ເປີດງານແຂ່ງຂັນສີມືແຮງງານແຫ່ງຊາດ ຄັ້ງທີ IV

ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງທ່ານ ເລັດ ໄຊຍະພອນ ປະທານຄະນະບໍລິຫານງານສະຫະພັນກໍາມະບານລາວ ແລະກ່າວເປີດງານຂອງທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ, ມີບັນດາຄູຝຶກ, ນັກສຶກສາ ເຂົ້າຮ່ວມແຂ່ງຂັນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີ, ທ່ານ ບຸນມາ ສິດທິໂສມ ຫົວໜ້າສະຖາບັນສີມືແຮງງານ ກະຊວງ ຮສສ ໄດ້ຍົກໃຫ້ເຫັນຄວາມເປັນມາ, ເຫດຜົນແລະຄວາມຈໍາເປັນການແຂ່ງຂັນສີມືແຮງງານ.ການແຂ່ງຂັນສີມືແຮງງານແຫ່ງຊາດ ເປັນກິດຈະກຳໜຶ່ງທີ່ຖືກຈັດທຸກໆປີ ເພື່ອສົ່ງເສີມການພັດທະນາສີມືແຮງງານ ໃຫ້ບັນດາຊາວໜຸ່ມ, ນັກຮຽນ ແລະ ນັກສຶກສາທີ່ເປັນກຳລັງແຮງຂອງຊາດ, ເປັນເວທີແລກປ່ຽນ ແລະ ຖອດຖອນບົດຮຽນ ຊຶ່ງກັນ ແລະກັນທາງດ້ານບົດຮຽນອັນພົ້ນເດັ່ນ, ນະວັດຕະກຳ ແລະ ເຕັກໂນໂລຊີຕ່າງໆ ທີ່ມີການປ່ຽນແປງໄປຕາມຍຸກການຫັນເປັນອຸດສາຫະກຳ4.0.

ນອກຈາກນັ້ນ, ຍັງເປັນການຊຸກຍູ້ສົ່ງເສີມໃຫ້ມີການຮ່ວມມືລະຫວ່າງພາກລັດ ແລະ ພາກເອກະຊົນຫຼາຍຂຶ້ນ ຊຶ່ງເປັນວຽກງານໜຶ່ງທີ່ນອນຢູ່ໃນວຽກງານການພັດທະນາຊັບພະຍາກອນມະນຸດ ເວົ້າລວມ, ເວົ້າສະເພາະແມ່ນການພັດທະນາສີມືແຮງງານ, ຜ່ານການແຂ່ງຂັນສີມືແຮງງານແຫ່ງຊາດ ຄັ້ງທີ IV ສໍາເລັດ ຈະໄດ້ນັກແຂ່ງຂັນສີມືແຮງງານສາຂາລະ 3 ຄົນ, ໂດຍແມ່ນຜູ້ທີ່ໄດ້ຫຼຽນຄໍາ, ຫຼຽນເງິນ ແລະ ຫຼຽນທອງແດງ ຂອງແຕ່ລະສາຂາຊ່າງ, ເພື່ອນໍາໄປຝຶກຊ້ອມ ແລະ ຄັດເລືອກເອົາຜູ້ມີຄວາມຮູ້, ຄວາມສາມາດ ແລະ ຄຸນສົມບັດດີເດັ່ນ ຈໍານວນ 2 ຄົນ ເປັນຕົວແທນທີມຊາດລາວ ເພື່ອຈະເຂົ້າຮ່ວມການແຂ່ງຂັນສີມືແຮງງານ ອາຊຽນ ຄັ້ງທີ XIV (14^thWorldSkills ASEAN) ທີ່ຈະຈັດຂຶ້ນ ໃນລະຫວ່າງວັນທີ 22-25 ສິງຫາ 2025 ທີ່ສູນການຄ້າສາກົນມະນີລາ ປະເທດຟີລິບປິນ.

ສໍາລັບສາຂາວິຊາແລະສະຖານທີ່ຈັດການແຂ່ງຂັນປະກອບມີ 5 ສາຂາຊ່າງ ທີ່ມາຈາກສະຖານພັດທະນາສີມີແຮງງານ, ສະຖານອາຊີວະສຶກສາຈາກສູນກາງ ແລະ ທ້ອງຖິ່ນ ໃນທົ່ວປະເທດເຂົ້າຮ່ວມຄື:ຕິດຕັ້ງໄຟຟ້າໃນອາຄານ(Electrical Installations); ເຮັດຕູ້ໄມ້(Cabinet Making);ເຕັກໂນໂລຊີເວັບໄຊ(Web Technologies)ຈັດແຂ່ງຂັນທີ່: ສະຖາບັນພັດທະນາສີມືແຮງງານ;ເຕັກໂນໂລຊີອອກແບບກຣາບຟິກ(Graphic Design Technology)ຈັດແຂ່ງຂັນທີ່: ວິທະຍາໄລເຕັກນິກວິຊາຊີບມິດຕະພາບວຽງຈັນ-ຮ່າໂນ້ຍ;ປຸງແຕ່ງອາຫານ(Cooking) ຈັດແຂ່ງຂັນທີ່: ວິທະຍາໄລເຕັກນິກປາກປ່າສັກ. ໃນນັ້ນ, ມີທັງໝົດ 23 ພາກສ່ວນເຂົ້າຮ່ວມແຂ່ງຂັນ, ມີຈໍານວນຄູຝຶກ 59 ທ່ານ ແລະ ຈໍານວນນັກແຂ່ງຂັນ 72 ທ່ານ, ຍິງ 17 ທ່ານ.

ສໍາລັບການແຂ່ງຂັນສີມືແຮງງານໃນລະດັບອາຊຽນຜ່ານມາ,ສປປລາວໄດ້ເຂົ້າຮ່ວມ12 ຄັ້ງ. ໃນນີ້,ເປັນຜູ້ສັງເກດການ1 ຄັ້ງ, ເຂົ້າຮ່ວມແຂ່ງຂັນ11 ຄັ້ງ, ສາມາດຍາດມາໄດ້ 1 ຫຼຽນເງິນ ຈາກສາຂາວິຊາຊ່າງຕິດຕັ້ງໄຟຟ້າໃນອາຄານໃນການແຂ່ງຂັນສີມືແຮງງານອາຊຽນຄັ້ງທີXທີ່ຮ່າໂນ້ຍສສ ຫວຽດນາມແລະໄດ້ຮັບໃບຢັ້ງຢືນສີມືແຮງງານລະດັບອາຊຽນ 25 ໃບ.

ທ່ານ ບຸນມາ ສິດທິໂສມ ກ່າວຕື່ມວ່າ: ຄາດຄະເນຜົນໄດ້ຮັບໃນຄັ້ງນີ້,ມີນັກແຂ່ງຂັນໃນ 5 ສາຂາວິຊາຊ່າງທີ່ຜ່ານການຄັດເລືອກຈາກການແຂ່ງຂັນສີມືແຮງງານແຫ່ງຊາດ ຄັ້ງທີ IV ເພື່ອກຽມພ້ອມເຂົ້າແຂ່ງຂັນສີມືແຮງງານອາຊຽນ ຄັ້ງທີXIVປະເທດຟີລິບປິນ; ສ້າງຄວາມຮັບຮູ້ ແລະ ເຂົ້າໃຈກ່ຽວກັບວຽກງານແຂ່ງຂັນສີມືແຮງງານໃຫ້ພະນັກງານ ແລະ ພາກສ່ວນຕ່າງໆໃນສັງຄົມຫຼາຍຂຶ້ນ; ຊອກເຫັນຜູ້ອອກແຮງງານທີ່ມີສີມືບົ່ມຊ້ອນກໍຈະໄດ້ປະກົດຕົວອອກໃນງານມະຫະກຳແຂ່ງຂັນສີມືແຮງານ; ບັນດາສູນຝຶກວິຊາຊີບກໍຈະສາມາດສົມທຽບລະດັບການຮຽນ-ການສອນໃນແຕ່ລະສູນຝຶກດ້ວຍກັນໂດຍຜ່ານການແຂ່ງຂັນຕົວຈິງຂອງນັກຮຽນຂອງຕົນ; ຫົວໜ່ວຍທຸລະກິດຕ່າງໆຈະເຫັນໄດ້ຄວາມສຳຄັນໃນການແຂ່ງຂັນສີມືແຮງງານແລ້ວນຳໄປຈັດຕັ້ງປະຕິບັດແຂ່ງຂັນພາຍໃນອົງກອນຂອງຕົນເອງແລະ ຈະໄດ້ນຳໃຊ້ແຮງງານລາວທີ່ມີລະດັບສີມືເປັນທີ່ເພິ່ງພໍໃຈ; ໃນເວທີສາກົນ, ແຮງງານທີ່ມີສີມືຂອງ ສປປ ລາວ ກໍຈະໄດ້ຮັບການຍອມຮັບ ແລະປະກອບສ່ວນສະແດງສີມືໃນການແຂ່ງຂັນລະດັບສາກົນຢ່າງມີຫົວຄິດປະດິດສ້າງ.ງານແຂ່ງຂັນສີມືແຮງງານໃນຄັ້ງນີ້,ຈະໄດ້ດໍາເນີນໄປຮອດວັນທີ 30 ເມສາ 2025 ຈຶ່ງປິດລົງ.

ໂອກາດນີ້, ທ່ານ ເລັດ ໄຊຍະພອນໄດ້ໃຫ້ກຽດຂຶ້ນລັ່ນຄ້ອງ 9 ບາດ ເພື່ອເປັນສິຣິມຸງຄຸນເປີດງານແຂ່ງຂັນໃນຄັ້ງນີ້.

(ຂ່າວ-ພາບ: ວັນເພັງ)