ພາຍໃຕ້ການນໍາພາຂອງພັກ ສື່ມວນຊົນລາວເຕີບໃຫຍ່ ເຂັ້ມແຂງ ຢ່າງບໍ່ຢຸດຢັ້ງ

ໃນໂອກາດກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I ທີ່ຈັດຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ. ສະຫາຍ ຄຳພັນ ເຜີຍຍະວົງ ກຳມະການກົມການເມືອງສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ຮອງປະທານສະພາທິດສະດີສູນກາງພັກ ໄດ້ໃຫ້ຮູ້ວ່າ: ສື່ມວນຊົນລາວ ກຳເນີດທ່າມກາງແປວໄຟປະຕິວັດຕິດພັນກັບຢາດເຫື່ອ, ເລືອດເນື້ອ ແລະ ແປວໄຟແຫ່ງການຕໍ່ສູ້ກູ້ຊາດຂອງປະຊາຊົນລາວບັນດາເຜົ່າ, ພາຍໃຕ້ການນໍາພາຂອງພັກ, ວັນທີ 13 ສິງຫາ 1950 ທ່າມກາງຄວັນປືນ ແລະ ສົງຄາມປົດປ່ອຍຊາດ, ກອງປະຊຸມໃຫຍ່ຜູ້ແທນທົ່ວປະເທດໄດ້ຕົກລົງສ້າງຕັ້ງແນວລາວອິດສະຫຼະ ແລະ ລັດຖະບານລາວຕໍ່ຕ້ານ, ໃນວັນປະຫວັດສາດອັນສະຫງ່າລາສີນີ້, ໜັງສືພິມປະຕິວັດສະບັບທຳອິດໄດ້ເກີດຂຶ້ນພາຍໃຕ້ຊື່ “ໜັງສືພິມລາວອິດສະຫຼະ” ແລະ ໂຮງພິມລາວອິດສະຫຼະ ໄດ້ກຳເນີດຂຶ້ນຢ່າງເປັນທາງການ, ນີ້ຄືຈຸດເລີ່ມຕົ້ນຂອງວັນສື່ມວນຊົນ ແລະ ການພິມຈຳໜ່າຍລາວ, ໂຮງພິມໃນຍຸກບຸກເບີກ ບໍ່ມີເຄື່ອງຈັກທັນສະໄໝ, ມີພຽງແຕ່ຄວາມຮັກຊາດອັນແຮງກ້າ ແລະ ສະຕິປັນຍາອັນສຽມແຫຼມ ໃນການປະຕິບັດບົດບາດເປັນກະບອກສຽງໃຫ້ແກ່ພັກ. ທ່າມກາງການຕໍ່ສູ້ປົດປ່ອຍຊາດ, ສື່ມວນຊົນລາວໄດ້ກາຍເປັນອາວຸດທາງດ້ານແນວຄິດ ທີ່ຊ່ວຍປຸກລະດົມຈິດໃຈຮັກຊາດ, ສ້າງຄວາມສາມັກຄີ ເພື່ອພັດທະນາສ້າງສາປະເທດຊາດ. ສື່ມວນຊົນລາວ ໄດ້ປະຕິບັດບົດບາດສໍາຄັນໃນຖານະ “ເປັນຂົວຕໍ່” ລະຫວ່າງ ພັກ, ລັດ ແລະ ສັງຄົມ. ບໍ່ພຽງແຕ່ນໍາເອົາແນວຄິດ, ແນວທາງ ແລະ ນະໂຍບາຍຂອງພັກ-ລັດ ໄປສູ່ປະຊາຊົນເທົ່ານັ້ນ ແຕ່ສື່ມວນຊົນຍັງເປັນພື້ນທີ່ສ່ອງແສງ ແລະ ແລກປ່ຽນຄວາມຄິດຄວາມເຫັນ ແລະ ຄວາມມຸ້ງຫວັງຂອງປະຊາຊົນ ເພື່ອໃຫ້ການພັດທະນາຊາດກ້າວໄປຢ່າງບໍ່ຢຸດຢັ້ງ ແລະ ທັນກັບການປ່ຽນແປງໃນແຕ່ລະໄລຍະ. ສື່ມວນຊົນເປັນກະບອກສຽງອັນແຫຼມຄົມໃຫ້ພັກ ແລະ ລັດ, ເປັນກຳລັງແຮງສໍາຄັນທີ່ສຸດ ໃນການຂັບເຄື່ອນວຽກງານການເມືອງ-ແນວຄິດ, ວັດທະນະທຳ, ເປັນເວທີແລກປ່ຽນຄວາມຄິດເຫັນຂອງມະຫາຊົນ ແລະ ເຄື່ອງມືໃນການສຶກສາອົບຮົມແນວຄິດຮັກຊາດ, ຮັກລະບອບໃໝ່ ແລະ ອຸດົມການຂອງພັກ ແລະ ລັດ ໃນແຕ່ລະໄລຍະປະຫວັດສາດ.

ປີ 1975 ສື່ມວນຊົນລາວ ໄດ້ກ້າວເຂົ້າສູ່ຍຸກໃໝ່ຍຸກແຫ່ງການຟື້ນຟູ ແລະ ພັດທະນາປະເທດ, ສື່ມວນຊົນ ມີບົດບາດສໍາຄັນໃນການຖ່າຍທອດຄວາມຮູ້, ການສ່ອງແສງຄວາມຈິງ ແລະ ສ້າງແຮງບັນດານໃຈໃຫ້ສັງຄົມ. ມາຮອດປີ 1993 ກົມການເມືອງສູນກາງພັກ ໄດ້ອອກມະຕິເລກທີ 36/ກມສພ, ລົງວັນທີ 19 ມິຖຸນາ 1993 ວ່າດ້ວຍການເພີ່ມທະວີການນໍາພາຂອງພັກ ແລະ ການຄຸ້ມຄອງຂອງລັດຕໍ່ສື່ມວນຊົນໃນໄລຍະໃໝ່ ເປັນເຂັມທິດຊີ້ບອກທາງໃຫ້ສື່ມວນຊົນຢຶດຖືເປັນອຸດົມການໃນການປະຕິບັດໜ້າທີ່ອັນສົມກຽດຂອງຕົນ ແລະ ຍາດໄດ້ຜົນສໍາເລັດເປັນກ້າວໆມາ.

ກ້າວເຂົ້າສູ່ຍຸກຂອງດີຈີຕອນ, ສື່ມວນຊົນລາວ ໄດ້ເຮັດໜ້າທີ່ເປັນກອງໜ້າບຸກທະລຸ, ເປັນຂົວຕໍ່ອັນສັກສິດທີ່ບໍ່ສາມາດຕັດແຍກລະຫວ່າງພັກກັບປະຊາຊົນ, ຖັນແຖວສື່ມວນຊົນໄດ້ປ່ຽນຢາດເຫື່ອ ແລະ ສະຕິປັນຍາ ໃຫ້ກາຍເປັນກະບອກສຽງອັນຊົງພະລັງປຸກລະດົມຈິດໃຈຮັກຊາດ ແລະ ຄວາມສາມັກຄີທົ່ວປວງຊົນລາວທັງຊາດ. ຜົນງານອັນຍິ່ງໃຫຍ່ໄດ້ຈາລຶກໄວ້ໃນ 4 ເສົາຄໍ້າແຫ່ງ ຜົນສໍາເລັດ:

1. ເປັນກອງໜ້າແນວຄິດສະໜາມຮົບໄຊເບີ, ນໍາພາຫາງສຽງສັງຄົມຢ່າງມີໄຊ ຕີຖອຍຖ້ອຍທຳນອງບິດເບືອນ, ຕອບໂຕ້ຂໍ້ມູນຂ່າວສານຂອງອິດທິກຳລັງປໍລະປັກຢ່າງວ່ອງໄວ, ທັນການ ແລະ ເດັດຂາດ;