 |
ຫຼຽນກຽດຕິຄຸນອັນສູງສົ່ງນີ້ເປັນຂອງພະຣາຊະທານຈາກສົມເດັດພະເຈົ້າຈັກກະພັດແຫ່ງຍີ່ປຸ່ນ ແລະ ຖືກສົ່ງມອບໂດຍ ທ່ານ ໂຄອິຊຶມິ ຊຶໂຕະມຸ ເອກອັກຄະຣາຊະທູດຍີ່ປຸ່ນປະຈຳ ສປປ ລາວ ຊຶ່ງພິທີມອບໄດ້ຈັດຂຶ້ນໃນວັນທີ 6 ກຸມພາ ຜ່ານມາ ທີ່ເຮືອນພັກເອກອັກຄະຣາຊະທູດຍີ່ປຸ່ນ ທີ່ນະຄອນຫຼວງວຽງຈັນ.
ໃນພິທີດັ່ງກ່າວມີ ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີແຫ່ງ ສປປ ລາວ, ພ້ອມທັງແຂກຮັບເຊີນກິດຕິມະສັກ; ທ່ານ ໂຄອິຊຶມິ ຊຶໂຕະມຸ ໄດ້ສະແດງຄວາມຊົມເຊີຍຕໍ່ ທ່ານ ບຸນແຝງ ພູມມະໄລສິດ ແລະ ກ່າວສະແດງຄວາມຂອບໃຈຕໍ່ການປະກອບສ່ວນອັນເຂັ້ມແຂງຍາວນານຂອງທ່ານເຂົ້າໃນການເສີມຂະຫຍາຍສາຍພົວພັນລະຫວ່າງຍີ່ປຸ່ນ ແລະ ລາວ ໃນຂະແໜງສາທາລະນະສຸກ.
ນັບຕັ້ງແຕ່ ທ່ານ ບຸນແຝງ ພູມມະໄລສິດ ໄດ້ຮັບການແຕ່ງຕັ້ງເປັນລັດຖະມົນຕີກະຊວງສາທາລະນະສຸກໃນເດືອນມີນາ 2021 ໃນລະຫວ່າງການລະບາດຂອງພະຍາດໂຄວິດ-19, ທ່ານມີບົດບາດສຳຄັນໃນການຮ່ວມມືກັບຍີ່ປຸ່ນ ເພື່ອຮັບປະກັນການນຳໃຊ້ການຊ່ວຍເຫຼືອຈາກຍີ່ປຸ່ນ ໃຫ້ມີຄວາມສະດວກວ່ອງໄວ ແລະ ມີປະສິດທິຜົນ. ການຊີ້ນຳໆພາຂອງທ່ານໄດ້ສົ່ງຜົນໃຫ້ການແຈກຢາຍອຸປະກອນ ແລະ ການສະໜອງວັກຊິນປ້ອງກັນພະຍາດໂຄວິດ-19 ຈາກປະເທດຍີ່ປຸ່ນເພື່ອຊຸກຍູ້ວຽກງານສາທາລະນະສຸກໃນລາວໄດ້ທ່ວງທັນກັບສະພາບການອັນຫຍຸ້ງຍາກໃນໄລຍະເວລາດັ່ງກ່າວ.
ກອງປະຊຸມປຶກສາຫາລືລະດັບສູງລະຫວ່າງຍີ່ປຸ່ນ ແລະ ລາວ ຍັງໄດ້ຮັບການຊຸກຍູ້ ຈາກ ທ່ານ ບຸນແຝງ ພູມມະໄລສິດ. ເມື່ອທ່ານໄດ້ເຂົ້າຮ່ວມກອງປະຊຸມຄະນະກຳມະການພາກພື້ນປາຊີຟິກຕາເວັນຕົກຂອງ WHO ທີ່ຈັດຂຶ້ນທີ່ປະເທດຍີ່ປຸ່ນ ໃນປີ 2021, ທ່ານໄດ້ພົບປະກັບລັດຖະມົນຕີກະຊວງສາທາລະນະສຸກ, ແຮງງານ ແລະ ສະຫວັດດີການຂອງຍີ່ປຸ່ນ ແລະ ໄດ້ຮຽກຮ້ອງໃນລະດັບສູງຕໍ່ຄວາມຈຳເປັນໃນການຮ່ວມມືລະຫວ່າງສອງປະເທດ. ໃນປີ 2024, ໃນຖານະທີ່ປະເທດລາວເປັນປະທານອາຊຽນທ່ານໄດ້ຊີ້ນຳກອງປະຊຸມລັດຖະມົນຕີກະຊວງສາທາລະນະສຸກ ອາຊຽນ+3 ໃຫ້ປະສົບຜົນສຳເລັດໂດຍຜ່ານການປຶກສາຫາລືຮ່ວມກັບລັດຖະມົນຕີຈາກຫຼາຍປະເທດ ລວມເຖິງການພົບປະແລກປ່ຽນກັບຮອງລັດຖະມົນຕີກະຊວງສາທາລະນະສຸກ, ແຮງງານ ແລະ ສະຫວັດດີການຍີ່ປຸ່ນ.
ນອກຈາກນັ້ນ, ທ່ານຍັງໄດ້ສະແດງໃຫ້ເຫັນເຖິງຄວາມມຸ່ງໝັ້ນອັນແຮງກ້າຕໍ່ການພັດທະນາຊັບພະ ຍາກອນມະນຸດ. ໃນຖານະທີ່ເປັນຫົວໜ້າສະມາຄົມອະດີດນັກສຶກສາມະຫາວິທະຍາໄລນາໂກຢາ ປະຈຳລາວ ແລະ ເປັນໜຶ່ງໃນອະດີດນັກສຶກສາຂອງມະຫາວິທະຍາໄລນາໂກຢາ, ທ່ານໄດ້ສົ່ງເສີມໃຫ້ພະນັກງານກະຊວງສາທາລະນະສຸກໄປສຶກສາຕໍ່ທີ່ປະເທດຍີ່ປຸ່ນຢ່າງຕັ້ງໜ້າໂດຍຜ່ານໂຄງການທຶນການສຶກສາຕ່າງໆ ເຊັ່ນ: ໂຄງການຜູ້ນຳໜຸ່ມ (YLP) ແລະ ໂຄງການທຶນການສຶກສາ ເພື່ອການພັດທະນາຊັບພະຍາກອນມະນຸດ (JDS) ເພື່ອແນໃສ່ການສົ່ງເສີມຊັບພະຍາກອນມະນຸດອັນມີຄ່າ ແລະ ມີຄວາມສາມາດຂອງລາວ.
ໃນໂອກາດທີ່ໄດ້ຮັບຫຼຽນກຽດຕິຄຸນອາທິດອຸໄທ, ດາວຄຳ ແລະ ດາວເງິນ (ຊັ້ນ 2), ທ່ານ ບຸນແຝງ ພູມມະໄລສິດ ກໍໄດ້ກ່າວສະແດງຄວາມປິຕິຍິນດີ ແລະ ໃຫ້ຄຳໝັ້ນສັນຍາວ່າຈະສືບຕໍ່ຄວາມພະຍາຍາມຂອງຕົນເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີສຳລັບທັງສອງປະເທດ.
(ແຫຼ່ງຂ່າວ: ສະຖານທູດຍີ່ປຸ່ນ)
ຄໍາເຫັນ