ສະຫາຍ ຄຳພອນ ສຸວັນນະແສງ ຫົວໜ້າກົມຈັດຕັ້ງ-ພະນັກງານ(ຫສພ) ໄດ້ຂຶ້ນລາຍງານຫຍໍ້ກ່ຽວກັບການຝຶກອົບຮົມວຽກງານຈັດຕັ້ງ,ຈາກນັ້ນ ສະຫາຍ ວັນໄຊ ແພງຊຸມມາ ຮອງຫົວໜ້າຫ້ອງວ່າການສູນກາງພັກ ໄດ້ມີຄຳເຫັນວ່າ: ຊຸດຝຶກອົບຮົມໃນຄັ້ງນີ້, ເປັນຄັ້ງທໍາອິດ ຖືເປັນບາດກ້າວສໍາຄັນ ຊຶ່ງມັນສະແດງເຖິງຄວາມເອົາໃຈໃສ່ຂອງຄະນະພັກ, ຄະນະຫ້ອງວ່າການສູນກາງພັກ ທີ່ຖືສໍາຄັນຕໍ່ການກໍ່ສ້າງ, ບຳລຸງ, ຍົກລະດັບໃຫ້ພະນັກງານ-ລັດຖະກອນ, ການນຳຫຼັກແຫຼ່ງຂອງຫ້ອງວ່າການສູນກາງພັກ ໃຫ້ນັບມື້ມີຄວາມເຕີບໃຫຍ່ເຂັ້ມແຂງ ຊຶ່ງຜົນສໍາເລັດໃນການຝຶກອົບຮົມຄັ້ງນີ້ ເປັນພຽງຜົນສໍາເລັດໃນເບື້ອງຕົ້ນເທົ່ານັ້ນ, ສິ່ງສໍາຄັນແມ່ນການນຳເອົາບົດຮຽນ ແລະ ພຶດຕິກຳຕົວຈິງ ໂດຍສົມທົບກັບການແລກປ່ຽນບົດຮຽນໃນການຝຶກອົບຮົມ ໄປຄົ້ນຄວ້າ ແລະ ໝູນໃຊ້ເຂົ້າໃນການເຄື່ອນໄຫວຽກງານຕົວຈິງ. ພ້ອມນີ້, ທ່ານຍັງໄດ້ ເນັ້ນໃຫ້ສໍາມະນາກອນ ກໍຄື ບັນດາພະນັກງານ-ລັດຖະກອນ, ການນຳຫຼັກແຫຼ່ງຂອງກົມຈັດຕັ້ງ-ພະນັກງານ ຈົ່ງພ້ອມກັນສືບຕໍ່ຜັນຂະຫຍາຍເນື້ອໃນ ກໍຄື ບົດຮຽນໃນການຝຶກອົບຮົມຄັ້ງນີ້ ເຂົ້າໃນການຈັດຕັ້ງປະຕິບັດວຽກງານຕົວຈິງຂອງຕົນຢ່າງປະດິດສ້າງ ເພື່ອຍົກລະດັບການເປັນເສນາທິການໃຫ້ແກ່ຄະນະພັກ, ຄະນະຫ້ອງວ່າການສູນກາງພັກ ໃນການຄົ້ນຄວ້າກ່ຽວກັບວຽກງານກໍ່ສ້າງພັກ, ວຽກງານພະນັກງານ ແລະ ວຽກງານກົງຈັກການຈັດຕັ້ງ ໃຫ້ມີຄວາມຊັດເຈນ ແລະ ມີປະສິດທິຜົນສູງຂຶ້ນ, ສ້າງການຫັນປ່ຽນໃໝ່ ຢ່າງແຂງແຮງ ໃນການຈັດຕັ້ງນຳພາຂະບວນການແຂ່ງຂັນພັດທະນາຕົນເອງ ແລະ ຍົກສູງຄວາມອາດສາມາດໃນການນຳພາ-ຊີ້ນຳ, ການຈັດຕັ້ງປະຕິບັດວຽກງານ, ປຸກລະດົມພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນ ເປັນເຈົ້າການຈັດຕັ້ງຜັນຂະຫຍາຍວຽກງານຕາມຄວາມຮັບຜິດຊອບຂອງຕົນໃຫ້ສູງຂຶ້ນ ເພື່ອເປັນກຳລັງແຮງໃຫ້ແກ່ຄະນະພັກ, ຄະນະຫ້ອງວ່າການສູນກາງພັກ ໃນການຈັດຕັ້ງປະຕິບັດບັນດາຄາດໝາຍຂອງກອງປະຊຸມໃຫຍ່ອົງຄະນະພັກຫ້ອງວ່າການສູນກາງພັກ, ແຜນພັດທະນາຫ້ອງວ່າການສູນກາງພັກ ແລະ ແຜນພັດທະນາຂອງກົມຈັດຕັ້ງ-ພະນັກງານ ໃຫ້ກາຍເປັນຮູບປະທຳ ແລະ ບັນລຸຕາມຈຸດປະສົງຄາດໝາຍທີ່ວາງໄວ້.
ພ້ອມນີ້, ຄະນະຮັບຜິດຊອບ ກໍຄື ຄະນະກົມ, ພະແນກ, ກົມກອງທີ່ເປັນເສນາທິການຊ່ວຍວຽກຄະນະພັກ, ຄະນະຫ້ອງວ່າການສູນກາງພັກ ໃຫ້ສືບຕໍ່ເອົາໃຈໃສ່ວຽກງານສ້າງຄວາມເຂັ້ມແຂງທາງດ້ານການຈັດຕັ້ງ ແລະ ບຸກຄະລາກອນ ໂດຍສະເພາະແມ່ນພະນັກງານ-ລັດຖະກອນ ພາຍໃນກົມຈັດຕັ້ງ-ພະນັກງານ ສ້າງເງື່ອນໄຂໃຫ້ເຂົາເຈົ້າໄດ້ຮ່ຳຮຽນ, ແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳຕົວຈິງດ້ານການນຳພາ-ຄຸ້ມຄອງ, ການບໍລິຫານ ສືບຕໍ່ປະສານສົມທົບກັບພາກສ່ວນອື່ນໆໃຫ້ຫຼາຍຂຶ້ນກວ່າເກົ່າ ເພື່ອຍາດແຍ່ງເອົາບົດຮຽນ ເປັນການຍົກລະດັບຄວາມຮູ້, ຄວາມສາມາດຂອງບັນດາສະຫາຍ ສາມາດຕອບສະໜອງໄດ້ກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານໃນໄລຍະໃໝ່ ແນໃສ່ກໍ່ສ້າງພະນັກງານສືບທອດປ່ຽນແທນແຕ່ລະຂັ້ນ ໃຫ້ນັບມື້ເຂັ້ມແຂງ ແລະ ມີຄຸນນະພາບ, ຄຽງຄູ່ກັນນັ້ນ ໃຫ້ເອົາໃຈໃສ່ຕໍ່ການຄົ້ນຄວ້າ ແລະ ກຳນົດເປົ້າໝາຍໃນການເຂົ້າຮ່ວມຝຶກອົບຮົມແຕ່ລະຂັ້ນໃນຊຸດໜ້າຢ່າງແທດເໝາະ, ເພີ່ມທະວີຄວາມເປັນເຈົ້າການ ແລະ ຍົກສູງຄວາມຮັບຜິດຊອບຂອງຕົນ ໃນການສ້າງແຜນຝຶກອົບຮົມໃນຫົວຂໍ້ຕ່າງໆ ກໍຄື ແຜນບຳລຸງກໍ່ສ້າງ, ແຜນພັດທະນາບຸກຄະລາກອນພາຍໃນຫ້ອງວ່າການສູນກາງພັກ ໃຫ້ໄດ້ຮັບການຍົກລະດັບເປັນກ້າວໆ.
ຂ່າວ:ຫສພ
ຄໍາເຫັນ