ເພີ່ມທະວີບົດບາດການນໍາພາຂອງພັກ ພັດທະນາສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ

ທ່ານ ຄຳພັນ ເຜີຍຍະວົງ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ (ຄອສພ) ຮອງປະທານສະພາທິດສະດີສູນກາງພັກ ໄດ້ຜ່ານບົດສະຫຼຸບຕີລາ ຄາ ສະພາບການຈັດຕັ້ງປະຕິບັດວຽກງານສື່ມວນຊົນໃນໄລຍະຜ່ານມາ ແລະ ທິດທາງຮອດປີ 2030 ຕໍ່ກອງປະ ຊຸມວຽກງານສື່ມວນຊົນທົ່ວປະເທດຄັ້ງທີ I ໃນວັນທີ 14 ກໍລະກົດນີ້, ທີ່ຫໍປະຊຸມແຫ່ງຊາດ ຊຶ່ງທ່ານໄດ້ຍົກໃຫ້ເຫັນທິດທາງພັດທະນາສື່ມວນຊົນລາວໄປສູ່ຄຸນນະພາບໃໝ່. ເພື່ອສືບຕໍ່ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ ປະຊາຊົນປະຕິວັດລາວ ແລະ ເພື່ອຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ຄອສພ ຕາມທິດ "ຕັ້ງໜ້າສ້າງການຫັນປ່ຽນໃນວຽກງານໂຄສະນາອົບຮົມໄປສູ່ຄຸນນະພາບໃໝ່ຢ່າງແຂງແຮງ", ໜຶ່ງໃນວຽກງານສໍາຄັນຂອງໂຄສະນາອົບຮົມແມ່ນການປັບປຸງວຽກງານສື່ມວນຊົນ, ສ້າງຄວາມເຂັ້ມງວດໃນການຄຸ້ມຄອງບັນຊາສື່ມວນຊົນ, ພັດທະນາຖັນແຖວສື່ມວນຊົນໃຫ້ຕອບສະໜອງກັບເງື່ອນໄຂໃໝ່, ສ້າງການຫັນປ່ຽນໃນການຄຸ້ມຄອງນໍາໃຊ້ພາຫະນະ, ອຸປະກອນສື່ໃຫ້ກຸ້ມຄ່າ ແລະ ເກີດປະໂຫຍດສູງສຸດ ບົນຈິດ ໃຈປະຕິບັດນະໂຍບາຍປະຢັດຢ່າງມີປະສິດທິຜົນ. ໃນຊຸມປີຕໍ່ໜ້ານີ້, ຄອສພ ເດັດດ່ຽວຕັດສິນໃຈສືບຕໍ່ພັດທະນາວຽກງານສື່ມວນຊົນ ຕາມທິດຕົ້ນຕໍດັ່ງນີ້: ໜຶ່ງ. ປ່ຽນແປງຈິນຕະນາການໃໝ່ໃນການພັດທະນາວຽກງານສື່ມວນຊົນໃນຍຸກໃໝ່: ດ້ວຍການເຊື່ອມຊຶມ ແລະ ຜັນຂະຫຍາຍແນວຄິດຊີ້ນໍາຂອງສະຫາຍ ເລຂາທິການໃຫຍ່ປະທານປະເທດ ເນື່ອງໃນໂອກາດວັນສ້າງຕັ້ງສື່ມວນຊົນຄົບຮອບ 70 ປີໃຫ້ປະກົດຜົນເປັນຈິງ. ຕາມທິດທີ່ວ່າ: “ສື່ມວນຊົນແມ່ນຜູ້ປາກອອກແສງ, ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອໄດ້ອ່ານ, ຜູ້ກ້າຜ່ານ ອຸປະສັກ, ຜູ້ທີ່ມັກຄວາມຈິງ, ຜູ້ຍິງຖືກເປົ້າ” ໃຫ້ປະກົດເປັນຮູບປະທໍາເທື່ອລະກ້າວ. ພ້ອມກັນນັ້ນ, ຕ້ອງເດັດດ່ຽວຫັນໄປສູ່ຈິນຕະນາການເປັນເຈົ້າຕົນເອງໃຫ້ຫຼາຍຂຶ້ນ, ກ້າຄິດ, ກ້າເຮັດ ແລະ ກ້າຮັບຜິດຊອບ, ກ້າເຄື່ອນໄຫວເພື່ອຜົນປະໂຫຍດຂອງພັກ, ຂອງຊາດ; ສອງ. ເພີ່ມທະວີບົດບາດການນໍາພາທີ່ເຂັ້ມແຂງຂອງພັກຕໍ່ສື່ມວນຊົນ ແລະ ສັງຄົມ: ຖືເອົາການກໍ່ສ້າງພັກເປັນປັດໄຈຕັດສິນ ໂດຍສ້າງໃຫ້ການຈັດຕັ້ງພັກ ໃນບັນດາອົງການສື່ມວນຊົນທຸກຂັ້ນ ມີຄວາມປອດໃສ, ເຂັ້ມແຂງ ແລະ ໜັກແໜ້ນ. ສ້າງຄວາມເຂັ້ມແຂງໃຫ້ກົງຈັກການຈັດຕັ້ງຂອງສື່ມວນຊົນທີ່ຢູ່ພາຍໃຕ້ບັນດາອົງການຈັດຕັ້ງພັກ, ລັດ, ອົງການຈັດຕັ້ງມະຫາຊົນ ແລະ ສັງຄົມໃຫ້ ສາມາດຈັດຕັ້ງປະຕິບັດພາລະບົດ ບາດຂອງຕົນໄດ້ຢ່າງໜັກແໜ້ນ. ເປົ້າໝາຍສູງສຸດເພື່ອຮັບປະກັນໃຫ້ໄດ້ 4 ລັກສະນະອັນສັກສິດຂອງສື່ມວນຊົນປະຕິວັດ ຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້. ສື່ມວນຊົນຕ້ອງເປັນກະບອກສຽງທີ່ມີພະລັງໃນການເຄື່ອນໄຫວໂຄສະນາ, ປຸກລະດົມ, ເຕົ້າໂຮມຄວາມສາມັກຄີ, ຍົກສູງຈິດໃຈຮັກຊາດ, ຮັກລະບອບໃໝ່, ຍົກສູງຈິດໃຈເອກະລາດ, ເປັນເຈົ້າຕົນເອງ ແລະ ເພິ່ງຕົນເອງ; ພ້ອມກັນອອກແຮງແຂ່ງຂັນສ້າງຂະບວນການຮັກຊາດ ແລະ ພັດທະນາໃຫ້ມີຄວາມຟົດຟື້ນ ແລະ ເປັນຮູບປະທໍາຢ່າງແທ້ຈິງ; ສ້າງ "ກອງນໍາໜ້າແນວຄິດ" ທີ່ຕອບໂຕ້ຂໍ້ມູນຂ່າວສານປອມແປງໄດ້ທັນທີ, ດ້ວຍການສ້າງຕັ້ງໜ່ວຍງານ ຕອບໂຕ້ໄວ ພາຍໃຕ້ການຊີ້ນໍາຂອງຄະນະພັກ ເພື່ອຕິດຕາມການເໜັງຕີງຂອງຫາງສຽງສັງຄົມ. ຕ້ອງຝຶກອົບຮົມນັກຂ່າວໃຫ້ມີທັກສະຂ່າວສານການຕ່າງປະເທດ ແລະ ສາມາດແກ້ໄຂຂໍ້ມູນທີ່ລະອຽດອ່ອນ ເພື່ອປົກປ້ອງພາບພົດການນໍາພາຂອງພັກ ໃນຍຸກທີ່ຂໍ້ມູນໄຫຼວຽນຢ່າງໄຮ້ພົມແດນ; ສາມ. ຍົກລະດັບຄວາມຮູ້ທາງດ້ານທິດສະດີການ ເມືອງ-ການປົກຄອງ ຕິດພັນກັບຍຸກດີຈີຕອນ ແລະ ປັນຍາປະດິດ: ໃນສະໜາມຮົບຂໍ້ມູນຂ່າວສານຍຸກ 4.0, ການປະກອບອາວຸດທາງແນວຄິດແມ່ນສິ່ງຂາດບໍ່ໄດ້. ຕ້ອງປະຕິບັດເຂັ້ມງວດ ລະບອບຮໍ່າຮຽນທິດສະດີການເມືອງຕິດພັນກັບການສະໜອງຂໍ້ມູນຂ່າວສານ; ປັບປຸງຄວາມຮັບຮູ້ໃໝ່ຂອງພະນັກງານ-ນັກຂ່າວ, ບັນນາທິການຂ່າວ ແລະ ນັກເຕັກນິກ ໃນບັນດາອົງການສື່ມວນຊົນຢ່າງຕໍ່ເນື່ອງ. ຕ້ອງພັດທະນາຖັນແຖວນັກຂ່າວ ແລະ ຜູ້ເຮັດວຽກສື່ມວນຊົນໃຫ້ຮັບປະກັນໃນການປະຕິບັດບົດບາດໃນຍຸກສະໄໝໃໝ່; ເລັ່ງສ້າງບຸກຄະລາກອນທີ່ມີຄວາມສາມາດຮອບດ້ານກ້າວທັນຍຸກດີຈີຕອນ ແລະ ປັນຍາປະດິດຢ່າງເປັນລະບົບ. ພ້ອມດຽວກັນນັ້ນ, ຕ້ອງຍົກສູງຄວາມເປັນເຈົ້າການ ແລະ ຫົວຄິດປະດິດສ້າງຂອງຜູ້ບັນນາທິການຂ່າວສານ ເພື່ອຮັບປະກັນລັກສະນະພັກ, ລັກສະນະວິທະຍາສາດ ແລະ ທັນກັບຍຸກສະໄໝ ໃນທຸກໆຜົນຜະລິດຂອງສື່ມວນຊົນ; ສີ. ເພີ່ມທະວີຄວາມເຂັ້ມງວດໃນການຈັດຕັ້ງປະຕິ ບັດຈັນຍາບັນວິຊາຊີບ: ປັບປຸງກົນໄກ ການຄຸ້ມຄອງລະບົບການຂຶ້ນທະບຽນນັກຂ່າວ, ການເຄື່ອນໄຫວຂອງສໍານັກຂ່າວສານ ແລະ ການອະນຸຍາດຕ່າງໆ ໃຫ້ຮັດກຸມຕາມກົດໝາຍກຳນົດໄວ້; ເອົາໃຈໃສ່ຄຸ້ມຄອງການເຄື່ອນໄຫວຂອງສະມາຄົມນັກຂ່າວແຫ່ງ ສປປລາວ ໃຫ້ປະຕິບັດຖືກຕ້ອງຕາມພາລະບົດບາດຢ່າງເປັນເຈົ້າການ; ພ້ອມນັ້ນ, ຕ້ອງເອົາໃຈໃສ່ຄຸ້ມຄອງ, ສະກັດກັ້ນ ແລະ ແກ້ໄຂສະພາບພະນັກງານ, ສະມາຊິກພັກ ແລະ ນັກຂ່າວທີ່ລະເມີດກົດໝາຍຢ່າງເດັດຂາດ. ຮັບປະກັນຄວາມເຂັ້ມງວດທາງດ້ານວິໄນ ແລະ ຈັນຍາບັນຂອງນັກຂ່າວ ເພື່ອສ້າງຄວາມສະເໜີພາບໃນສັງຄົມ ບົນພື້ນຖານກົດໝາຍກຳນົດໄວ້, ປົກປ້ອງພາບພົດອັນດີງາມຂອງນັກຮົບສື່ມວນຊົນປະຕິວັດ ບໍ່ໃຫ້ຖືກສັ່ນຄອນຈາກປະກົດການຫຍໍ້ທໍ້ພາຍໃນ. ປັບປຸງລະບອບ, ກົນໄກ, ແບບແຜນເຮັດວຽກຂອງອົງການສື່ມວນຊົນທັງ 5 ພາກສ່ວນທີ່ເປັນສ໌ຫຼັກຂອງລັດໃຫ້ກົມກຽວ ແລະ ມີຄຸນນະພາບ ແລະ ຄາດໝາຍສູ້ຊົນແມ່ນຄຸ້ມຄອງສື່ມວນຊົນທັງພາກລັດ ແລະ ເອກະຊົນ ພາຍໃຕ້ກົດໝາຍກໍານົດຢ່າງເຂັ້ມງວດ; ສື່ເອກະຊົນ ແລະ ຜູ້ມີອິດທິພົນທີ່ດໍາເນີນກິດຈະການເຜີຍແຜ່ຂໍ້ມູນຂ່າວສານຕ້ອງຂຶ້ນທະບຽນກັບກົມສື່ມວນຊົນຢ່າງເປີດເຜີຍຕາມກົດໝາຍ. ບັນດາສື່ຕ້ອງຍົກສູງສະຕິຄວາມຮັບຜິດຊອບທາງການເມືອງຕໍ່ກັບການປະຕິບັດສິດໜ້າທີ່ ແລະ ພັນທະຂອງຕົນ;ພັດທະນາສື່ມວນຊົນລາວ ເປັນຕົ້ນແມ່ນສື່ຫຼັກຂອງລັດ ແລະ ສື່ມວນຊົນໃນແຕ່ລະອົງການໃຫ້ມີຄວາມໜັກແໜ້ນເຂັ້ມແຂງ, ກ້າວເຂົ້າສູ່ຄຸນນະພາບໃໝ່, ມີຄວາມວ່ອງໄວ, ທັນສະໄໝ ແລະ ໜ້າເຊື່ອຖືໄດ້; ຮັບປະກັນໃຫ້ສື່ມວນຊົນສາມາດປະຕິບັດບົດບາດໃນນາມເປັນເຄື່ອງມື, ເປັນກະບອກສຽງອັນແຫຼມຄົມໃນການໂຄສະນາ, ເຜີຍແຜ່ແນວທາງແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດ. ນໍາໃຊ້ເຕັກໂນໂລຊີ ແລະ ປັນຍາປະດິດ (AI) ໃນການຜະລິດຂ່າວ ແລະ ວິເຄາະຂໍ້ມູນ ເພື່ອໃຫ້ການນໍາສະເໜີຂ່າວມີຄວາມວ່ອງໄວ ແລະ ທັນສະໄໝຫຼາຍຂຶ້ນ; ພັດທະນາເນື້ອຫາໃຫ້ມີຄວາມສ້າງສັນ ແລະ ເຂົ້າເຖິງຄົນຮຸ່ນໃໝ່. ສ້າງເນື້ອຫາທີ່ມີທັງ “ສາລະ” ແລະ “ຄວາມໜ້າສົນໃຈ” ຄວບຄູ່ກັນ. ການເລົ່າເລື່ອງຜ່ານວິດີໂອສັ້ນ, ສາລະຄະດີ, ພອດແຄສ ຫຼື ການນໍາສະເໜີແບບດີຈີຕອນທີ່ທັນສະໄໝ ໄປຄວບຄູ່ກັບການພັດທະນາບຸກຄະລາກອນທີ່ເຮັດວຽກໃນອົງການສື່ມວນຊົນ ໂດຍສະ ເພາະນັກຂ່າວຮຸ່ນໃໝ່ໃຫ້ມີທັກສະຮອບດ້ານ ທັງດ້ານວິຊາຊີບ, ເຕັກໂນໂລຊີ, ພາສາຕ່າງປະເທດ ແລະ ຈັນຍາບັນວິຊາຊີບ; ນໍາໃຊ້ສື່ມວນຊົນເຂົ້າໃນການປົກປັກຮັກສາ ແລະ ເສີມຂະຫຍາຍມູນເຊື້ອປະຕິວັດອັນດີງາມຂອງພັກຂອງຊາດ, ຮັກສາເອກະລັກ, ວັດທະນະທຳ ແລະ ຄຸນຄ່າຂອງຄວາມເປັນລາວ ຄວບຄູ່ໄປກັບການພັດທະນາທັນສະໄໝ, ປຸກລະດົມຄວາມສາມັກຄີປອງດອງ ແລະ ສ້າງຄວາມເຊື່ອໝັ້ນຂອງມະຫາຊົນຕໍ່ການນໍາພາຂອງພັກ; ພ້ອມທັງປະຕິບັດບົດບາດເປັນອາວຸດອັນສໍາຄັນໃນການປົກປ້ອງແນວທາງ, ການຕອບໂຕ້ນະໂຍບາຍຫັນປ່ຽນໂດຍສັນຕິ, ຖ້ອຍທໍານອງບິດເບືອນ, ໃສ່ຮ້າຍປ້າຍສີຂອງຄົນບໍ່ດີທີ່ຫວັງມ້າງເພທຳລາຍລະບອບປະຊາທິປະໄຕປະຊາ ຊົນຂອງພວກເຮົາຢ່າງເດັດດ່ຽວໜຽວແໜ້ນ; ເມື່ອຮອດວັນສ້າງຕັ້ງສື່ມວນຊົນລາວ ຄົບຮອບ 80 ປີ ສູ້ຊົນສ້າງໃຫ້ສີ່ຫຼັກຂອງລັດມີຄວາມໝັ້ນຄົງ ແລະ ສາມາດສ້າງລາຍຮັບກຸ້ມຕົນເອງໃຫ້ໄດ້ບໍ່ຕໍ່າກວ່າ 50% ຂອງລາຍຈ່າຍທັງໝົດໃນຈໍານວນ 2-3 ສໍານັກຂ່າວ.