 |
ພາຍໃຕ້ລະຫັດ "ຂະບວນລົດໄຟສັນຕິພາບ-2026" ແລະ ສະຫາຍ ພັນເອກ ອຸຕ່ານ ຫົວໜ້າກົມເສນາຮັກ ກົມຮັບປະກັນພະລາທິການ ຄະນະກຳມະການທະຫານສູນກາງ ກອງທັບປົດປ່ອຍປະຊາຊົນຈີນ, ມີສະຫາຍ ພົນຈັດຕະວາ ຄໍາແພງ ພູມມາແກ້ວ ຫົວໜ້າກົມເສນາຮັກ ກົມໃຫຍ່ພະລາທິການກອງທັບ, ຄະນະຊີ້ນໍາການຝຶກຊ້ອມຮ່ວມສອງກອງທັບ ລາວ-ຈີນ, ສະຫາຍ ພັນເອກ ຫຼີປິງ ທີ່ປຶກສາທູດປ້ອງກັນຊາດແຫ່ງ ສປ ຈີນ ປະຈໍາ ສປປ ລາວ, ສະຫາຍ ພັນເອກ ຊົ່ງ ໄສຜິງ ຮອງອໍານວຍການໂຮງໝໍເລກ 2 ມະຫາວິທະຍາໄລການແພດກອງທັບບົກ ຫົວໜ້າຄະນະທີມແພດກອງທັບປົດປ່ອຍປະຊາຊົນຈີນ ພ້ອມດ້ວຍອະນຸກຳມະການ, ນັກຫັດແອບຈາກສອງກອງທັບ ລາວ-ຈີນ ແລະ ແຂກຖືກເຊີນເຂົ້າຮ່ວມ.
ໃນພິທີ, ຄະນະຊີ້ນໍາທັງສອງຝ່າຍໄດ້ລາຍງານຈຸດປະສົງ ແລະ ແຜນການຝຶກຊ້ອມ ໂດຍສະຫາຍ ພົນຈັດຕະວາ ຄໍາແພງ ພູມມາແກ້ວ ໄດ້ລາຍງານວ່າ: ຂະບວນລົດໄຟສັນຕິພາບ ລາວ-ຈີນ ໄດ້ເລີ່ມຈັດຕັ້ງປະຕິບັດມາແຕ່ປີ 2017, ຄັ້ງນີ້ເປັນຄັ້ງທີ 6 ແລະ ເປັນຄັ້ງທີ 3 ທີ່ນໍາໃຊ້ຂະບວນລົດໄຟຕົວຈິງເຂົ້າໃນການຝຶກຊ້ອມ, ພິເສດ ການຝຶກຊ້ອມຮ່ວມຂະບວນລົດໄຟສັນຕິພາບ-2026 ນີ້ ຈະໄດ້ນໍາໃຊ້ອຸປະກອນອັດສະລິຍະທີ່ບໍ່ມີຄົນຂັບ ເພື່ອຊອກຄົ້ນ ແລະ ຂົນສົ່ງຄົນເຈັບ ເພື່ອສະຫຼອງວັນສ້າງຕັ້ງສາຍພົວພັນຮ່ວມມືທາງດ້ານການທູດ ລະຫວ່າງສອງຊາດລາວ-ຈີນ ຄົບຮອບ 65 ປີ ແລະ ຄົບຮອບ 5 ປີຂອງການເປີດນໍາໃຊ້ບໍລິການໂຄງການທາງລົດໄຟ ລາວ-ຈີນ.
 |
ສຳລັບການກະກຽມຝຶກຊ້ອມໃນໄລຍະ 2 ເດືອນຜ່ານມາ, ຄະນະຮັບຜິດຊອບໄດ້ມີການປະສານງານເປີດກອງປະຊຸມຮ່ວມຄົ້ນຄວ້າປຶກຫາລື ເອກະພາບທາງດ້ານເນື້ອໃນ ແລະ ແຜນການຝຶກຊ້ອມເປັນແຕ່ລະໄລຍະ. ມາຮອດປັດຈຸບັນໄດ້ມີຄວາມພ້ອມ 100% ເປັນຕົ້ນແມ່ນເນື້ອໃນການຫັດແອບ, ອຸປະກອນການແພດ, ພາຫະນະຮັບໃຊ້, ການສ້າງສະໜາມຫັດແອບ, ໂຮງໝໍສະໜາມ, ວຽກງານຮັບປະກັນທາງດ້ານພະລາທິການ ແລະ ວຽກງານຮັບປະກັນດ້ານຕ່າງໆ. ຂະບວນການຝຶກຊ້ອມຈະນໍາໃຊ້ກໍາລັງພົນເຂົ້າຮ່ວມທັງໝົດ 710 ສະຫາຍ, ມີກໍາລັງຝ່າຍລາວ 560 ສະຫາຍ (ໃນນີ້ມີນັກຝຶກຊ້ອມ 263 ສະຫາຍ) ແລະ ກຳລັງເພື່ອນຈາກສປ ຈີນເຂົ້າຮ່ວມ 150 ສະຫາຍ; ດ້ານເນື້ອໃນຝຶກຊ້ອມຈະໄດ້ຈໍາລອງເຫດການໄພພິບັດທີ່ເກີດຈາກໄພທໍາມະຊາດມີຝົນຕົກໜັກ, ເກີດພາຍຸລົມແຮງແບບກະທັນ ຫັນ, ມີກໍລະນີຖືກຜົນກະທົບເປັນຈໍານວນຫຼາຍ ໃນນັ້ນ, ມີຜູ້ຄົນຂາດທີ່ຢູ່ອາໄສ, ຖືກບາດເຈັບແຂນ, ຂາຫັກ, ກະທົບຫົວ, ກະທົບເອິກ, ກະທົບທ້ອງ, ຊຸດໂຊມລະບົບຫາຍໃຈ. ຂະບວນລົດໄຟສັນຕິພາບ ນອກຈາກຈະສ້າງຄວາມເຂັ້ມ ແຂງໃຫ້ເຫຼົ່າຮົບເສນາຮັກແລ້ວ ຍັງເປັນການເພີ່ມຂີດຄວາມສາມາດຂອງແພດໝໍໃຫ້ມີຄວາມຊໍານານງານ ແລະ ຍັງເປັນການຮັດແໜ້ນສາຍພົວພັນຄວາມສາມັກຄີ-ມິດຕະພາບລະຫວ່າງ ສອງຊາດ, ສອງກອງທັບ, ສອງເຫຼົ່າຮົບເສນາຮັກ ລາວ-ຈີນ, ຈີນ-ລາວໃຫ້ແໜ້ນແຟ້ນຂຶ້ນຕື່ມອີກ.
ໂອກາດນີ້, ສະຫາຍ ພົນຕີ ຈັນດີ ສຸລິວົງສັກ ກ່າວວ່າ: ການຮ່ວມມືຊ່ວຍເຫຼືອລະຫວ່າງ ສອງກອງທັບ ລາວ-ຈີນ ເວົ້າລວມ, ເວົ້າສະເພາະ ແມ່ນການຮ່ວມມືລະຫວ່າງສອງເຫຼົ່າຮົບເສນາຮັກ ມີຄວາມເຕີບໃຫຍ່ໜຽວແໜ້ນ ເປັນຕົ້ນ ການຊ່ວຍເຫຼືອກໍ່ສ້າງໂຮງໝໍ ແລະ ປະກອບເຄື່ອງມືການແພດທີ່ທັນສະໄໝ ພ້ອມກັນນັ້ນ, ຍັງໄດ້ສົ່ງຊ່ຽວ ຊານສະເພາະດ້ານ ຜັດປ່ຽນກັນມາປະຈຳຢູ່ໂຮງໝໍສູນກາງ 103 ກອງທັບໃນທຸກໆປີ. ນອກນັ້ນ, ຍັງໄດ້ຊ່ວຍເຫຼືອກໍ່ສ້າງບຸກຄະລາກອນການແພດທັງໄລຍະສັ້ນ ແລະ ໄລຍະຍາວ ເປັນຈຳນວນຫຼວງຫຼາຍ ເຮັດໃຫ້ເຫຼົ່າຮົບເສນາຮັກ ກອງທັບປະຊາຊົນລາວມີຄວາມເຂັ້ມແຂງທາງດ້ານວິຊາການ ແລະ ໄດ້ຮັບຄວາມເຊື່ອໝັ້ນໄວ້ວາງໃຈຈາກຜູ້ມາໃຊ້ບໍລິການໃນໂຮງໝໍຂອງກອງທັບ, ຕໍ່ການຊ່ວຍເຫຼືອດັ່ງກ່າວ ຕາງໜ້າໃຫ້ຄະນະນຳກະຊວງປ້ອງກັນປະເທດສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງກອງທັບປົດປ່ອຍປະຊາຊົນຈີນທີ່ໃຫ້ການຊ່ວຍເຫຼືອອັນລໍ້າຄ່າໃຫ້ ກອງທັບປະຊາຊົນລາວ.
ການຝຶກຊ້ອມຮ່ວມໃນການຊ່ວຍເຫຼືອມະນຸດສະທຳ ແລະ ການບໍລິການດ້ານການແພດຮ່ວມສອງກອງທັບ ລາວ-ຈີນ ແມ່ນເປົ້າໝາຍຂອງສອງພັກ, ສອງລັດ, ສອງກອງທັບ. ນອກຈາກຈະເປັນການສະສົມປະສົບການ, ການສ້າງຄວາມເຂັ້ມແຂງທາງດ້ານວິຊາການແລ້ວ ຍັງເປັນການຮັດແໜ້ນຄວາມສາມັກຄີ ມິດຕະພາບ ລະຫວ່າງ ເຫຼົ່າຮົບເສນາຮັກ ແລະ ພະນັກງານແພດໝໍຂອງສອງກອງທັບນຳອີກ, ເປັນສັນຍາລັກສໍາຄັນໜຶ່ງໃນປີ 2026 ນີ້, ເປັນປີສ້າງສາຍພົວພັນທາງການທູດລະຫວ່າງ ລາວ-ຈີນ ຄົບຮອບ 65 ປີ “ ປີມິດຕະພາບ ລາວ-ຈີນ” ແລະ ການເປີດນຳໃຊ້ເສັ້ນທາງລົດໄຟ ລາວ-ຈີນ ຄົບຮອບ 5 ປີ ແລະ ພິເສດປີ 2026 ນີ້, ກົມເສນາຮັກ (ໂຮງໝໍສູນກາງ 103 ກອງທັບປະຊາຊົນລາວ) ຈະໄດ້ຮັບ ແລະ ເປີດນຳໃຊ້ສູນວິໄຈພະຍາດເຂດຮ້ອນ ທີ່ກອງທັບປົດປ່ອຍປະຊາຊົນຈີນ ສ້າງ ແລະ ຈະມອບໃຫ້ໃນໄວໆນີ້. ການຮ່ວມຝຶກຊ້ອມຄັ້ງນີ້, ຍັງໄດ້ຕີລາຄາສູງ ແລະ ເຫັນໄດ້ຄວາມສາມັກຄີແບບພິເສດລະຫວ່າງ ສອງລັດຖະບານ ກໍຄືສອງກອງທັບ ລາວ-ຈີນ ທີ່ໄດ້ຮ່ວມກັນເຊັນສັນຍາແຜນແມ່ບົດວ່າດ້ວຍຄູ່ຮ່ວມຊາຕາກຳຮອບດ້ານ ລາວ-ຈີນ ເວົ້າສະເພາະ ເປັນການຍົກລະດັບຂີດຄວາມສາມາດໃນການກອບກູ້, ຊ່ວຍເຫຼືອ ແລະ ແກ້ໄຂເຫດການໄພພິບັດທຳມະຊາດ ຮ່ວມກັນ ລະຫວ່າງ ສອງເຫຼົ່າຮົບເສນາຮັກ. ການຝຶກກອບກູ້ໄພພິບັດຄັ້ງນີ້ ແມ່ນການຊອກຄົ້ນກອບກູ້ ແລະ ຊ່ວຍເຫຼືອຜູ້ໄດ້ຮັບຜົນກະທົບຈາກລົມພາຍຸຮ້າຍແຮງ ຊຶ່ງເຫດການນີ້ມີຜູ້ໄດ້ຮັບບາດເຈັບເປັນຈຳນວນຫຼວງຫຼາຍ. ກິດຈະກໍາຄັ້ງນີ້ຈະດໍາເນີນໄປເປັນເວລາ 16 ວັນ ແບ່ງເປັນສອງໄລຍະຄື: ວັນທີ 7-14 ກັນຍາ 2026 ແມ່ນການຝຶກຊ້ອມຊ່ວຍເຫຼືອກອບກູ້ໄພພິບັດ ຢູ່ນະຄອນຫຼວງວຽງຈັນ ທີ່ສະໜາມຈໍາລອງ (ສະຖານີຄ່ຽນຖ່າຍສິນຄ້າດົງໂພສີ) ເມືອງຫາດຊາຍຟອງ ນະຄອນຫຼວງວຽງຈັນ, ວັນທີ 15-22 ກັນຍາ 2026 ແມ່ນກິດຈະກໍາບໍລິການກວດສຸຂະພາບ (ຢູ່ໂຮງໝໍສູນກາງ 103 ກອງທັບ, ໂຮງໝໍບໍລິເວນ 106 ກອງທັບ, ໂຮງໝໍບໍລິ ເວນ 109 ກອງທັບ ແລະ ໂຮງໝໍທະຫານແຂວງອັດຕະປື) ຊຶ່ງທີມແພດຝ່າຍຈີນ ຈະໄດ້ຈັດແບ່ງກຳລັງເພື່ອໄປກວດສຸຂະພາບ ແລະ ເບີກຈ່າຍຢາປົວພະຍາດໂດຍບໍ່ເສຍຄ່າ. ຈາກນັ້ນ, ຄະນະທັງສອງຝ່າຍ ຍັງໄດ້ເຄື່ອນໄຫວກວດກາສະໜາມຕົວຈິງ ເພື່ອຮັບປະກັນຄວາມພ້ອມໃນການຝຶກຊ້ອມ.
ຂ່າວ: ໂຊເລ້ ບຸນເຮືອງ
ຄໍາເຫັນ