![]() |
ໃນໄລຍະການຈັດງານຕະຫຼອດ 3 ມື້ນີ້, ມີຜູ້ເຂົ້າຮ່ວມ 12,000 ກວ່າຄົນ ທີ່ສວນປະຕູໄຊ ເພື່ອສະເຫຼີມສະຫຼອງມິດຕະພາບອັນແໜ້ນແຟ້ນລະຫວ່າງ ລາວ ແລະ ຍີ່ປຸນ. ຊຶ່ງຜູ້ເຂົ້າຮ່ວມງານໄດ້ສຳຜັດກັບບັນຍາກາດແຫ່ງການສະເຫຼີມສະຫຼອງ,ເພີດເພີນໄປກັບການສະແດງເທິງເວທີທີ່ໜ້າຕື່ນຕາຕື່ນໃຈ, ອາຫານ ທີ່ແຊບຊ້ອຍ, ການຮຽນຮູ້ວັດທະນະທຳ ແລະ ການເລືອກຊື້ສິນຄ້າ.
![]() |
Sabaidee JAPAN ແມ່ນງານບຸນວັດທະນະທຳທີ່ກ່ຽວກັບປະເທດຍີ່ປຸ່ນທີ່ໃຫຍ່ທີ່ສຸດໃນ ສປປ ລາວ. ໂດຍສືບຕໍ່ມາຈາກງານບຸນມະໂຫລານຍີ່ປຸ່ນ (Japan Festival) ທີ່ໄດ້ຈັດຂຶ້ນໃນຫຼາຍປີຜ່ານມາ, ງານ Sabaidee JAPAN ໄດ້ຮັບຊ່ວງຕໍ່ ແລະ ສານຕໍ່ຈຸດປະສົງງານດັ່ງກ່າວ. ງານບຸນໃນຄັ້ງນີ້ໄດ້ຈັດຂຶ້ນຢ່າງຍິ່ງໃຫຍ່ເພື່ອມອບໂອກາດທີ່ໜ້າຕື່ນເຕັ້ນຍິ່ງຂຶ້ນໃນການສຳຜັດກັບວັດທະນະທຳຍີ່ປຸ່ນ ແລະ ສົ່ງ ເສີມສາຍສຳພັນອັນດີລະຫວ່າງສອງປະເທດໃຫ້ແໜ້ນແຟ້ນຍິ່ງຂຶ້ນ.
![]() |
ງານບຸນໄດ້ເປີດສາກຢ່າງເປັນທາງການໃນວັນທີ 13 ພະຈິກ ດ້ວຍພິທີເປີດທີ່ມີການເຂົ້າຮ່ວມຈາກບັນດາແຂກຜູ້ມີກຽດຈາກລັດຖະບານລາວ ແລະ ສະມາຄົມມິດຕະພາບລາວ-ຍີ່ປຸ່ນ. ສິ່ງທີ່ສ້າງຄວາມປະທັບໃຈເປັນພິເສດໃນງານຄືທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດຍີ່ປຸ່ນປະຈຳ ສປປ ລາວ ທີ່ໄດ້ສ້າງຄວາມແປກໃຈໃຫ້ແກ່ຜູ້ຮ່ວມງານດ້ວຍການບັນເລງເພງຊາດລາວດ້ວຍການເປົ່າຂຸ່ຍຟລູດ (Flute).
ຕະຫຼອດໄລຍະການຈັດງານ, ເວທີຫຼັກໄດ້ນຳສະເໜີການສະແດງດົນຕີສົດທີ່ສຸດແສນຕື່ນເຕັ້ນຈາກສິນລະປິນຊື່ດັງທັງຈາກລາວ ແລະ ຍີ່ປຸ່ນລວມມີ BELLEZ, Jenny Bella, CLOZER, YAMASAKI Kenichi, TEE UDALAI, OLA BLACK EYES ແລະ Aluna ຊຶ່ງຕ່າງກໍໄດ້ສ້າງຄວາມປະທັບໃຈໃຫ້ແກ່ຜູ້ຊົມ. ນອກຈາກນີ້ກຸ່ມຄົນຮັກການແຕ່ງກາຍ Cosplay ກໍໄດ້ມີສ່ວນຮ່ວມສ້າງສີສັນໃຫ້ແກ່ງານ. ພ້ອມກັນນັ້ນຍັງມີການສະແດງຮ້ອງເພງອັນໂດດເດັ່ນຈາກຜູ້ເຂົ້າປະກວດໃນລາຍການແຂ່ງຂັນຮ້ອງເພງຄາຣາໂອເກະພາສາຍີ່ປຸ່ນ ຊຶ່ງໄດ້ສ້າງຄວາມຕື່ນເຕັ້ນ ແລະ ເພີ່ມພະລັງຄວາມຄຶກຄື້ນໃຫ້ແກ່ງານ. ພາຍໃນງານຍັງມີການສະແດງດົນຕີ, ການເຕັ້ນ ແລະ ສິລະປະວັດທະນະທຳອື່ນໆອີກດ້ວຍ.
![]() |
ນອກຈາກຫ້ອງອາຫານ ແລະ ເຄື່ອງດື່ມແລ້ວ, ຜູ້ມາຮ່ວມງານຍັງໄດ້ສຳຜັດກັບຫ້ອງຈັດສະແດງຈຳນວນຫຼາຍທີ່ແນະນຳວັດທະນະທຳ ແລະ ປະເພນີອັນເປັນເອກະລັກຂອງຍີ່ປຸ່ນ. ຜູ້ເຂົ້າຮ່ວມຫຼາຍຄົນໄດ້ມີໂອກາດຮຽນຮູ້ ແລະ ສຳຜັດກັບວັດທະນະທຳຍີ່ປຸ່ນໂດຍກົງຜ່ານກິດຈະກຳຕ່າງໆ ແລະ ນິທັດສະການ ຊຶ່ງຊ່ວຍສົ່ງເສີມຄວາມສົນໃຈໃນປະເທດຍີ່ປຸ່ນໃຫ້ຫຼາຍຂຶ້ນພ້ອມທັງຊ່ວຍຊຸກຍູ້ການແລກປ່ຽນວັດທະນະທຳເຊິ່ງກັນແລະກັນ.
ເນື່ອງໃນໂອກາດສະຫຼອງ ຄົບຮອບ 25 ປີ ຂອງ JAOL, ໄດ້ມີການຈັດກິດຈະກຳ “Super Stars Talk Session” ຂຶ້ນເພື່ອເປີດໂອກາດໃຫ້ຜູ້ຮ່ວມງານໄດ້ຮັບຟັງເລື່ອງລາວ ແລະ ປະສົບການອັນສ້າງແຮງບັນດານໃຈຈາກອະດີດນັກສຶກສາທີ່ເຄີຍໄປສຶກສາຢູ່ປະເທດຍີ່ປຸ່ນ ແລະ ປັດຈຸບັນກຳລັງມີບົດ ບາດສຳຄັນໃນຂະແໜງການຕ່າງໆຂອງລາວ.
ພາຍໃນງານຍັງມີການສະແດງເຕັ້ນ Yosakoi ອັນສຸດແສນຄຶກຄື້ນຈາກ “ທີມລາບ Team Laab” ລວມທັງການເປີດຕົວບົດເພງໃໝ່ຂອງທີມເປັນຄັ້ງທຳອິດ. Yosakoi ແມ່ນຮູບແບບການເຕັ້ນທີ່ມີຄວາມໂດດເດັ່ນຂອງຍີ່ປຸ່ນໂດຍປະສົມປະສານທ່າເຕັ້ນດັ້ງເດີມເຂົ້າກັບດົນຕີສະໄໝໃໝ່. ໃນແຕ່ລະມື້ຂອງງານໄດ້ປິດທ້າຍດ້ວຍການສະແດງອັນຍິ່ງໃຫຍ່ຈາກ TENGAKU ຜ່ານການບັນເລງດົນຕີດ້ວຍເຄື່ອງດົນຕີຍີ່ປຸ່ນດັ້ງເດີມ. ສ່ວນໃນມື້ສຸດທ້າຍຜູ້ຮ່ວມງານ, ນັກສະແດງ ແລະ ຄະນະຜູ້ຈັດງານໄດ້ຮ່ວມກັນສ້າງບັນຍາກາດອັນຄຶກຄື້ນດ້ວຍການຟ້ອນລຳວົງລາວ ແລະ ການເຕັ້ນ Bon Odori ຮູບແບບດັ້ງເດີມຂອງງານນີ້ ຊຶ່ງເປັນການປິດທ້າຍງານຢ່າງສົມບູນແບບເຕັມໄປດ້ວຍຄວາມສຸກ ແລະ ຄວາມປະທັບໃຈພ້ອມທັງສະທ້ອນໃຫ້ເຫັນເຖິງມິດຕະພາບອັນແໜ້ນແຟ້ນລະຫວ່າງລາວ ແລະ ຍີ່ປຸ່ນ.
(ແຫຼ່ງຂ່າວ: ສະຖານທູດຍີ່ປຸ່ນ)




ຄໍາເຫັນ