ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ (ນວ) ສົມທົບກັບຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ ເມືອງໄຊເສດຖາ, ສະຫະພັນແມ່ຍິງ ນວ ໄດ້ມາຈັດກິດຈະກຳໂຄສະນາປູກຈິດສໍານຶກໃນງານບຸນພະທາດຫຼວງປະຈຳປີ 2024 ເປັນເວລາ 4 ວັນ ນັບແຕ່ວັນທີ 11, 12, 13, 14 ພະຈິກ 2024 ນີ້.
ທ່ານ ບຸນຊົມ ຊົງວິໄລ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມນວ ໄດ້ໃຫ້ສຳພາດ ຕໍ່ນັກຂ່າວໜັງສືພິມປະຊາຊົນໃນວັນທີ 11 ພະຈິກຜ່ານມາວ່າ: ການຈັດກິດຈະກຳໃນຄັ້ງນີ້ ເພື່ອເປັນການເຜີຍແຜ່, ປູກຈິດສໍານຶກໃຫ້ຜູ້ທີ່ເຂົ້າມາທ່ຽວຊົມງານບຸນໄດ້ຮັບຮູ້, ມີຄວາມເຂົ້າໃຈ ແລະ ມີສ່ວນຮ່ວມປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ໂດຍສະເພາະປຸກລະດົມໃຫ້ທຸກຄົນທີ່ມາທ່ຽວງານບຸນໃຫ້ມີສ່ວນຮ່ວມເປັນເຈົ້າການໃນການປົກປັກຮັກສິ່ງແວດລ້ອມ, ນໍ້າ, ດິນ ແລະ ຮັກສາຄວາມສະອາດພາຍໃນງານບຸນໃຫ້ມີຄວາມສະອາດຈົບງາມ ຊຶ່ງການຈັດກິດຈະກຳໃນຄັ້ງນີ້ດ້ວຍຮູບແບບດັ່ງນີ້:1. ເຜີຍແຜ່ບັນດານິຕິກຳກ່ຽວກັບຊັບພະຍາກອນທຳມະຊາດ ແລະ ສິ່ງແວດລ້ອມເຊັ່ນ:ກົດໝາຍວ່າດ້ວຍການປົກປັກຮັກສາສິ່ງແວດລ້ອມ ເລກທີ 29/ສພຊ, ລົງວັນທີ 18 ທັນວາ 2012;ກົດໝາຍນໍ້າ ແລະ ຊັບພະຍາກອນແຫຼ່ງນໍ້າ ເລກທີ 23/ສພຊ, ລົງວັນທີ 11 ພຶດສະພາ 2017;ກົດໝາຍວ່າດ້ວຍທີ່ດິນ ເລກທີ 70/ສພຊ, ລົງວັນທີ 21 ມິຖຸນາ 2019;ນິຕິກຳລຸ່ມກົດໝາຍທີ່ກ່ຽວຂ້ອງຊັບພະຍາກອນທຳມະຊາດ ແລະ ສິ່ງແວດລ້ອມຈຳນວນໜຶ່ງ;2. ເຜີຍແຜ່ວຽກງານປົກປັກຮັກສາສິ່ງແວດລ້ອມ, ການກຳຈັດຂີ້ເຫຍື້ອດ້ວຍຫຼັກການ 3 R, ເຮັດປ້າຍຈຸດຖິ້ມຂີ້ເຫຍື້ອລົງຖັງໃຫ້ຖືກຈຸດ;3. ເຜີຍແຜ່ວຽກງານການຄຸ້ມຄອງຊັບພະຍາກອນນໍ້າ;4. ເຜີຍແຜ່ບົດບາດຍິງ-ຊາຍຕໍ່ວຽກງານປົກປັກຮັກສາສິ່ງແວດລ້ອມ;5. ເຜີຍແຜ່ຂໍ້ມູນຂ່າວສານວຽກງານການປ່ຽນແປງດິນຟ້າອາກາດ;6. ຕັ້ງຮ້ານວາງສະແດງການເຄື່ອນໄຫວວຽກງານຂອງພະແນກຊັບພະຍາກອນທຳມະຊາດ ແລະ ສິ່ງແວດລ້ອມນະຄອນຫຼວງວຽງຈັນ;7. ສາຍວິດີໂອ ແລະ ຮູບພາບໂຄສະນາລະຄອນຫຸ່ນໃນການຫຼຸດຜ່ອນການນໍາໃຊ້ຖົງຢາງພຣາສຕິກ ແລະ ຮູບພາບການເຄື່ອນໄຫວວຽກງານຊັບພະຍາກອນທຳມະຊາດ ແລະ ສິ່ງແວດລ້ອມນວ ໃນໄລຍະຜ່ານມາຜ່ານຈໍ LCD;8. ສ້າງຈິດສໍານຶກການຫຼຸດຜ່ອນການນໍາໃຊ້ຖົງຢາງພຣາສຕິກ ແລະ ກ່ອງໂຟມ;9. ຈັດກິດຈະກຳຖາມ-ຕອບຄວາມຮູ້ກ່ຽວກັບວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ແຈກຢາຍຂອງລາງວັນ.
ໂອກາດນີ້, ທ່ານໄດ້ຮຽກຮ້ອງໃຫ້ແມ່ຄ້າ, ຊາວຄ້າຂາຍ, ຕະຫຼອດຮອດຜູ້ທີ່ເຂົ້າຮ່ວມງານບຸນຈົ່ງມີສ່ວນຮ່ວມເປັນເຈົ້າການປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມໃຫ້ມີຄວາມຍືນຍົງ ເວົ້າລວມ, ເວົ້າສະເພາະໃຫ້ທຸກທ່ານມີສ່ວນຮ່ວມຮັກສາຄວາມສະອາດ, ຄວາມເປັນລະບຽບຮຽບຮ້ອຍໃນງານບຸນພະທາດຫຼວງ.
ຂ່າວ-ພາບ: ພູວັນ
ຄໍາເຫັນ