ພະແນກ ແຜນການ ແລະ ການລົງທຶນ ແຂວງໄຊຍະບູລີ ສະຫຼຸບວຽກງານ ປະຈໍາປີ 2023

 ກອງປະຊຸມ ວຽກງານແຜນການ ແລະ ການລົງທຶນ ປະຈໍາປີ 2023 ໄດ້ຈັດຂຶ້ນໃນວັນທີ 1 ກຸມພາ ນີ້ ທີ່ຫ້ອງປະຊຸມ ພະແນກ ສຶກສາທິການ ແລະ ກິລາແຂວງ ໄຊຍະບູລີ, ໂດຍການເປັນປະທານ ຂອງທ່ານ ຄໍາເຫຼັກ ແກ້ວວິໄລພອນ ຫົວໜ້າພະແນກ ແຜນການ ແລະ ການລົງທຶນແຂວງ, ເຂົ້າຮ່ວມເປັນກຽດມີ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ມີບັນດາຫົວໜ້າ, ຮອງຫົວໜ້າພະແນກການ, ກົມກອງອ້ອມຂ້າງແຂວງ, ມີເຈົ້າເມືອງ, ຮອງເຈົ້າເມືອງ ພ້ອມຫົວໜ້າຫ້ອງການ ແຜນການ ແລະ ການລົງທຶນ 11 ເມືອງ ແລະ ພະນັກງານວິຊາການພາຍໃນພະແນກແຜນການ ແລະ ການລົງທຶນແຂວງເຂົ້າຮ່ວມ
    ກອງປະຊຸມ ທ່ານ ຄໍາເຫຼັກ ແກ້ວວິໄລພອນ ໄດ້ຂຶ້ນກ່າວເປີດກອງປະຊຸມ ພ້ອມທັງໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານ ປະຈໍາປີ 2023 ແລະ ແຜນວຽກຈຸດສຸມປີ 2024 ຂອງຂະແໜງແຜນການ ແລະ ການລົງທຶນ ຊຶ່ງທ່ານໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກກນປະຕິບັດວຽກງານໃນໄລຍະ 1 ປີຜ່ານມາ ຊຶ່ງໄດ້ເອົາໃຈໃສ່ຕິດຕາມ, ສະຫຼຸບ, ສັງລວມ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນການລົງທຶນ ເປັນງວດ, 6 ເດືອນ ແລະ ໝົດປີ, ໄດ້ເປັນໃຈກາງປະສານສົມທົບກັບບັນດາພະແນກການ, ບັນດາເມືອງ ຄົ້ນຄວ້າບັນດາເອກະສານກ່ຽວກັບໂຄງການລົງທຶນຂອງລັດ ເປັນຕົ້ນການດັດແກ້ມູນຄ່າໂຄງການ, ການສະເໜີໂຄງການລົງທຶນຂອງລັດ ເພື່ອໃຫ້ການປະຕິບັດຖືກຕ້ອງຕາມລະບຽບການ, ໄດ້ສັງລວມບັນດາໂຄງການໜີ້ສິນ ເພື່ອສະເໜີຈ່າຍໜີ້ກັບທະນາຄານຕາມນະໂຍບາຍຂອງລັດຖະບານ ຊຶ່ງໄດ້ຮັບການອະນຸມັດຈຳນວນ 40 ໂຄງການ, ສາມາດອະນຸມັດຈ່າຍໜີ້ແລ້ວ 107,12 ຕື້ກີບ, ປະເມີນຜົນຄວາມຄືບໜ້າຂອງໂຄງການກໍ່ສ້າງສ້ອມ ແປງທັງໝົດ 35 ໂຄງການ; ກວດກາເອກະສານ ແລະ ອອກໃບຢັ້ງຢືນສັນຍາໂຄງການກໍ່ສ້າງ ແລະ ສ້ອມແປງຈຳນວນ 50 ໂຄງການ; ສ້າງເອກະສານໃບຢັ້ງຢືນຜົນການປະເມີນຈຳນວນ 85 ໂຄງການ; ໄດ້ອະນຸມັດການລົົງທຶນໃນກິດຈະການສຳປະທານ ແລະ ກິດຈະການຄວບຄຸມໄດ້ທັງໝົດ 19 ໂຄງການ, ມູນຄ່າ 1.197 ຕື້ກີບ, ໃນນີ້: ເປັນກິດຈະການສໍາປະທານທີ່ດິນລັດ ຈໍານວນ 16 ໂຄງການ, ມູນຄ່າ 1.121 ຕື້ກີບ, ກິດຈະການຄວບຄຸມ 3 ໂຄງການມູນຄ່າ 76 ຕື້ກີບ, ຂັ້ນສູນກາງອະນຸມັດ 4 ໂຄງການ ມູນຄ່າ 210 ຕື້ກີບ, ຂັ້ນແຂວງອະນຸມັດ 15 ໂຄງການ ມູນຄ່າ 986 ຕື້ກີບ ແລະ ຕ່າງປະເທດ 4 ໂຄງການ, ມູນຄ່າ 152 ຕື້ກີບ, ນອກນີ້ຍັງໄດ້ຮັບໂຄງການຊ່ວຍເຫຼືອທາງການ ເພື່ອການພັດທະນາທີ່ກໍາລັງຈັດຕັ້ງປະຕິບັດທັງໝົດ 54 ໂຄງການ ມູນຄ່າທັງໝົດ 30,80 ລ້ານໂດລາ, ໃນນັ້ນທຶນກູ້ຢືມ 10 ໂຄງການ ມູນຄ່າ 16,65 ລ້ານໂດລາ, ທຶນຊ່ວຍເຫຼືອລ້າ 44 ໂຄງການ ມູນຄ່າ 11,71 ລ້ານໂດລາ ແລະ ລັດສົມທົບ 2,43 ລ້ານໂດລາ, ກອງປະຊຸມໄດ້ຮັບຟັງການເຜີຍແຜ່ບົດແນະນໍາຂອງກະຊວງແຜນການ ແລະ ການລົງທຶນ ກ່ຽວກັບການສ້າງແຜນພັດທະນາເສດຖະກິດ-ສັງຄົມ ແລະ ແຜນການຄຸ້ມຄອງການລົງທຶນປີ 2024, ຄຳແນະນໍາກ່ຽວກັບການສ້າງແຜນພັດທະນາເສດຖະກິດ-ສັງຄົມໄລຍະ 5 ປີຕໍ່ໜ້າສຳລັບພະແນກການຂັ້ນແຂວງ ແລະ ຂັ້ນເມືອງ, ຮັບຟັງການປະກອບຄຳເຫັນ ຈາກພະແນກການອ້ອມຂ້າງແຂວງ ແລະ ບັນດາເມືອງຈໍານວນຫນຶ່ງ                   ຂ່າວ-ພາບ: ອຸ່ນເຮືອນ ໂພທິລັກ