ມີຜູ້ອໍານວຍການ ບໍລິສັດການລົງທຶນຢາງພາລາຢຸນນານ ຈໍາກັດ ແຂວງຫຼວງນໍ້າທາ, ຜູ້ອໍານວຍການບໍລິສັດ ເຕີຊານຢາງພາລາບໍ່ແກ້ວ ຈໍາກັດຜູ້ດຽວ, ມີພາກສ່ວນກ່ຽວຂ້ອງເຂົ້າຮ່ວມ.
ໂຮງງານແຫ່ງນີ້, ຕັ້ງຢູ່ບ້ານປຸ່ງຈອມແສງ ເມືອງເມິງ ແຂວງບໍ່ແກ້ວ ໄດ້ຮັບການກໍ່ສ້າງມາໄດ້ໄລຍະໜຶ່ງ ແລະ ໄດ້ເປີດພິທີນໍາໃຊ້ຢ່າງເປັນທາງການໃນວັນທີ 1 ພະຈິກ 2024 ຊຶ່ງເປັນໂຮງງານແຫ່ງທໍາອິດ ຂອງເມືອງເມິງ; ການສ້າງຕັ້ງໂຮງງານດັ່ງກ່າວ ເພຶ່ອອໍານວຍຄວາມສະດວກ ໃຫ້ແກ່ປະຊາຊົນບັນດາເຜົ່າ ກໍຄືຊາວກະສິກອນສວນຢາງພາລາພາຍໃນເມືອງເມິງ, ທັງເປັນທ່າແຮງທີ່ສໍາຄັນ ໃຫ້ແກ່ການພັດທະນາເສດຖະກິດ - ສັງຄົມຂອງເມືອງ, ທັງສາມາດຕອບສະໜອງກັບຄວາມຮຽກຮ້ອງຕ້ອງການຂອງປະຊາຊົນ ຜູ້ທີ່ປູກຢາງພາລາໄດ້ເຂົ້າເຖິງຕະຫຼາດການຊື້-ຂາຍຢາງພາລາກັບທີ່ ແລະ ທັງເປັນການຮັບປະກັນທາງດ້ານລາຄານໍ້າຢາງພາລາໃຫ້ຖືກຕ້ອງຕາມທ້ອງຕະຫຼາດທີ່ກໍານົດອອກໃນແຕ່ລະໄລຍະ.
ທ່ານ ນາງ ວັນ ເຈັ່ນຕະພູມ ໄດ້ຮຽກຮ້ອງມາຍັງບໍລິສັດຜູ້ລົງທຶນ ເອົາໃຈໃສ່ ແລະ ໃຫ້ຄວາມສໍາຄັນ ໃນການປົກປັກຮັກສາສະພາບແວດລ້ອມບໍລິເວນຂອບເຂດໂຮງງານເປັນຕົ້ນ: ການບໍາບັດນໍ້າເສຍຈາກໂຮງງານໃຫ້ດີ ກ່ອນຈະປ່ອຍລົງສູ່ແຫຼ່ງນໍ້າທໍາມະຊາດ; ການກໍາຈັດມົນລະພິດທາງກິ່ນ ແລະ ອື່ນໆ ທີ່ຈະກະທົບຕໍ່ສິ່ງແວດລ້ອມ, ປະຊາຊົນທີ່ດໍາລົງຊີວິດໃນເຂດໃກ້ຄຽງໃຫ້ໜ້ອຍທີ່ສຸດ, ຕ້ອງໄດ້ເອົາໃຈໃສ່ຊຸກຍູ້ສົ່ງເສີມປະຊາຊົນ ໃນການປູກຢາງພາລາ, ບົວລະບັດຮັກສາ ແລະ ເກັບຊື້ນໍ້າຢາງພາລານໍາປະຊາຊົນ ເພື່ອປ້ອນເຂົ້າໂຮງງານ ຕາມລາຄາທີ່ກໍານົດໃນແຕ່ລະໄລຍະໃຫ້ຖືກຕ້ອງ ແລະ ຍຸຕິທໍາ, ໃຫ້ບໍລິສັດ ຕ້ອງນໍາໃຊ້ແຮງງານ ຂອງທ້ອງຖິ່ນພາຍໃນເມືອງເມິງເປັນບຸລິມະສິດ ເພື່ອເປັນການຫຼຸດຜ່ອນການນໍາເຂົ້າແຮງງານມາຈາກບ່ອນອື່ນ, ເອົາໃຈໃສ່ປະກອບສ່ວນເຂົ້າໃນການກໍ່ສ້າງພື້ນຖານໂຄງລ່າງທີ່ຈໍາເປັນຊ່ວຍຊຸມຊົນ ກໍຄືການພັດທະນາເມືອງເມິງ, ເອົາໃຈໃສ່ຕິດຕາມກວດກາໃຫ້ຖືກຕ້ອງຕາມກົດໝາຍ ວ່າດ້ວຍການລົງທຶນຂອງຕ່າງປະເທດ ແລະ ກົດໝາຍຕ່າງໆຂອງລາວ ໃຫ້ຖືກຕ້ອງ ແລະ ເຂັ້ມງວດຂຶ້ນຕື່ມອີ່ກ.
(ຂ່າວ: ອຸ່ນຄໍາ ຂັນວາລິດ)
ຄໍາເຫັນ