ພະແນກ ກປ ແຂວງອຸດົມໄຊ ເຜີຍແຜ່ເອກະສານສຳຄັນ ວຽກງານ ກປ

ໃນວັນທີ່ 26 ຕຸລານີ້ ທີ່ສະໂມສອນເມືອງໄຊ ແຂວງອຸດົມໄຊ ໄດ້ເປີດກອງປະຊຸມເຜີຍແຜ່ເອກະສານສຳຄັນກ່ຽວກັບວຽກງານກະສິກຳ ແລະປ່າໄມ້ແຂວງ, ໂດຍການເປັນປະທານຂອງທ່ານ ບຸນຊູ ຫຼວງພະສິດ ຄະນະພະແນກກະສິກຳ ແລະ ປ່າໄມ້ແຂວງ, ມີຫົວໜ້າຂະແໜງ, ຮອງຂະແໜງ, ມີພະນັກງານ ຈາກຫ້ອງການອ້ອມຂ້າງເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ. 
    ຈຸດປະສົງກໍເພື່ອເຜີຍແຜ່ຂໍ້ຕົກລົງຂອງທ່ານເຈົ້າແຂວງວ່າດ້ວຍການຄຸ້ມຄອງ ແລະ ນຳໃຊ້ຊົນລະປະທານຢູ່ແຂວງອຸດົມໄຊ ໂດຍມີຈຸດປະສົງກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ປົກປັກຮັກສາພັດທະນາ ແລະ ນຳໃຊ້ຊົນລະປະທານ ຢູ່ພາຍໃນແຂວງອຸດົມໄຊ ແນໃສ່ການສະໜອງນ້ຳໃຫ້ແກ່ການຜະລິດກະສິກຳ ເພື່ອເປັນການຄ້ຳປະກັນສະບຽງອາຫານ ແລະ ການສົ່ງເສີມການຜະລິດເປັນສິນຄ້າປະກອບສ່ວນເຂົ້າໃນການພັດທະນາເສດຖະກິດ-ສັງຄົມຢູ່ພາຍໃນແຂວງໃຫ້ຂະຫຍາຍຕົວຢ່າງຕໍ່ເນື່ອງ, ນອກນີ້ຍັງໄດ້ຜ່າມມະຕິຂອງກອງປະຊຸມສະພາປະຊາຊົນແຂວງອຸດົມໄຊ ກ່ຽວກັບການຮັບຮອງເອົາຂໍ້ຕົກລົງຂອງເຈົ້າແຂວງ ວ່າດ້ວຍການຄຸ້ມຄອງ ແລະ ນຳໃຊ້ທີ່ດິນກະສິກຳ ຢູ່ພາຍໃນແຂວງ, ເພື່ອຮັບປະກັນໃນການກຳນົດ, ຈັດສັນແບ່ງເຂດ ແລະ ແບ່ງຄວາມຮັບຜິດຊອບ ຂອງພາກສ່ວນທີ່ກ່ຽວຂ້ອງໃນການຄຸ້ມຄອງນໍາໃຊ້ຢ່າງລະອຽດ, ແນໃສ່ເຮັດໃຫ້ການປົກປັກຮັກສາ, ການຄຸ້ມຄອງ, ການພັດທະນາ ແລະ ການຫັນປ່ຽນປະເພດທີ່ດິນກະສິກຳ ໃຫ້ສອດຄ່ອງກັບ ກົດໝາຍ ແລະ ລະບຽບການ, ຮັບປະກັນໃຫ້ການນຳໃຊ້ທີ່ດິນກະສິກຳ ໄປຕາມທິດຍືນຍົງ-ສີຂຽວ, ປະກອບສ່ວນຢ່າງແຂງແຮງ ເຂົ້າໃນການ ປົກປັກຮັກສາ ແລະ ພັດທະນາແຂວງ ອຸດົມໄຊ ມີຄວາມເປັນລະບຽບຮຽບຮ້ອຍ ແລະ ຍຸທິທຳ. ໂອກາດດັ່ງກ່າວ ທ່ານປະທານ ກໍໄດ້ຮຽກຮ້ອງຜູ້ແທນເຂົ້າຮ່ວມຈາກຫ້ອງການຕ່າງໆ ຈົ່ງປະກອບຄວາມຄິດເຫັນເຂົ້າໃນວຽກງານຕ່າງໆໃຫ່ສອດຄ່ອງກັບສະພາບຕົວຈິງ. 
(ຂ່າວ-ພາບ: ແສງອາທິດ)