 |
ສະຫາຍ ນາງ ພັນຈິນດາ ເລັ່ງສະຫວັດ ໄດ້ເຜີຍແຜ່ຜົນສຳເລັດກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX, ປາຖະກະຖາວັນແມ່ຍິງສາກົນ ຄົບຮອບ 116 ປີ (8 ມີນາ 1910 ຫາ 8 ມີນາ 2026) ຊຶ່ງໃນກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ໄດ້ຮັບຮອງເອົາເນື້ອໃນສໍາຄັນ ຄື: ຮັບຮອງເອົາລາຍງານການເມືອງ ທັງສອງພາກ ພ້ອມທັງກໍານົດທິດທາງ, ຄາດໝາຍສູ້ຊົນ 5 ປີ (2026-2030); ຮັບຮອງເອົາວິໃສທັດ ຮອດປີ 2035, ແຜນພັດທະນາແມ່ຍິງລາວ 5 ປີ (2026-2030) ຊຶ່ງມີ 9 ເປົ້າໝາຍ, 31 ແຜນວຽກຈຸດສຸມ ແລະ 144 ວຽກຈຸດສຸມ, ຮັບຮອງເອົາກົດລະບຽບ ຂອງສະຫະພັນແມ່ຍິງລາວ ສະໄໝທີ 9; ຮັບຮອງເອົາ ຄໍາຂວັນ ແລະ ຂໍ້ແຂ່ງຂັນ ຂອງສະຫະພັນແມ່ຍິງລາວ ສະໄໝ IX; ສືບຕໍ່ຮັກສາ ແລະ ປະຕິບັດຄໍາຂວັນ: “ພັດທະນາຄວາມສະເໝີພາບຍິງ-ຊາຍ ຕິດພັນ ກັບການພັດທະນາປະເທດຊາດ” ຂໍ້ແຂ່ງຂັນ 3 ດີ ຄື: “ພົນລະເມືອງດີ, ພັດທະນາດີ ແລະ ສ້າງຄອບຄົວດີ”.
ຫຼັງຈາກນັ້ນ, ສະຫາຍ ນາງ ແກ້ວມະນີ ແພງບຸນມາ ຄະນະບໍລິຫານງານສະຫະພັນແມ່ຍິງກະຊວງຍຸຕິທຳ ໄດ້ຂຶ້ນຜ່ານຂໍ້ຕົກລົງຂອງປະທານສູນກາງສະຫະພັນແມ່ຍິງລາວ ວ່າດ້ວຍການຍ້ອງຍໍ-ຊົມເຊີຍ ໃຫ້ສະຫະພັນແມ່ຍິງກະຊວງຍຸຕິທຳ ທີ່ມີຜົນງານດີເດັ່ນໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ສະໄໝທີ VIII (2021-2025) ຊຶ່ງມີບຸກຄົນ ແລະ ກົມກອງດີເດັ່ນ ຈຳນວນ 130 ໃບ ແລະ ໃນໂອກາດນີ້ ສະຫາຍ ນາງ ພັນຈິນດາ ເລັ່ງສະຫວັດ ກໍໄດ້ໃຫ້ກຽດຂຶ້ນມອບໃບຍ້ອງຍໍໃຫ້ແກ່ບຸກຄົນ ແລະ ກົມກອງດີເດັ່ນຕາມລຳດັບ.
ໃນຕອນທ້າຍກອງປະຊຸມ ສະຫາຍ ຄຳພັນ ບຸນພາຄົມ ໄດ້ມີຄຳເຫັນ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍພ້ອມທັງເນັ້ນໜັກໃຫ້ຜູ້ເຂົ້າຮ່ວມ ເພີ່ມທະວີການສຶກສາອົບຮົມການເມືອງ-ແນວຄິດ ໃຫ້ຖັນແຖວສະມາຊິກແມ່ຍິງໃຫ້ເລີກເຊິ່ງ, ສືບຕໍ່ຄົ້ນຄວ້າເຊື່ອມຊຶມບັນດາມະຕິ, ຄຳສັ່ງ, ແນວທາງນະໂຍບາຍຕ່າງໆຂອງພັກ-ລັດ, ມະຕິກອງປະຊຸມໃຫຍ່ຂອງພັກ ແລະ ຂອງຕົນ ໄປຄ່ຽງຄູ່ກັນນັ້ນ ເອື້ອຍນ້ອງແມ່ຍິງຕ້ອງໄດ້ເອົາໃຈໃສ່ໃນການຄົ້ນຄວ້າຮ່ຳຮຽນຍົກລະດັບຕົນເອງຮອບດ້ານເພີ່ມທະວີການເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜນ ເປັນອັນໜຶ່ງອັນດຽວກັນໃນການຈັດຕັ້ງປະຕິບັດໜ້າທີ່ວຽກງານ, ການຮ່ຳຮຽນຕ່າງໆໃຫ້ມີຜົນສຳເລັດ.
ຂ່າວ-ພາບ:ບຸນຕອມ.
ຄໍາເຫັນ