ເຜີຍແຜ່ວຽກງານປັບປຸງຄ່າບໍລິການເກັບມ້ຽນຂີ້ເຫຍື້ອ ໃນຕົວເມືອງນະຄອນຫຼວງພະບາງ

ທ່ານ ດາວວັນ ສີລິວົງ ໄດ້ຜ່ານບົດລາຍງານຜົນກະທົບ ຕໍ່ກັບການບໍລິການເກັບມ້ຽນຂີ້ເຫຍື້ອ ໃນໄລຍະວິກິດນໍ້າຂຶ້ນລາຄາ ສົ່ງຜົນກະທົບຕໍ່ວຽກງານການເກັບມ້ຽນຂີ້ເຫຍື້ອນັບທັງພາກລັດ ແລະ ເອກະຊົນ, ຄະນະຮັບຜິດຊອບຈຶ່ງມີການປັບລາຄາ ການເກັບມ້ຽນຂີ້ເຫຍື້ອຕາມຂໍ້ຕົກລົງຂອງທ່ານປະທານຄະນະກໍາມະການປົກຄອງນະຄອນ ໂດຍເຫັນດີປັບຂຶ້ນລາຄາການເກັບມ້ຽນຂີ້ເຫຍື້ອຂອງພາກຄົວເຮືອນຈາກ 40,000 ກີບຕໍ່ເດືອນ ເປັນ 60,000 ກີບຕໍ່ເດືອນ ແລະ ພາກທຸລະກິດຂະໜາດນ້ອຍ-ກາງ-ໃຫຍ່ຈາກ 100,000 ກີບຕໍ່ເດືອນ ເປັນ 200,000 ກີບຕໍ່ເດືອນ. ຈາກນັ້ນຜູ້ເຂົ້າຮ່ວມໄດ້ປະກອບຄຳເຫັນຕໍ່ບາງບັນຫາຄົງຄ້າງ, ທັງເຫັນດີເປັນເອກະພາບ ຕໍ່ກັບການປັບລາຄາເກັບມ້ຽນຂີ້ເຫຍື້ອ ທັງຮຽກຮ້ອງໃຫ້ພາກສ່ວນກ່ຽວຂ້ອງ ເອົາໃຈໃສ່ເກັບມ້ຽນຂີ້ເຫຍື້ອແຕ່ລະຈຸດຕາມກຳນົດເວລາ, ເພື່ອຄວາມເປັນລະບຽບ ຮຽບຮ້ອຍສະອາດງາມຕາມພາຍໃນນະຄອນຫຼວງພະບາງ. ພ້ອມນັ້ນ, ທ່ານ ດາວວັນ ສີລິວົງ ໄດ້ຊີ້ແຈງດ້ວຍເຫດ ແລະ ຜົນຕໍ່ບາງບັນຫາຢ່າງມີຄວາມຊັດເຈນກະຈ້າງແຈ້ງ.

ຕອນທ້າຍທ່ານ ນາງ ວິໄລພອນ ຖະໜອມສັກ ໄດ້ມີຄໍາເຫັນຊີ້ນໍາຕໍ່ການປັບປຸງລາຄາ ການເກັບມ້ຽນຂີ້ເຫຍື້ອໃນຄັ້ງນີ້, ທັງຮຽກຮ້ອງໃຫ້ອົງການປົກຄອງບ້ານທີ່ເຂົ້າຮ່ວມ ນໍາເອົາແຈ້ງການປັບປຸງລາຄາເກັບມ້ຽນຂີ້ເຫຍື້ອ ໄປເຜີຍແຜ່ໃຫ້ປະຊາຊົນພາຍໃນບ້ານຂອງຕົນຮັບຮູ້ຢ່າງທົ່ວເຖິງ ແລະ ພ້ອມກັນຈັດຕັ້ງປະຕິບັດໃຫ້ໄດ້ຮັບຜົນດີ.

ຂ່າວ-ພາບ: ນາງ ອໍາໄພ ໄຊຍະເພັດ