ກອງປະຊຸມຄັ້ງນີ້, ແມ່ນກອງປະຊຸມລະດັບຊາດ ຄັ້ງທີ 2 ກ່ຽວກັບວຽກງານກົດລະຫັດອາຫານສາກົນ (Codex) ຢູ່ ສປປ ລາວ ທີ່ຖືກຈັດຂຶ້ນໂດຍອົງການ FAO ຊຶ່ງສະແດງໃຫ້ເຫັນເຖິງຄວາມມຸ່ງໝັ້ນ ພະຍາຍາມຕໍ່ກັບການສ້າງມາດຕະຖານຄວາມປອດໄພທາງດ້ານອາຫານ ໃຫ້ແທດເໝາະກັບມາດຕະຖານສາກົນ.
ກອງປະຊຸມໃນຄັ້ງນີ້, ໄດ້ສຸມໃສ່ການສ້າງຈິດສຳນຶກໃຫ້ແກ່ເຈົ້າໜ້າທີ່ລະດັບສູງຈາກບັນດາພາກ ສ່ວນທີ່ກ່ຽວຂ້ອງ ແລະ ມີບົດບາດສຳຄັນທາງດ້ານການເມືອງທີ່ຈະຊີ້ນຳ ແລະ ຍົກລະດັບວຽກງານ Codex ໃຫ້ເປັນວຽກບຸລິມະສິດແຫ່ງຊາດ ສະໜັບສະໜູນການເຂົ້າມີສ່ວນຮ່ວມໃນວຽກງານ Codex ຢ່າງມີປະສິດທິຜົນ. ສ້າງ ແລະ ພັດທະນາມາດຕະຖານຄວາມປອດໄພອາຫານແຫ່ງຊາດ ໃຫ້ສອດ ຄ່ອງກັບບັນດາຂໍ້ແນະນຳ ແລະ ຄຳແນະນຳຂອງມາດຕະຖານສາກົນ. ໃນຖານະເປັນສະມາຊິກອົງ ການການຄ້າໂລກ (WTO), ການເຊື່ອມສານ ແລະ ສອດຄ່ອງກັບມາດຕະຖານສາກົນ ມີຄວາມສຳຄັນ ແລະ ຈຳເປັນຫຼາຍ ເພື່ອສ້າງຄວາມເຂັ້ມແຂງໃຫ້ອຸດສາຫະກຳພາຍໃນໃຫ້ເປັນສ່ວນໜຶ່ງຂອງຕ່ອງໂສ້ການສະໜອງອາຫານໃນທົ່ວໂລກ. ພ້ອມກັນນັ້ນ, ຍັງຊ່ວຍເພີ່ມຄວາມສາມາດໃນການແຂ່ງຂັນທາງການຄ້າໃນລະດັບພາກພື້ນ ແລະ ສາກົນ ໃຫ້ ສປປ ລາວ. ນອກນີ້, ຍັງເປັນການສ້າງຄວາມເຊື່ອໝັ້ນຂອງຜູ້ບໍລິໂພກໃນຜະລິດຕະພັນອາຫານຂອງພວກເຮົານຳອີກ.
(ຂ່າວ: ວັນເພັງ, ຂໍ້ມູນ-ພາບ: ສູນຂ່າວສານການແພດ ກະຊວງສາທາລະນະສຸກ)
ຄໍາເຫັນ