 |
ໃນພິທີ, ທ່ານນາງ ອາລີ ວົງໜໍ່ບຸນທຳ ປະທານຄະນະບໍລິຫານງານ ສສຍລ ໄດ້ຂຶ້ນກ່າວເປີດງານວ່າ: ການຈັດງານໃນຄັ້ງນີ້, ແມ່ນໜຶ່ງໃນຫຼາຍກິດຈະກຳທີ່ສູນກາງສະຫະພັນແມ່ຍິງລາວຈັດຂຶ້ນ ເພື່ອຫວນຄືນມູນເຊື້ອການເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ຄົບຮອບ 70 ປີ, ການເສີມຂະຫຍາຍຄຸນລັກສະນະທີ່ເປັນມູນເຊື້ອຂອງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ ຊຶ່ງພາຍໃນງານໄດ້ຈັດໃຫ້ມີຫຼາຍກິດຈະກຳທີ່ປິ່ນອ້ອມ ເປັນຕົ້ນການຈັດປາຖະກະຖາມູນເຊື້ອແມ່ຍິງລາວໃນພາລະກິດປົດປ່ອຍຊາດ ແລະ ການປົກປັກຮັກສາພັດທະນາປະເທດຊາດໃນຫົວຂໍ້: ມູນເຊື້ອການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ແລະ ເສີມຂະຫຍາຍຄຸນລັກສະນະທີ່ເປັນມູນເຊື້ອຂອງສະຫະພັນແມ່ຍິງລາວ ແລະ ແມ່ຍິງລາວ ຊຶ່ງປາຖະກະຖາໂດຍອະດີດການນໍາຂອງສະຫະພັນແມ່ຍິງລາວ; ຈັດສໍາມະນາໃຫ້ຄວາມຮູ້ທາງດ້ານວິຊາການໃນຫຼາຍຫົວຂໍ້ເຊັ່ນ: ແມ່ຍິງກັບການຮັກສາສຸຂະພາບ (ການໃຫ້ຄວາມຮູ້ກ່ຽວກັບການປ້ອງກັນ ແລະ ປິ່ນປົວມະເຮັງເຕົ້ານົມ ແລະ ມະເຮັງປາກມົດລູກ), ແມ່ຍິງກັບວັດທະນະທຳ, ແມ່ຍິງກັບການກໍ່ຕັ້ງທຸລະກິດ, ແມ່ຍິງກັບສິ່ງແວດລ້ອມ ແລະ ການປົກປ້ອງແມ່ຍິງ ແລະ ໄວໜຸ່ມ. ພ້ອມທັງຮັບຟັງການໃຫ້ຄວາມຮູ້ກ່ຽວກັບການປົກປ້ອງສິດຊັບສິນທາງປັນຍາ ແລະ ຫົວຂໍ້ອື່ນໆ.
 |
ພ້ອມນັ້ນ, ຍັງມີກິດຈະກໍາຊົມການສະແດງສິລະປະ ແລະ ການເດີນແບບອາພອນເພດບັນດາເຜົ່າຂອງເຍົາວະຊົນ ຊຶ່ງມີຜູ້ເຂົ້າຮ່ວມມື້ລະ 200 ກວ່າທ່ານ ລວມ 3 ວັນມີຜູ້ເຂົ້າຮ່ວມທັງໝົດ 718 ກ່ວາທ່ານ; ເປີດຮັບບໍລິຈາກເລືອດເພື່ອຊ່ວຍເຫຼືອສັງຄົມ ກໍຄືຄົນເຈັບທີ່ຕ້ອງການເລືອດຢູ່ໂຮງໝໍຕ່າງໆໃນທົ່ວປະເທດພາຍໃຕ້ຄໍາຂັວນ:“ 70 ປີມີໄຊຮ່ວມໃຈໃຫ້ເລືອດຊ່ວຍຊີວິດ” ຊຶ່ງໄດ້ປຸກລະດົມສະມາຊິກສະຫະພັນແມ່ຍິງນະຄອນຫຼວງ, ກະຊວງ, ອົງການ, ບັນດາຫົວໜ່ວຍທຸລະກິດ ແລະ ມວນຊົນທົ່ວໄປ (ທັງຍິງ ແລະ ຊາຍ) ຊຶ່ງໃນໄລຍະ 3 ວັນຜ່ານມາ ມີຜູ້ມາຮ່ວມບໍລິຈາກເລືອດໄດ້ 108 ຖົງ; ຮັບບໍລິການກວດຕາບໍ່ເສຍຄ່າ ແລະ ໃຫ້ຄຳປຶກສາກໍລະນີທີ່ມີບັນຫາທາງສາຍຕາ ໂດຍທ່ານໝໍທີ່ມີຄວາມຊ່ຽວຊານໃນສະເພາະດ້ານ ມີຜູ້ເຂົ້າຮ່ວມ 892 ທ່ານ ຍິງ 762 ທ່ານ); ຈັດງານຕະຫຼາດນັດວາງສະແດງຜົນງານການເຄື່ອນໄຫວດ້ານຕ່າງໆຂອງສະຫະພັນແມ່ຍິງບັນດາກະຊວງ, ອົງການຈຳນວນ 13 ພາກສ່ວນ (44 ຮ້ານ). ພ້ອມທັງຮ້ານວາງສະແດງຜະລິດຕະພັນຂອງສະຫະພັນແມ່ຍິງແຂວງ ແລະ ນະຄອນຫຼວງ, ນັກທຸລະກິດຍິງ, ຜູ້ປະກອບການ, ຊາວຄ້າຂາຍເພດຍິງເພື່ອສົ່ງເສີມ ແລະ ສ້າງໂອກາດໃຫ້ເອື້ອຍນ້ອງແມ່ຍິງມາວາງຈໍາໜ່າຍຜະລິດຕະພັນທີ່ມີຄວາມໂດດເດັ່ນ ແລະ ເປັນເອກະລັກຂອງແຕ່ລະທ້ອງຖິ່ນລວມມີ 2,000 ກວ່າລາຍການເຊັ່ນ: ປະເພດສິນຄ້າຫັດຖະກໍາມີຜະລິດຕະພັນເຄື່ອງຈັກສານ, ຜ້າຝ້າຍ, ຜ້າໄໝ, ເສື້ອ, ສິ້ນ, ຜ້າບ່ຽງ-ຜ້າປູໂຕະ, ກະເປົາຜ້າ-ກະເປົາຫວາຍ, ເຄື່ອງໃຊ້ສອຍ, ຂອງທີ່ລະນຶກອື່ນໆ ລວມມີ 106 ຮ້ານ; ປະເພດອາຫານມີເຂົ້າຕົ້ມ, ເຂົ້າໜົມຫວານ, ຊີິ້ນແຫ້ງ, ປາແຫ້ງ, ເຄື່ອງດື່ມ ແລະ ຜັກສົດ-ໝາກໄມ້ສົດ ລວມມີ 31 ຮ້ານ ຊຶ່ງມີການປຸງແຕ່ງ ແລະ ແປຮູບຜະລິດຕະພັນແບບປະດິດສ້າງປະສົມປະສານຕາມຍຸກສະໄໝ ແຕ່ຍັງຄົງຮັກສາຄວາມເອກະລັກຂອງທ້ອງຖິ່ນ ສ້າງມູນຄ່າເພີ່ມກາຍເປັນສິນຄ້າທີ່ສາມາດຈຳໜ່າຍທັງພາຍໃນ ແລະ ສົ່ງອອກຕ່າງປະເທດນຳມາວາງສະແດງ, ຈໍາໜ່າຍໃນຄັ້ງນີ້ເພື່ອໃຫ້ມວນຊົນ, ແຂກຄົນທີ່ມາທ່ຽວຊົມໄດ້ຈັບຈ່າຍ-ຊື້ສິນຄ້າເພື່ອໃຊ້ສອຍ ແລະ ເປັນຂອງຝາກຂອງຕ້ອນຄອບຄົວ ແລະ ໝູ່ເພື່ອນໄດ້.
 |
ການຈັດງານໃນຄັ້ງນີ້, ນອກຈາກເປັນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 70 ປີແລ້ວ ອີກດ້ານໜຶ່ງເພື່ອກະກຽມຕ້ອນຮັບນັກທ່ອງທ່ຽວທີ່ຈະເຂົ້າມາທ່ອງທ່ຽວໃນເຂດທ່ອງທ່ຽວສີຂຽວຂອງ ສປປ ລາວ ນັບມື້ຫຼາຍຂຶ້ນ ແລະ ເປັນການປະກອບສ່ວນຢ່າງຕັ້ງໜ້າພັດທະນາເສດຖະກິດ-ສັງຄົມແຫ່ງຊາດຕາມທິດເສດຖະກິດເອກະລາດເປັນເຈົ້າຕົນເອງໃຫ້ນັບມື້ມີການເຕີບໃຫຍ່ເຂັ້ມແຂງ ແລະ ຂະຫຍາຍຕົວດີຂຶ້ນ. ຈາກນັ້ນ, ຄະນະປະທານ ແລະ ຜູ້ເຂົ້າຮ່ວມງານໄດ້ທ່ຽວຊົມຮ້ານວາງສະແດງ ແລະ ຈໍາໜ່າຍສິນຄ້າພາຍໃນງານຕື່ມອີກ. ງານຄັ້ງນີ້ໄດ້ດຳເນີນເປັນເວລາ 7 ວັນ ເລີ່ມແຕ່ວັນທີ 7-13 ກໍລະກົດ 2025.
ຂ່າວ-ພາບ: ວັນເພັງ
ຄໍາເຫັນ