ພະແນກຕຳຫຼວດຈະລາຈອນ ນວມີຄວາມພ້ອມໃຫ້ຄວາມສະດວກມວນຊົນເຂົ້າມາທ່ຽວຊົມງານບຸນຊ່ວງເຮືອທີ່ທ່າວັດຈັນ

ກອງປະຊຸມຜ່ານແຜນປ້ອງກັນງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ໄດ້ຈັດຂຶ້ນໃນວັນທີ 23 ຕຸລາຜ່ານມາ ທີ່ພະແນກຕໍາຫຼວດຈະລາຈອນ ກອງບັນຊາການ ກະຊວງປ້ອງກັນຄວາມສະຫງົບ(ປກສ) ນະຄອນຫຼວງວຽງຈັນ (ນວ). ໂດຍການເປັນປະທານຂອງທ່ານ ພັອ ອຸບົນ ຈຸນລະມະນີ ຮອງຫົວໜ້າກອງບັນຊາການ ຫົວໜ້າຫ້ອງຕໍາຫຼວດ ປກສ ນະຄອນຫຼວງວຽງຈັນ; ມີຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ພ້ອມດ້ວຍອ້າຍນ້ອງຕໍາຫຼວດເຂົ້າຮ່ວມ.
ບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ຢູ່ນະຄອນຫຼວງວຽງຈັນປີນີ້ ຈະຈັດຂຶ້ນໃນລະຫວ່າງວັນທີ 27-30 ຕຸລາ 2023 ແລະ ຄາດວ່າຈະມີມວນຊົນຫຼັ່ງໄຫຼກັນເຂົ້າມາທ່ຽວຊົມງານດັ່ງກ່າວເປັນຈໍານວນຫຼາຍ ແລະ ອາດຈະພາໃຫ້ເກີດບັນຫາລົດຕິດ ຢູ່ຕາມເສັ້ນທາງເຂົ້າ-ອອກຕ່າງໆ; ສະນັ້ນ, ເພື່ອຮັບມືກັບບັນຫາທີ່ຈະເກີດຂຶ້ນ ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ຈຶ່ງວາງກໍາລັງລົງປ້ອງກັນ, ຈັດລະບຽບ ແລະ ລະບາຍການສັນຈອນຈຳນວນຫຼາຍຮ້ອຍທ່ານ.
ທ່ານ ພັອ ອຸບົນ ຈຸນລະມະນີ ໄດ້ເນັ້ນໃຫ້ກໍາລັງຕໍາຫຼວດຈະລາຈອນ ນວ ທີ່ຈະລົງປະຕິບັດໜ້າທີ່ ຕ້ອງເອົາໃຈໃສ່ຢ່າງເຂັ້ມງວດ ໃນການເຮັດໜ້າທີ່ປ້ອງກັນ, ທີ່ສໍາຄັນຕ້ອງເອົາໃຈໃສ່ຢ່າງຈິງຈັງ ໃນການລະບາຍການສັນຈອນຢູ່ຕາມເສັ້ນທາງຫຼັກ ຫຼື ເສັ້ນທາງຕ່າງໆທີ່ມວນຊົນຈະນໍາໃຊ້ໃນການເຂົ້າ-ອອກງານບຸນ ຕິດພັນກັບການຈັດສັນລະບຽບຕາມເສັ້ນທາງ ແລະ ຈັດສັນສະຖານທີ່ຈອດລົດ ໃຫ້ແທດເໝາະກັບສະພາບຄວາມເປັນຈິງ.ເພື່ອເຮັດໃຫ້ສະພາບການສັນຈອນໃນຊ່ວງງານບຸນດັ່ງກ່າວ ມີຄວາມສະດວກ-ສະບາຍ, ຮັບປະກັນບໍ່ໃຫ້ມີລົດຕິດອັ່ງອໍຫຼາຍຊົ່ວໂມງ, ພະແນກຕໍາຫຼວດຈະລາຈອນ ນະຄອນຫຼວງວຽງຈັນ ຈະສຸມກໍາລັງລົງປະຕິບັດໜ້າທີ່ ເລີ່ມແຕ່ວັນທີ 27-30 ຕຸລານີ້ ຢູ່ຕາມຈຸດສັບສົນ 3 ແຍກ, 4 ແຍກ, ຕາມສາຍທາງຫຼັກທີ່ມວນຊົນຈະໃຊ້ເຂົ້າມາທ່ຽວຊົມພາຍໃນງານ ເພື່ອອໍານວຍຄວາມສະດວກຮອບດ້ານໃຫ້ແກ່ຜູ້ໃຊ້ລົດ-ໃຊ້ຖະໜົນ; ກຳລັງຕໍາຫຼວດຈະລາຈອນ ຈະລົງປ້ອງກັນ ແລະ ປະຈໍາຢູ່ທັງໝົດ 78 ຈຸດ. ໃນນີ້, ວົງໃນ 31 ຈຸດ ແລະ ວົງນອກ 41 ຈຸດ, ຈຸປະຈໍາຄອຍເຫດ 4 ຈຸ ແລະ ຈຸໂຄສະນາ 2 ຈຸ ລວມຈໍານວນຫຼາຍຮ້ອຍສະຫາຍ.ນອກຈາກນີ້, ຕ້ອງເອົາໃຈໃສ່ໃນການເຮັດໜ້າທີ່ ໂຄສະນາເຜີຍແຜ່ລະບຽບການສັນຈອນ ໃຫ້ບັນດາມວນຊົນທີ່ນໍາໃຊ້ລົດ-ໃຊ້ຖະໜົນມາທ່ຽວງານດັ່ງກ່າວ ຮັບຮູ້ ແລະ ເຂົ້າໃຈເຖິງໄພອັນຕະລາຍໃນການເກີດອຸບັດເຫດ, ແນໃສ່ເຮັດໃຫ້ບັນຫາການເກີດອຸບັດເຫດ ໃນໄລຍະງານບຸນອອກພັນສາປະວໍລະນາ ແລະ ບຸນຊ່ວງເຮືອທ່າວັດຈັນ ຫຼຸດໜ້ອຍຖອຍລົງ.
ຂ່າວ-ພາບ: ຍຸພິນທອງ