 |
ກອງປະຊຸມໄດ້ຮັບຟັງການນໍາສະເໜີ ດໍາລັດຂອງລັດຖະບານ ສະບັບເລກທີ 166/ລບ ວ່າດ້ວຍການແກ້ໄຂບັນຫາລະເບີດບໍ່ທັນແຕກ, ພັນທະຂອງ ສປປ ລາວ ໃນການຈັດຕັ້ງປະຕິບັດສົນທິສັນຍາວ່າ ດ້ວຍການເກືອດຫ້າມລະເບີດລູກຫວ່ານ ແລະ ການລະດົມຄໍາເຫັນ ເພື່ອນໍາໄປຮ່າງຄໍາແນະນໍາການປະຕິບັດໜ້າທີ່ ພາລະບົດບາດ ຈຸດປະສານວຽກງານ ລະເບີດບໍ່ທັນແຕກ ຂອງແຕ່ລະພາກສ່ວນທັງສູນກາງ ແລະ ທ້ອງຖິ່ນ.
ທ່ານ ເພັດສະໝອນ ແກ້ວວົງຈິດ ໄດ້ກ່າວເປີດພິທີຄັ້ງນີ້ວ່າ: ຈຸດປະສົງ ຂອງການສ້າງດຳລັດສະບັບນີ້ ເພື່ອເປັນການຜັນຂະຫຍາຍພັນທະຂອງ ສປປ ລາວ ຕໍ່ກັບສົນທິສັນຍາສາກົນ ໂດຍສະເພາະແມ່ນສົນທິສັນຍາວ່າດ້ວຍການເກືອດຫ້າມ ລະເບີດລູກຫວ່ານ ທີ່ ສປປ ລາວ ເປັນພາຄີ, ສໍາລັບຂະບວນການດຳເນີນການ ແມ່ນໄດ້ມີຂະບວນການລິເລີ່ມ ມາແຕ່ໄລຍະປີ 2019 ຊຶ່ງໄດ້ຜ່ານຂະບວນການຈັດສໍາມະນາ ເພື່ອປຶກສາຫາລືກັນໃນຫຼາຍຄັ້ງ ລວມທັງຈັດຮ່ວມກັບທາງພາກລັດ, ຄູ່ຮ່ວມພັດທະນາ, ຜູ້ໃຫ້ທຶນ ຕະຫຼອດບັນດາ ບໍລິສັດພາກເອກະຊົນ ທີ່ເຮັດໜ້າທີ່ເປັນອົງການແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງ ຈົນດໍາເນີນມາຮອດໄລຍະກາງປີ 2022 ຈຶ່ງສາມາດນໍາສະເໜີຕໍ່ລັດຖະບານ ແລະ ໄດ້ຮັບການພິຈາລະນາ ແລະ ອະນຸມັດຢ່າງເປັນທາງການສະບັບທໍາອິດ,
ພາຍຫຼັງທີ່ ໄດ້ມີການມອບ-ໂອນວຽກງານແກ້ໄຂບັນຫາລະເບີດບໍ່ທັນແຕກ ມາຂຶ້ນກັບ ກະຊວງການຕ່າງປະເທດ ນັບແຕ່ເດືອນ ກັນຍາ ປີ 2023 ກໍໄດ້ມີການປັບປຸງດໍາລັດສະບັບດັ່ງກ່າວ ເພື່ອໃຫ້ມີຄວາມສອດຄ່ອງກັບໜ້າວຽກຕົວຈິງ ແລະ ໂຄງປະກອບ ຂອງຄະນະກໍາມະການ ໃນແຕ່ລະຂັ້ນ.
 |
ຈຸດປະສົງຂອງການເຜີຍແຜ່ຄັ້ງນີ້, ເພື່ອເຜີຍແຜ່ໃຫ້ບັນດາທ່ານ ໄດ້ຮັບຊາບ ແລະ ທັງເປັນການເສີມຂະຫຍາຍຄວາມເຂົ້າໃຈບັນດາເນື້ອໃນຂອງດຳລັດເລກທີ 166/ລບ. ກອງປະຊຸມ ຍັງຈະໄດ້ສຸມໃສ່ການລະດົມແນວຄິດ ແລະ ຄຳເຫັນ ຂອງບັນດາທ່ານທີ່ເຂົ້າຮ່ວມໃນຮ່າງຄຳແນະນຳການປະຕິບັດໜ້າທີ່ພາລະບົດບາດຂອງຈຸດປະສານງານ ໃຫ້ແກ່ຂັ້ນສູນກາງ ແລະ ແຂວງ ເພື່ອເພີ່ມທະວີປະສິດທິພາບ ແລະ ປະສິດທິຜົນຂອງການປະຕິບັດໜ້າທີ່ຂອງຄະນະກຳມະການຄຸ້ມຄອງໃນແຕ່ລະຂັ້ນ ເພື່ອເປັນການສ້າງເງື່ອນໄຂໃຫ້ທຸກຂັ້ນ ໄດ້ມີສ່ວນຮ່ວມໃນການຄຸ້ມຄອງ, ກວດກາ ແລະ ປະສານສົມທົບກັບພາກສ່ວນທີ່ກ່ຽວຂ້ອງໃນການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢ່າງແທດເໝາະ ແລະ ມີປະສິດທິຜົນກວ່າເກົ່າ.
(ຂ່າວ-ພາບ: ກອງຄໍາ)
ຄໍາເຫັນ