ເພີ່ມທະວີການພົວພັນຮ່ວມມືຂອງຄະນະກໍາມະການແຮງງານແຫ່ງຊາດ ແລະ ຂັ້ນແຂວງ

ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ(ຮສສ) ໄດ້ປະກອບຄຳເຫັນຕໍ່ກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ IX ໃນຫົວຂໍ້: ເພີ່ມທະວີການພົວພັນຮ່ວມມືຂອງຄະນະກໍາມະການແຮງງານແຫ່ງຊາດ ແລະ ຄະນະກໍາມະການແຮງງານຂັ້ນແຂວງໃນວັນທີ 27 ຕຸລານີ້ວ່າ: ຕະຫຼອດຫຼາຍປີຜ່ານມາ ພັກເຮົາຍາມໃດກໍໄດ້ຊີ້ນໍາ-ນໍາພາອົງການຈັດຕັ້ງ ຂອງລັດ ແລະ ອົງການຈັດຕັ້ງມະຫາຊົນໃຫ້ເອົາໃຈໃສ່ປົກປ້ອງ, ຄຸ້ມຄອງສິດ ແລະ ຜົນປະໂຫຍດຂອງຊາວຜູ້ອອກແຮງງານຕາມກົດໝາຍຢ່າງທົ່ວເຖິງ, ເຂັ້ມງວດ ແລະ ມີຄວາມຍຸດຕິທຳ.

ການບໍລິຫານວຽກງານແຮງງານ ຕະຫຼອດຫຼາຍທົດສະວັດຜ່ານມາແມ່ນພາຍໃຕ້ແນວທາງຂອງພັກ, ກົດໝາຍ ແລະ ລະບຽບການຂອງລັດທີ່ວາງອອກໃນແຕ່ລະໄລຍະ ພ້ອມດຽວກັນນັ້ນເພື່ອໃຫ້ສອດຄ່ອງ ຫຼື ຮອງຮັບໄດ້ຕໍ່ກົນໄກເສດຖະກິດຕະຫຼາດ, ການເຊື່ອມໂຍງສາກົນໃນນາມທີ່ປະເທດເຮົາເປັນສະມາຊິກຂອງອົງການແຮງງານສາກົນນັ້ນ. ຫຼັກການບໍລິຫານ ແລະ ການຄຸ້ມຄອງວຽກງານແຮງງານໂດຍສາມຝ່າຍ ຫຼື ກົນໄກສາມຝ່າຍ ກໍແມ່ນກົນໄກໜຶ່ງທີ່ໄດ້ນຳມາໃຊ້ ໂດຍມີອົງການສາມຝ່າຍເປັນຜູ້ຈັດຕັ້ງປະຕິບັດ, ໃນນັ້ນກະ ຊວງ ຮສສ ເປັນອົງການຂອງລັດເພື່ອຄຸ້ມຄອງວຽກແຮງງານຢ່າງລວມສູນ, ສູນກາງສະຫະພັນກຳມະບານລາວເປັນອົງການຜູ້ຕາງໜ້າຜູ້ອອກແຮງງານ ໃນການເຮັດບົດບາດສຶກສາອົບຮົມ, ສ້າງຄວາມເຂັ້ມແຂງທາງດ້ານກົດໝາຍໃຫ້ແກ່ຊາວຜູ້ອອກແຮງງານ ພ້ອມທັງປະກອບສ່ວນຢ່າງຕັ້ງໜ້າເຂົ້າໃນວຽກງານແຮງງານຂອງປະເທດ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ເປັນອົງການຜູ້ຕາງໜ້າຜູ້ໃຊ້ແຮງງານ ເຮັດບົດບາດໃນການສຶກສາອົບຮົມ, ສ້າງຄວມຮັບຮູ້ເຂົ້າໃຈ ແລະ ຈັດຕັ້ງປະຕິບັດວຽກງານແຮງງານ. ເພື່ອເຮັດໃຫ້ການເຮັດວຽກຮ່ວມກັນຂອງອົງການສາມຝ່າຍມີປະສິດທິພາບ ຜູ້ອອກແຮງງານໄດ້ຮັບຜົນປະໂຫຍດສູງສຸດນັ້ນ ນິຕິກຳທີ່ເປັນເຄື່ອງມືນຳໃຊ້ແມ່ນສິ່ງທີ່ຈຳເປັນທີ່ສຸດ ຕໍ່ບັນຫານີ້ນອກຈາກກົດໝາຍວ່າດ້ວຍແຮງງານ, ກົດໝາຍວ່າດ້ວຍກໍາມະບານລາວ ແລະ ນິຕິກໍາຂອງສະພາການຄ້າ ແລະ ອຸດສາຫະກຳແຫ່ງຊາດລາວ ແລ້ວ ລັດຖະບານໄດ້ອອກດຳລັດ ວ່າດ້ວຍຄະນະກຳມະການແຮງງານແຫ່ງຊາດສະບັບເລກທີ 571/ນຍ, ລົງວັນທີ 20 ກັນຍາ 2021 ທີ່ຜ່ານມາ ຖືເປັນເຄື່ອງມືສໍາຄັນທີ່ສຸດໃຫ້ແກ່ການເຄື່ອນໄຫວວຽກງານຂອງອົງການສາມຝ່າຍພວກເຮົາ.

ຜ່ານການຈັດຕັ້ງປະຕິບັດວຽກງານຮ່ວມກັນຂອງຄະນະກຳມະການແຮງງານແຫ່ງຊາດ ພວກເຮົາສາມາດເຮັດໃຫ້ສາຍພົວພັນດ້ານແຮງງານຢູ່ພາຍໃນປະເທດມີຄວາມສະຫງົບ ຜູ້ອອກແຮງງານລາວໄດ້ເຮັດວຽກໃນເງື່ອນໄຂ ແລະ ສະພາບແວດລ້ອມທີ່ມີການປັບປຸງໃຫ້ດີຂຶ້ນເປັນກ້າວໆ ສະແດງໃຫ້ເຫັນຢູ່ບ່ອນວ່າ ພວກເຮົາໄດ້ເອົາໃຈຮ່ວມກັນໃນການສ້າງ ແລະ ປັບປຸງລະບຽບການດ້ານແຮງງານໃຫ້ມີຢ່າງພຽງພໍ ແລະ ເໝາະສົມ, ຂໍ້ຂັດແຍ່ງທາງດ້ານແຮງງານໄດ້ຫຼຸດລົງ ຖ້າທຽບໃສ່ຫຼາຍປີຜ່ານມາ, ຄ່າແຮງງານຂັ້ນຕ່ຳໄດ້ຮັບການປັບປຸງຫຼາຍຄັ້ງຕາມຈັງຫວະການຂະຫຍາຍຕົວທາງດ້ານເສດຖະກິດ ແລະ ຄ່າຄອງຊີບ, ອຸບັດເຫດແຮງງານໄດ້ຮັບການເອົາໃຈໃສ່ປ້ອງກັນ ເຮັດໃຫ້ມີຈຳນວນຜູ້ເກີດອຸບັດເຫດ ແລະ ເປັນພະຍາດອາຊີບຈາກການເຮັດວຽກຢູ່ໃນເກນມາດຕະຖານພາກພື້ນ ແລະ ສາກົນ, ຈຳນວນການມີວຽກເຮັດງານທຳຂອງກຳລັງແຮງງານໃນຂົງເຂດທຸລະກິດ, ການຜະລິດ ແລະ ການບໍລິການ ທັງຢູ່ຕະຫຼາດແຮງງານພາຍໃນ ແລະ ຕ່າງປະເທດມີທ່າຂະຫຍາຍຕົວເພີ່ມຂຶ້ນ, ໄດ້ຝຶກ ແລະ ຍົກລະດັບສີມືແຮງງານຕາມຄວາມເໝາະສົມ ແລະ ສອດຄ່ອງກັບຄວາມຕ້ອງການຂອງຕະຫຼາດແຮງງານເປັນກ້າວໆມາ, ການປົກປ້ອງທາງສັງຄົມໄດ້ຄວບຄຸມເອົາສ່ວນຫຼາຍ ໂດຍສະເພາະແມ່ນລະບົບປະກັນສັງຄົມ, ລະບົບປະກັນສຸຂະພາບ ແລະ ສະຫວັດດີການດ້ານແຮງງານໄດ້ຮັບການພັດທະນາດີຂຶ້ນ, ພາກລັດ ແລະ ເອກະຊົນມີສ່ວນຮ່ວມເຂົ້າໃນວຽກງານດ້ານແຮງງານຫຼາຍຂຶ້ນ. ສຳລັບການເຊື່ອມໂຍງກັບພາກພື້ນ ແລະ ສາກົນ ໂດຍສະເພາະການປະຕິບັດພັນທະໃນນາມປະເທດເຮົາເປັນສະມາ ຊິກຂອງອົງການແຮງງານສາກົນ. ໃນ 5 ປີຜ່ານມາ, ພວກເຮົາສາມາດນໍາເອົາແນວທາງນະໂຍບາຍຂອງພັກ, ກົດໝາຍ ແລະ ລະບຽບການດ້ານແຮງງານຂອງລັດໄປເຜີຍແຜ່ໃນເວທີພາກພື້ນ ແລະ ສາກົນຢ່າງບໍ່ຢຸດຢັ້ງ, ໃຫ້ຄວາມຢືນຢັນ ແລະ ຊີ້ແຈງເພື່ອຮັບປະກັນຄວາມຖືກຕ້ອງ ແລະ ເປັນທຳຕໍ່ການປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານລາວຕາມມາດຕະຖານແຮງງານສາກົນ ໂດຍສະເພາະຕໍ່ບັນດາສົນທິສັນຍາທີ່ ສປປ ລາວ ໄດ້ເປັນພາຄີ ພ້ອມດຽວກັນນັ້ນ, ສາມອົງການພວກເຮົາຍັງໄດ້ຄົ້ນຄວ້າ ແລະ ສະເໜີໃຫ້ລັດຖະ ບານຮັບຮອງ ຫຼື ເຂົ້າເປັນພາຄີຕໍ່ສົນທິສັນຍາແຮງງານສາກົນໄດ້ເພີ່ມອີກ 2 ສະບັບກ່ຽວກັບວຽກງານຄວາມປອດໄພ ແລະ ສຸຂະພາບແຮງງານ ຊຶ່ງເຫັນວ່າມີຜົນປະໂຫຍດຕໍ່ປະເທດ ຕໍ່ຊາວຜູ້ອອກແຮງງານລາວ. ພວກເຮົາສາມາດຮັກສາໄດ້ຄວາມໄວ້ວາງໃຈ ແລະ ເຊື່ອໝັ້ນຈາກສາກົນ ຕໍ່ການນຳພາຂອງພັກ ໂດຍສະ ເພາະຕໍ່ການເຄົາລົບສິດ, ຜົນປະໂຫຍດ ແລະ ຄວາມຍຸດຕິທຳໃນການເຮັດວຽກຂອງຜູ້ອອກແຮງງານລາວ ຕາມຄຳຂວັນຂອງສາກົນທີ່ວ່າ ພວກເຮົາບໍ່ສາມາດຖິ້ມຜູ້ໃດໄວ້ຂ້າງຫຼັງ ພວກເຮົາສົ່ງເສີມວຽກເຮັດງານທຳທີ່ມີຄຸນຄ່າ ແລະ ເປັນທຳຕໍ່ໝົດທຸກຄົນ.