ພ.ບ ສ້າງຄວາມເຂັ້ມແຂງໃຫ້ບັນດາລັດວິສາຫະກິດອ້ອມຂ້າງກະຊວງ

ໃນປີ 2023 ຜ່ານມາ,ບໍລິສັດ ໄຟຟ້າລາວ(ຟຟລ) ໄດ້ສຸມໃສ່ປະຕິບັດ 4 ມາດຕະການແກ້ໄຂໜີ້ສິນ ກໍຄືການປະຕິຮູບການດໍາເນີນທຸລະກິດ ໃຫ້ມີປະສິດທິຜົນ ໂດຍສູ້ຊົນຈັດຕັ້ງປະຕິບັດແຜນງານຕ່າງໆ ໃຫ້ເປັນຮູບປະທໍາຕາມການຮັບຮອງຂອງ ລັດຖະບານ, ສາມາດປັບປຸງໂຄງສ້າງບໍລິຫານອົງກອນ ແລະ ຈັດສັນແຜນງົບປະມານການບໍລິຫານ ຄຸ້ມຄອງຂອງ ຟຟລ ຄືນໃໝ່. ປັບປຸງໂຄງສ້າງລາຄາໄຟຟ້າພາກຈໍາໜ່າຍ ໃຫ້ສົມຄູ່ກັບຕົ້ນທຶນ. ເຈລະຈາປັບປຸງ ສັນຍາຊື້-ຂາຍໄຟກັບບັນດາ IPP ແລະ SPP. ສໍາເລັດ ການເຈລະຈາປັບໂຄງສ້າງໜີ້ກັບທະນາຄານ ແລະ ສະຖາບັນການເງິນ. 
   ຜ່ານການປະຕິບັດມາດຕະການແກ້ໄຂໜີ້ສິນໄລຍະຜ່ານມາ ເຖິງວ່າໄດ້ຮັບໝາກຜົນໃນລະດັບໜຶ່ງ, ແຕ່ສິ່ງທ້າທາຍທີ່ເກີດຂຶ້ນໃນແຕ່ລະປີ ແມ່ນສົ່ງຜົນກະທົບໂດຍກົງຕໍ່ການດໍາເນີນທຸລະກິດ ຂອງ ຟຟລ, ເຖິງ ແນວໃດກໍ່ຕາມ, ເພື່ອສືບຕໍ່ແກ້ໄຂບັນຫາຮອບດ້ານ ລັດຖະບານ ໄດ້ແຕ່ງຕັ້ງ ຄະນະປະຕິຮູບ ແລະ ຮັບຮອງ ແຜນປະຕິຮູບ ຟຟລ, ຊຶ່ງປະກອບດ້ວຍ 7 ກຸ່ມວຽກ, 26 ແຜນງານໃຫຍ່ ແລະ ອີກຫຼາຍກິດຈະກໍາຍ່ອຍ ເພື່ອແກ້ໄຂບັນຫາຂອງ ຟຟລ ກໍ່ຄືມະຫາພາກ ເພື່ອສ້າງຄວາມຍືນຍົງ ແລະ ຄວາມໝັ້ນຄົງທາງດ້ານພະລັງງານ ຂອງປະເທດ; ຊຸກຍູ້ ໃຫ້ລັດວິສາຫະກິດຖືຮຸ້ນລາວ ໃຫ້ໄດ້ເຂົ້າຖືຮຸ້ນເຂື່ອນຂະໜາດໃຫຍ່ຊຶ່ງປັດຈຸບັນ,ຢູ່ໃນຂັ້ນຕອນການຄົ້ນຄວ້າຄວາມເປັນໄປໄດ້ເຖິງປະສິດທິຜົນທາງດ້ານເສດຖະກິດຂອງໂຄງການ ແລະ ຄາດວ່າຈະມີການເຈລະຈາຖືຮຸ້ນໃນຕໍ່ໜ້າ. 
ຊຸກຍູ້ ໃຫ້ ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າ ໄດ້ມີທຸລະກິດຫຼາກຫຼາຍຮູບແບບເປັນຂອງຕົນເອງ ເພື່ອສ້າງຄວາມເຂັ້ມແຂງໃຫ້ແກ່ອົງກອນ ເປັນຕົ້ນແມ່ນ ການກໍ່ສ້າງສາຍສົ່ງ, ການຜະລິດເສົາເບຕົງ ແລະ ການຮ່ວມຮຸ້ນຂອງລັດວິສາຫະກິດຝຸ່ນຊີວະພາບ ເຂົ້າມາເປັນສ່ວນໜຶ່ງຂອງທຸລະກິດດັ່ງກ່າວ. ໄດ້ຊຸກຍູ້ ໃຫ້ລັດວິສາຫະກິດພັດທະນາແຮ່ທາດລາວ ຮ່ວມມືກັບບັນດາບໍລິສັດໃນການພັດທະນາໂຄງການບໍ່ແຮ່ ຊຶ່ງປັດຈຸບັນ,ໄດ້ມີໂຄງການຮ່ວມມືຈໍານວນ 19 ບໍລິສັດ (ບາງບໍລິສັດມີຫຼາຍເຂດມີຫຼາຍໂຄງການ) ມີ 31 ເຂດ ເນື້ອທີ່ທັງໝົດ 6.355,31 ກມ ແລະ ໄດ້ແບ່ງອອກເປັນ 4 ກຸ່ມໃຫຍ່. ຊຸກຍູ້ ໃຫ້ ບໍລິສັດຜະລິດໄຟຟ້າລາວມະຫາຊົນ ໄດ້ພັດທະນາແຫຼ່ງຜະລິດພະລັງງານໄຟຟ້າໄດ້ຫຼາຍຮູບແບບທີ່ເປັນມິດຕໍ່ສິ່ງແວດລ້ອມ ເປັນຕົ້ນແມ່ນ ພະລັງງານນໍ້າ, ແສງຕາເວັນ, ພະລັງງານລົມ ແລະ ອື່ນໆ. 
(ຂ່າວ:ຕະວິນຍານ)