 |
ໃນພິທີ, ທ່ານ ນາງ ມຸກດາວັນ ຂັດທິຍະ ຜູ້ບໍລິຫານໂຄງການ ຜູ້ກໍ່ຕັ້ງ The Pianist Vientiane ກ່າວວ່າ: ເດິ ເປຍນິສ ວຽງຈັນ ໄດ້ກ້າວເຂົ້າສູ່ປີທີ 6 ໃນການບຸກເບີກ, ສ້າງສັນຜົນງານ ແລະ ສ້າງກິດຈະກຳທີ່ຕິດພັນກັບການພັດທະນາດົນຕີປະສານສຽງອໍເຄັສຕ້າ ທີ່ກໍ່ຕັ້ງຂຶ້ນໂດຍກຸ່ມຄົນທີ່ມີຄວາມສາມາດດ້ານດົນຕີສາກົນ ແລະ ມີຈິດໃຈມັກຮັກໃນດົນຕີປະສານສຽງ. ຜ່ານການຝຶກຝົນຫຼໍ່ຫຼອມ ແລະ ພັດທະນາຕົນເອງຢ່າງບໍ່ຢຸດຢັ້ງ ໂດຍຢຶດຖືແນວຄວາມຄິດ “ພັດທະນາ ແຕ່ບໍ່ລືມຄວາມເປັນລາວ”, ໝາຍເຖິງການນໍາສະເໜີເຄື່ອງດົນຕີພື້ນເມືອງລາວ ໃນຮູບແບບການບັນເລງດົນຕີປະສານສຽງອໍເຄັສຕ້າແບບສາກົນນຳມາປະສົມປະສານຢ່າງລົງຕົວ ເພື່ອເຮັດໃຫ້ຄົນຕ່າງປະເທດໄດ້ສຳຜັດເຖິງຄວາມສວຍງາມອັນເປັນເອກະລັກຂອງສິລະປະ, ວັດທະນະທຳລາວ ກໍຄືດົນຕີລາວ ແລະ ເຮັດໃຫ້ຄົນລາວໄດ້ຮຽນຮູ້ ແລະ ເຂົ້າເຖິງດົນຕີສາກົນອໍເຄັສຕ້າຫຼາຍຂຶ້ນ.
 |
ປີນີ້ເປັນປີທີ່ ເດິ ເປຍນິສ ວຽງຈັນ ໄດ້ມີບາດກ້າວໃໝ່ທີ່ໃຫຍ່ກວ່າເກົ່າ, ໄດ້ຮັບການສະໜັບສະໜູນຈາກອົງການເພື່ອການພັດທະນາ ແລະ ການຮ່ວມມືປະເທດສະວິດ ຫຼື SDC ເພື່ອດໍາເນີນ 3 ກິດຈະກໍາຫຼັກຄື: 1. ກິດຈະກໍາສໍາມະນາວິທະຍາສາດ ເພື່ອຮ່ວມກັນແລກປ່ຽນປະສົບການ ແລະ ທິດທາງການພັດທະນາໃນຕໍ່ໜ້າໃນຂົງເຂດວຽກງານສິລະປະວັດທະນະທຳ ພ້ອມທັງຄັດເລືອກບົດເພງອັນຊົງຄຸນຄ່າຂອງລາວ ເພື່ອນຳມາປະພັນດົນຕີຄືນໃໝ່ຈຳນວນ 10 ບົດເພງ. ຜ່ານການແລກປ່ຽນກັບບັນດາອາຈານຜູ້ຊົງຄຸນນະວຸດດ້ານດົນຕີລາວຜ່ານມາ; 2. ກິດຈະກໍາເຜີຍແຜ່ຄວາມຮູ້ດ້ານດົນຕີຢູ່ຕ່າງແຂວງ ເພື່ອເຜີຍແຜ່ຄວາມຮູ້, ແລກປ່ຽນປະສົບການ ແລະ ຈັດການສະແດງ ເພື່ອສ້າງແຮງບັນດານໃຈໃຫ້ເດັກນ້ອຍຍຸກໃໝ່ໄດ້ມີຈິນຕະນາການ ແລະ ຄວາມຝັນທີ່ຈະເປັນສິລະປິນມືອາຊີບ; 3. ການຈັດສະແດງຄອນເສີດປະຈຳປີຂອງ ເດິ ເປຍນິສ ວຽງຈັນ ຊຶ່ງຈະນຳເອົາ 10 ບົດເພງ ທີ່ໄດ້ປະພັນດົນຕີໃໝ່ມາສະແດງສົດໃຫ້ມວນຊົນໄດ້ຮັບຊົມ. ຈຸດພິເສດຂອງຄອນເສີດໃນປີນີ້, ເວົ້າໄດ້ວ່າເປັນຄອນເສີດເພື່ອການກຸສົນ, ລາຍໄດ້ຈາກການຂາຍບັດຄອນເສີດທັງໝົດ ແມ່ນຈະນຳມາບູລະນະສ້ອມແປງຫ້ອງຊ້ອມເປຍໂນ ແລະ ຊື້ເຄື່ອງອຸປະກອນດົນຕີທີ່ຍັງຂາດເຫຼືອຕາມກຳລັງແຮງ ໃຫ້ວິທະຍາໄລສິລະປະແຫ່ງຊາດ ຊຶ່ງເປັນບ່ອນສຳຄັນໃນການກໍ່ສ້າງບຸກຄະລາກອນດ້ານສິລະປະຂອງຊາດ. ພິເສດໄປກ່ວານັ້ນ, ຄອນເສີດໃນຄັ້ງນີ້ SDC ຍັງໄດ້ເຊື້ອເຊີນນັກໄວໂອລິນທີ່ມີຊື່ສຽງຈາກປະເທດສະວິສ ເພື່ອເຂົ້າຮ່ວມສະແດງບັນເລງເພງລາວກັບພວກເຮົາແລະ ຈະຈັດ Violin Master Class ໃຫ້ສິລະປິນ ແລະ ນັກຮຽນ Violin ຂອງລາວອີກດ້ວຍ. ເຖິງຢ່າງໃດກໍຕາມພວກເຮົາຍັງຕ້ອງການການສະໜັັບສະໜູນຈາກພາກສ່ວນອື່ນໆ ເພື່ອຮ່ວມສົມທົບໃນການຊຸກຍູ້ວຽກງານໂຄງການໃຫ້ສຳເລັດຕາມແຜນທີ່ວາງໄວ້, ຖ້າຫາກໄດ້ຮັບການສະໜູນພຽງພໍກໍຈະສາມາດດຳເນີນກິດຈະກຳພິເສດ ກໍຄືການຖ່າຍທຳວີດີໂອບົດເພງຈຳປາເມືອງລາວ ທີ່ແຂວງຈຳປາສັກໃນທ້າຍປີນີ້ ຊຶ່ງເປັນອີກຜົນງານໜຶ່ງທີ່ມີເປົ້າໝາຍສົ່ງເສີມ ແລະ ໂຄສະນາແຫຼ່ງທ່ອງທ່ຽວທີ່ສຳຄັນຂອງແຂວງຈຳປາສັກຢ່າງຊັດເຈນ.
 |
ເດິ ເປຍນິສ ວຽງຈັນ ບໍ່ໄດ້ເປັນພຽງແຕ່ວົງດົນຕີທົ່ວໄປ ແຕ່ຍັງເປັນນັກພັດທະນາເປັນຜູ້ບຸກເບີກອາຊີບໃໝ່ໃຫ້ສປປ ລາວ. ປັດຈຸບັນພວກເຮົາຮວມກຸ່ມກັນໄດ້ຫຼາຍກວ່າ 30 ຊີວິດ, ເຖິງໂຕເລກຈະໜ້ອຍ ແຕ່ກໍເປັນຈຸດໝາຍອັນດີ ທີ່ເຮັດໃຫ້ປະເທດລາວມີວົງອໍເຄັສຕ້າເກີດຂຶ້ນ, ພວກເຮົາມີເປົ້າໝາຍທີ່ຈະສືບຕໍ່ພັດທະນາອາຊີບນີິ້ໃຫ້ສາມາດຕໍ່ຍອດໃຫ້ຄົນໄວໜຸ່ມຮຸ່ນຕໍ່ໄປນຳເອົາສິລະປະວັດທະນະທຳລາວອັນລ້ຳຄ່າມາສານຕໍ່ໃນຮູບແບບຮ່ວມສະໄໝ ເພືຶ່ອໃຫ້ເຂົ້າເຖິງກຸ່ມຄົນຢ່າງກວ້າງຂວາງ ແລະ ນຳເອົາສຽງແຄນລາວກ້າວສູ່ເວທີສາກົນຢ່າງມີກຽດສະຫງ່າ.
ໂອກາດນີ້, ທ່ານ ນາງ ວິໄລວອນ ຈັນທະລາຕີ ພ້ອມດ້ວຍບັນດາຄະນະປະທານ ກໍໄດ້ໃຫ້ກຽດຂຶ້ນຕີກອງ ເພື່ອເປັນສິລິມຸງຄຸນເປີດໂຄງການດັ່ງກ່າວຢ່າງເປັນທາງການ. ພ້ອມນັ້ນ, ຍັງໄດ້ຈັດສໍາມະນາວິທະຍາສາດພາຍໃຕ້ຫົວຂໍ້: ດົນຕີລາວກ້າວເຂົ້າສູ່ຍຸກສະໄໝ.
ຂ່າວ-ພາບ: ວັນເພັງ
ຄໍາເຫັນ