 |
ໃນພິທີ, ທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ (ຜູ້ເກົ່າ) ໄດ້ຂຶ້ນຜ່ານບົດສະຫຼຸບການຊີ້ນໍາ-ນໍາພາວຽກງານຮອບດ້ານໃນໄລຍະຜ່ານມາວ່າ: ໄດ້ນໍາພາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ VI ແລະ ຄັ້ງທີ VII, ແຜນປະຈໍາປີສາມາດບັນລຸຕາມຄາດໝາຍວາງໄວ້. ເສດຖະກິດຂອງແຂວງໄດ້ຮັບການຂະຫຍາຍຕົວເພີ່ມຂຶ້ນໃນແຕ່ລະປີ, ຄາດໝາຍສູ້ຊົນມະຫາພາກຂອງແຂວງສາມາດຈັດຕັ້ງປະຕິບັດບັນລຸຄາດໝາຍ ແລະ ມີບາງຄາດໝາຍລື່ນແຜນວາງໄວ້.
ຈາກນັ້ນ, ໃນພິທີໄດ້ມອບມະຕິຕົກລົງຂອງກົມການເມືອງສູນກາງພັກ, ດໍາລັດຂອງນາຍົກລັດຖະມົນຕີໃຫ້ເລຂາຄະນະບໍລິຫານງານພັກແຂວງເຈົ້າແຂວງໄຊຍະບູລີ (ຜູ້ເກົ່າ), ມອບດໍາລັດຂອງນາຍົກລັດຖະມົນຕີໃຫ້ປະທານຄະນະກຳມະການປົກຄອງແຂວງໄຊຍະບູລີ (ຜູ້ໃໝ່) ພ້ອມທັງເຊັນບົດບັນທຶກມອບ-ຮັບໜ້າທີ່ລະຫວ່າງ ທ່ານ ພົງສະຫັວນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ (ເກົ່າ) ກັບ ທ່ານ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ ປະທານຄະນະກໍາມະການປົກຄອງແຂວງໄຊຍະບູລີ (ຜູ້ໃໝ່) ໂດຍຊ່ອງໜ້າ ທ່ານ ນາງ ສີໃສ ລືເດດມູນສອນ ແລະ ຜູ້ເຂົ້າຮ່ວມເປັນສັກຂີພິຍານ.
 |
ໃນພິທີ, ຜູ້ເຂົ້າຮ່ວມໄດ້ຮັບຟັງການຜ່ານຂໍ້ຕົກລົງຂອງປະທານຄະນະກໍາມະການປົກຄອງແຂວງໄຊຍະບູລີວ່າດ້ວຍການແຕ່ງຕັ້ງສະຫາຍ ອາເມຊົງ ເຢ່ຍເລັ່ງ ແລະ ສະຫາຍ ບຸດສະກອນ ອິນທະລັງສີ ເປັນຮອງປະທານຄະນະກຳມະການປົກຄອງແຂວງໄຊຍະບູລີ ພ້ອມທັງມອບຂໍ້ຕົກລົງ ໂດຍ ທ່ານ ດວງຕາ ໄຊວຸດ. ໃນຕອນທ້າຍ, ທ່ານ ນາງ ສີໃສ ລືເດດມູນສອນ ໄດ້ເນັ້ນໜັກໃຫ້ຄະນະພັກແລະ ຄະນະກໍາມະການປົກຄອງທຸກຂັ້ນເອົາໃຈໃສ່ປະຕິບັດຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງໝ້າທີ່ຮັບຜິດຊອບໃຫ້ຈະແຈ້ງ ແລະ ມີກົນໄກປະສານງານທີ່ດີເພື່ອນໍາພາຈັດຕັ້ງປະຕິບັດພາລະກິດປົກປັກຮັກສາ ແລະ ພັດທະນາແຂວງໄຊຍະບູລີໃຫ້ມີຜົນສໍາເລັດຢ່າງບໍ່ຢຸດຢັ້ງ.
(ຂ່າວ+ພາບ: ຄໍາໝັ້ນ)
ຄໍາເຫັນ