ເປີດຕົວປຶ້ມການຂະຫຍາຍຕົວຂອງລັດລາວ

ໂດຍເປັນກຽດເຂົ້າຮ່ວມຂອງທ່ານ ພົງສະຫວັນ ສີສຸລາດ ຮອງລັດຖະມົນຕີກະຊວງການຕ່າງປະເທດ, ມີ ພະນັກງານພາຍໃນ ກະຊວງການຕ່າງປະເທດ, ຄະນະພົວພັນຕ່າງປະເທດ ແລະ ຄະນະສະໂມສອນ ນັກການທູດເຂົ້າຮ່ວມ.

ການເປີດຕົວປື້ມໃນຄັ້ງນີ້, ເພື່ອເປັນການປະກອບສ່ວນເຂົ້າໃນກິດຈະກຳສະເຫລີມສະຫຼອງ 3 ວັນປະຫວັດສາດຄື: ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ, ວັນຄົບຮອບວັນເກີດ 105 ປີ ຂອງ ທ່ານ ໄກສອນ ພົມວິຫານ ແລະ ວັນສ້າງຕັ້ງ ສປປ ລາວ ຄົບຮອບ 50 ປີ. ປຶ້ມ "ການຂະຫຍາຍຕົວຂອງລັດລາວ”ໄດ້ຈັດພິມ ຄັ້ງທໍາອິດໃນປີ 1996, ຄັ້ງທີ II ໃນປີ 2003 ແລະ ໄດ້ຮັບການແປເປັນພາສາອັງກິດ ໃນປີ 2015. ມາໃນປີ 2025, ທ່ານ ພົງສະຫວັດ ບຸນຜາ ກໍໄດ້ຕັ້ງໜ້າທຸ້ມເທເຮື່ອແຮງ ແລະ ສະຕິປັນຍາເຂົ້າໃນການຄົ້ນຄວ້າ ແລະ ປັບປຸງ ເນື້ອໃນປຶ້ມດັ່ງກ່າວໃຫ້ຄົບຖ້ວນສົມບູນຂຶ້ນກວ່າເກົ່າ ແລະ ໄດ້ຈັດພິມຄັ້ງ ທີ III ເພື່ອໃຫ້ປະຊາຊົນລາວບັນດາເຜົ່າ ແລະ ຊາວຕ່າງປະເທດ, ລວມທັງນັກວິຊາການ, ຜູ້ວາງນະໂຍບາຍ ໄດ້ສຶກສາຄົ້ນຄວ້າ ແລະ ມີຄວາມເຂົ້າໃຈອັນຖືກຕ້ອງ ກ່ຽວກັບ ປະຫວັດຄວາມເປັນມາ, ການເມືອງ, ກົດໝາຍ-ການປົກຄອງ, ການເຕີບໃຫຍ່ຂະຫຍາຍຕົວ, ການວິວັດທະນາການຂອງເຊື້ອຊາດລາວ-ລັດລາວ ແລະ ອື່ນໆ.

(ຂ່າວ-ພາບ: ວັນເພັງ)