວ່າງສອງປະເທດຢ່າງມີປະສິດທິຜົນ. ບໍລິສັດຕາຂ່າຍໄຟຟ້າພາກໃຕ້ຈີນ ຈຳກັດ ຕ້ອງຢຶດໝັ້ນຫຼັກການຮ່ວມມືການກໍ່ສ້າງ, ການແບ່ງປັນ ແລະ ຕ່າງຝ່າຍຕ່າງມີຜົນປະໂຫຍດ ແລະແບ່ງປັນປະສົບການດ້ານການກໍ່ສ້າງ ການບໍລິຫານແລະການດໍາເນີນທຸລະກິດລະບົບໄຟຟ້າກັບຝ່າຍລາວ,ອໍານວຍບໍລິການສາຍສົ່ງໄຟຟ້າທີ່ມີຄຸນນະພາບສູງ ແລະມີປະສິດທິຜົນໃຫ້ການພັດທະນາຂອງປະເທດລາວ ແລະຊ່ວຍໃຫ້ປະເທດລາວຫັນຄວາມໄດ້ປຽບດ້ານຊັບພະຍາກອນໃຫ້ເປັນຄວາມໄດ້ປຽບດ້ານການພັດທະນາເສດຖະກິດ.
ທ່ານ ເມິ້ງເຈິ້ນຜີງ ກ່າວວ່າ: ໂຄງການ EDL-T ໄດ້ກ້າວເຂົ້າສູ່ການດຳເນີນທຸລະກິດຢ່າງເປັນທາງການ, ເປັນຂີດໝາຍບາດກ້າວໃໝ່ແຫ່ງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ ໃນຂົງເຂດພະລັງງານໄຟຟ້າ ລະຫວ່າງ ຈີນ-ລາວ.ບໍລິສັດຕາຂ່າຍໄຟຟ້າພາກໃຕ້ຈີນ ຈຳກັດ ຈະແບ່ງປັນປະສົບການດ້ານເຕັກນິກແລະການບໍລິຫານຢ່າງຕັ້ງໜ້າ ແລະ ສ້າງ EDL-T ໃຫ້ເປັນຕົວແບບໃນການປະຕິບັດແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ ເພີ່ມທະວີການຮ່ວມມືດ້ານພະລັງງານໄຟຟ້າກັບສາກົນ, ໄດ້ຮັັບຜົນປະໂຫຍດທີ່ຕ່າງຝ່າຍຕ່າງມີຜົນປະໂຫຍດ ແລະປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງປະເທດລາວແລະ ການປັບປຸງຊີວິດການເປັນຢູ່ຂອງປະຊາຊົນລາວ.
ທ່ານ ຈັນທະບູນ ສຸກອາລຸນກ່າວວ່າ: ການສ້າງຕັ້ງEDL-T ເປັນບາດກ້າວທີ່ສຳຄັນໃນການປະຕິຮູບຂະແໜງພະລັງງານໄຟຟ້າຂອງລາວ ແລະສາມາດເປັນໂອກາດທີ່ຈະນໍາພາຂະແໜງພະລັງງານໄຟຟ້າ ໄປສູ່ການພັດທະນາລະບົບສາຍສົ່ງໄຟຟ້າທີ່ເຊື່ອມຈອດກັນໃນຂອບເຂດທົ່ວປະເທດຢ່າງມີຄວາມໝັ້ນຄົງ ແລະ ເພີ່ມທະວີການເຊື່ອມໂຍງກັບປະເທດເພື່ອນບ້ານຫຼາຍຂຶ້ນ. ໂດຍສະເພາະແມ່ນການເຊື່ອມໂຍງລະບົບສາຍສົ່ງ500ກິໂລໂວນ(ກວ)ກັບພາກໃຕ້ຂອງຈີນ ແມ່ນສາມາດເຂົ້າມາຊ່ວຍສ້າງຄວາມສະຖຽນລະພາບໃຫ້ແກ່ລະບົບໄຟຟ້າຂອງລາວ ກໍຄືການນໍາໃຊ້ແຫຼ່ງຊັບພະຍາກອນທໍາມະຊາດ ແລະ ທ່າແຮງແບບປະສົມປະສານ ເກື້ອໜູນຊຶ່ງກັນ ແລະ ກັນ ເພື່ອໃຫ້ເກີດປະສິດທິພາບສູງສຸດແກ່ທຸກໆຝ່າຍ. 
ບໍລິສັດ EDL-T ແມ່ນບໍລິສັດຮ່ວມທຶນ ລະຫວ່າງ ບໍລິສັດ ຕາຂ່າຍໄຟຟ້າພາກໃຕ້ຈີນ ຈຳກັດ ກັບ ລັດວິສາຫະກິດໄຟຟ້າລາວ. ພາຍໃຕ້ການ ຄຸ້ມຄອງ ແລະ ຕິດຕາມກວດກາຂອງລັດຖະບານລາວ, ບໍລິສັດ EDL-T ເປັນຜູ້ສະໜອງບໍລິການສົ່ງໄຟ, ຈະຮັບຜິດຊອບການລົງທຶນ, ກໍ່ສ້າງ ແລະ ດຳເນີນງານລະບົບໄຟຟ້າ ທີ່ມີແຮງດັນ 230 ກວ ແລະ ຂຶ້ນໄປ ຂອງລາວ ແລະ ໂຄງການເຊື່ອມໂຍງເຊື່ອມຕໍ່ຂ້າມຊາຍແດນກັບປະເທດອ້ອມຂ້າງ ເພື່ອອຳນວຍບໍລິການການສົ່ງໄຟຟ້າທີ່ມີຄວາມໝັ້ນຄົງ ແລະ ຍືນຍົງໄດ້ໃນທົ່ວປະເທດ.
 (ຂ່າວ-ພາບ: ແສງຈັນ)