ເປີດງານ “ມະຫະກຳສີມືຫັດຖະກຳລາວ ຄັ້ງທີ 24 ປະຈໍາປີ 2025”

ເປັນກຽດໃນພິທີ ໂດຍ ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ, ທ່ານ ນາງ ນາລີ ສີສຸລິດ ພັນລະຍາ ປະທານປະເທດ ແຫ່ງ ສປປ ລາວ ປະທານ ຄະນະທີ່ປຶກສາ ສະມາຄົມ ຫັດຖະກຳລາວ, ມີບັນດາທ່ານ ການນໍາ ພັກ-ລັດ, ບັນດາ ທ່ານ ລັດຖະມົນຕີ, ຮອງລັດຖະມົນຕີ, ແຂກຖືກເຊີນ ແລະ ມວນຊົນເຂົ້າຮ່ວມຢ່າງຫຼວງຫຼາຍ.

ໃນພິທີ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ຂ້າພະເຈົ້າຮູ້ສຶກຍິນດີ ທີ່ໄດ້ຮັບກຽດເປັນຢ່າງຍິ່ງ ໃນການເຂົ້າຮ່ວມເປັນປະທານເປີດງານ “ມະຫະກຳສີມືຫັດຖະກຳລາວ ຄັ້ງທີ 24 ປະຈໍາປີ 2025” ຊຶ່ງແມ່ນງານສໍາຄັນປະຈຳປີ ທີ່ ສະທ້ອນໃຫ້ເຫັນເຖິງຄວາມພະຍາຍາມ ແລະ ຄວາມມຸ່ງໝັ້ນຂອງ ພັກ ແລະ ລັດຖະບານ ຂອງພວກເຮົາ ໃນການອະນຸລັກ ແລະ ສົ່ງເສີມມໍລະດົກທາງດ້ານວັດທະນະທຳຂອງຊາດ ຜ່ານງານມະຫະກຳຫັດຖະກຳ. ຫັດຖະ ກຳແມ່ນ ວັດທະນນະທຳ ທີ່ເປັນມູນເຊື້ອທີ່ມີຄ່າ ແລະ ເປັນສ່ວນໜຶ່ງຂອງ ວັດທະນະທຳຂອງຊາດລາວ. ມັນບໍ່ພຽງແຕ່ເປັນການບົ່ງບອກເຖິງລັກສະນະເຊື້ອຊາດ, ຮີດຄອງປະເພນີ ການນຸ່ງຖືອັນດີງາມ ຍັງເປັນອາຊີບທຳມາຫາກິນຂອງປະຊາຊົນ, ແຕ່ຍັງເປັນສື່ທີ່ສະທ້ອນເຖິງພູມປັນຍາປະດິດສ້າງ ແລະ ຈິດວິນຍານຂອງມູນເຊື້ອລາວບັນດາເຜົ່າ. ການຮັກສາ ແລະ ສືບຕໍ່ຫັດຖະກຳ ຈຶ່ງເປັນໜ້າທີ່ຂອງພວກເຮົາທຸກຄົນ ເພື່ອໃຫ້ຍັງຄົງຢູ່ ແລະ ພັດທະນາໃຫ້ທັນສະໄໝ.

ໃນໄລຍະຜ່ານມາ ກະຊວງ ອຄ ໄດ້ສ້າງແຜນພັດທະນາ ອຸດສາຫະກຳ ແລະ ການຄ້າ 5 ປີ (2021-2025) ຊຶ່ງໃນປີ 2020, ທົ່ວປະເທດມີໂຮງງານ ແລະ ໂຮງຊ່າງຫັດຖະກຳທັງໝົດ 11,728 ແຫ່ງ (ກວມເອົາ 98.39% ເປັນໂຮງຊ່າງຄອບຄົວ). ຜະລິດຕະພັນທີ່ສົ່ງອອກປະກອບດ້ວຍ: ຜະລິດຕະພັນຈາກໄມ້ໄຜ່ ແລະ ຫວາຍ, ຜະລິດຕະພັນຝ້າຍ ແລະ ເຄື່ອງຈັກສານ ລວມຍອດມູນຄ່າການສົ່ງອອກສູງເຖິງ 900,000 ໂດລາ. ໃນປັດຈຸບັນ ກະຊວງ ອຄ ກໍໄດ້ຄົ້ນຄວ້າ ແຜນພັດທະນາອຸດສາຫະກຳ ແລະ ການຄ້າ 5 ປີ (2026-2030) ໂດຍໄດ້ກວມເອົາວຽກງານ ຫັດຖະກຳ ເຂົ້າຢູ່ໃນແຜນພັດທະນາດັ່ງກ່າວ. ພັກ-ລັດໄດ້ວາງເປົ້າໝາຍໃຫ້ການພັດທະນາວຽກງານຫັດຖະກຳເປັນສ່ວນໜຶ່ງຂອງການສ້າງລາຍໄດ້ ແລະ ການຈ້າງງານໃນຊຸມຊົນຂອງຊົນນະບົດ. ໂດຍຈະສ້າງຜູ້ສືບທອດທີ່ມີຄຸນນະພາບ ເນັ້ນໃສ່ໃຫ້ຄວາມສໍາຄັນກັບການພັດທະນາຊາວຊ່າງຫັດຖະກຳທ້ອງຖິ່ນ, ຍົກລະດັບທັກສະ ແລະ ຄຸນນະພາບຜະລິດຕະພັນຫັດຖະ ກຳໃຫ້ມີ ວັດທະນະທຳ ອັນຊົງຄຸນຄ່າ ແລະ ສ້າງຄວາມສາມາດດ້ານການແຂ່ງຂັນ ພ້ອມທັງສົ່ງເສີມການເຂົ້າເຖິງຕະຫຼາດ ພາຍໃນ ແລະ ຕະຫຼາດສາກົນ. ປີ 2030, ກະຊວງ ອຄ ຈະມຸ່ງໝັ້ນໃນການສ້າງເຄືອຂ່າຍຜູ້ຜະລິດ ແລະ ຜູ້ຄ້າຂາຍຫັດຖະກຳໃຫ້ແໜ້ນແຟ້ນ, ພັດທະນາມາດຕະຖານ ແລະ ການຮັບຮອງ ສິນຄ້າຫັດຖະກຳລາວ, ສົ່ງເສີມການໃຊ້ວັດຖຸດິບທ້ອງຖິ່ນແບບຍືນຍົງ ແລະ ນໍາເຕັກໂນໂລຊີມາປະຍຸກໃຊ້ ໃນການຜະລິດເພື່ອໃຫ້ສິນຄ້າຫັດຖະກຳຂອງເຮົາທັນສະໄໝຫຼາຍຂຶ້ນ.

ທ່ານນາງ ສຸວິຕາ ປະເສີດ ປະທານສະມາຄົມ ຫັດຖະກຳລາວ ທັງເປັນຫົວໜ້າຄະນະກະກຽມງານມະຫາກຳສີມືຫັດຖະກຳລາວ ຄັ້ງທີ 24 ປະຈໍາປີ 2025 ລາຍງານວ່າ: ງານມະຫາກຳສີມືຫັດຖະກຳລາວ ຊຶ່ງແມ່ນງານປະເພນີບຸນປາງໃຫຍ່ຂອງຊາວຊ່າງຫັດຖະກຳລາວໄດ້ໝູນວຽນມາຮອດອີກວາລະໜຶ່ງ, ງານມະຫະກໍາສີມືຫັດຖະກໍາລາວ ຄັ້ງທີ 24 ປະຈໍາປີ 2025 ຈັດຂຶ້ນພາຍໃຕ້ຄໍາຂວັນ: “ສີໄມ້ລາຍມື ຄື ອຸທິຍານແຫ່ງການທ່ອງທ່ຽວ, ພາຍໃຕ້ຫົວຂໍ້: ຕໍ່າຫູກ-ຜູກຮັກ ອະນຸລັກ ປະເພນີ ການແຕ່ງດອງ”

ຈຸດປະສົງເພື່ອສະເຫຼີມສະຫຼອງ “ວັນຫັດຖະກໍາແຫ່ງຊາດ ວັນທີ 1 ພະຈິກ”, ເພື່ອປະກອບສ່ວນສ້າງຂະບວນການຄໍານັບຮັບຕ້ອນວັນສະຖາປະນາສາທາລະນະລັດ ປະຊາທິປະໄຕ ປະຊົນລາວ ຄົບຮອບ 50 ປີ (2/12/1975-2/12/2025), ເປັນເວທີ ວາງສະແດງ ແລະ ຂາຍຜະລິດຕະພັນຫັດຖະກໍາ ພ້ອມທັງເປັນການເປີດໂອກາດໃຫ້ມວນຊົນ ໄດ້ຮູ້ຈັກກັບຕໍານັກຜ້າໄໝລາວບູຮານ ທີ່ໄດ້ສ້າງຕັ້ງຂຶ້ນໃໝ່ ຊຶ່ງເປັນ ບ່ອນອະນຸລັກຮັກສາ ແລະ ວາງສະແດງແຜ່ນແພບູຮານລາວ, ເຕົ້າໂຮມບັນດາຊາວຊ່າງຫັດຖະກໍາ ແລະ ຜູ້ປະກອບການດ້ານຫັດຖະກໍາ, ໄດ້ມີໂອກາດແລກປ່ຽນບົດຮຽນປະສົບການກ່ຽວກັບ ເຕັກນິກການຜະລິດ, ການອອກແບບ, ຄຸນນະພາບ, ການເຂົ້າເຖິງແຫຼ່ງທຶນ, ການເຂົ້າເຖິງຕະຫຼາດ ແລະ ອື່ນໆທີ່ພົວພັນກັບການອະນຸລັກ ແລະ ສົ່ງເສີມວຽກງານຫັດຖະກໍາ, ເປັນແຫຼ່ງສະໜອງຂໍ້ມູນ ໃຫ້ແກ່ນັກຄົ້ນຄວ້າ, ຊາວໜຸ່ມ, ໄວໜຸ່ມ, ຮຸ່ນຄົນສືບທອດ, ນັກຮຽນ, ນັກສຶກສາ, ປັນຍາຊົນ ທັງພາຍໃນ ແລະ ຕ່າງປະເທດ ທີ່ມີຄວາມສົນໃຈກ່ຽວກັບການອະນຸລັກ ແລະ ສົ່ງເສີມວຽກງານຫັດຖະກໍາ ເວົ້າລວມ, ເວົ້າສະເພາະແມ່ນ ການອະນຸ ລັກແຜ່ນແພພື້ນເມືອງລາວ, ຊຶ່ງດໍາເນີນເປັນເວລາ 5 ວັນ, ເລີ່ມແຕ່ ວັນທີ 22-26 ຕຸລາ 2025

ພາຍໃນງານປະກອບມີ: ວາງສະແດງ ແລະ ຂາຍສິນຄ້າຫັດຖະກຳ ແບບບູຮານ ແລະ ແບບສະ ໄໝໃໝ່, ສາທິດຂັ້ນຕອນການຜະລິດ ຈາກຊ່າງຕ່າງແຂວງ ຄື: ແຂວງຫົວພັນ, ຊຽງຂວາງ, ຫຼວງນໍ້າທາ, ອຸດົມໄຊ, ເຊກອງ, ສາລະວັນ, ຈໍາປາສັກ, ນະຄອນຫຼວງວຽງຈັນ ແລະ ໄດ້ຈັດວາງສະແດງສະຖານທີ່ທ່ອງທ່ຽວ, ຈັດສັນບ່ອນບໍລິການຖ່າຍຮູບເປັນທີ່ລະນຶກ, ເດີນແບບຊຸດແຕ່ງດອງຊົນເຜົ່າ, ສໍາມະນາໃຫ້ຄວາມຮູ້ ໃນຫຼາຍຫົວຂໍ້, ປະກວດຟ້ອນລໍາວົງລາວ, ປະກວດພາຂວັນລາວ ແລະ ອື່ນໆ.

ງານວາງສະແດງດັ່ງກ່າວ ໄດ້ມີຫຼາຍພາກສ່ວນ ແລະ ຫຼາຍຫົວໜ່ວຍຫັດຖະກໍາເຂົ້າຮ່ວມ ເປັນຕົ້ນແມ່ນ: ພາກສ່ວນ ແຜ່ນແພ (ຜ້າໄໝ, ຜ້າຝ້າຍ), ພາກສ່ວນ ເຄື່ອງປະດັບ (ເງິນ, ຄໍາ, ແກ້ວປະເສີດ), ພາກສ່ວນ ເຄື່ອງຈັກສານ (ຫວາຍ-ໄມ້ປ່ອງ), ພາກສ່ວນ ຜະລິດຕະພັນວັດທະນະທໍາ (ໄມ້ແກະສະຫຼັກ, ຮູບແຕ້ມ ແລະ ອື່ນໆ), ພາກສ່ວນ ອາຫານພື້ນເມືອງ, ຜັກ, ໝາກໄມ້ປອດສານພິດ, ເຄື່ອງດື່ມສະໝຸນໄພ ແລະ ອື່ນໆ ລວມທັງໝົດ 130 ກວ່າຮ້ານ, ບັນດາມວນຊົນທີ່ເຂົ້າໄປຊົມ-ຊື້ ຍັງຈະໄດ້ເຂົ້າຮ່ວມຫຼາຍກິດຈະກໍາ.

(ຂ່າວ: ແສງຈັນ)