ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບ ທ່ານ ເສດຖາ ທະວີສິນ ນາຍົກລັດຖະມົນຕີ ແຫ່ງ ຣາຊະອານາຈັກໄທ ພ້ອມຄະນະ ຢ່າງເປັນທາງການ ທີ່ສຳນັກງານນາຍົກລັດຖະມົນຕີ ໃນຕອນເຊົ້າ ທີ 30 ຕຸລາ ນີ້ ເພື່ອສືບຕໍ່ຮັກແໜ້ນ, ເສີມຂະຫຍາຍສາຍພົວພັນ ແລະ ການຮ່ວມມື.
ພິທີຕ້ອນຮັບຢ່າງເປັນທາງການ, ເລີ່ມຂຶ້ນໂດຍ ທ່ານ ນາຍົກລັດຖະມົນຕີ ສອງທ່ານ ໄດ້ໄປຢືນຢູ່ແທນກຽດຕິຍົດ ຊຶ່ງສອງຝ່າຍໄດ້ພ້ອມກັນເຄົາລົບທຸງຊາດ ໂດຍມີກອງດຸລິຍາງ ບັນເລງເພງຊາດໄທ ແລະ ເພງຊາດລາວ ຕາມລໍາດັບ. ຫຼັງຈາກນັ້ນ, ຜູ້ບັນຊາກອງກຽດຕິຍົດ ເຂົ້າລາຍງານ ແລະ ຮຽນເຊີນ ທ່ານ ນາຍົກລົງຈາກແທ່ນກຽດຕິຍົດ ແລະ ທ່ານ ນາຍົກລັດຖະມົນຕ ແຫ່ງ ສປປ ລາວ ກໍໄດ້ນໍາພາ ທ່ານນາຍົກລັດຖະມົນຕີ ແຫ່ງ ຣາຊະອານາຈັກໄທ ລົງຈາກແທ່ນກຽດຕິຍົດ; ເມື່ອເຖິງຫົວແຖວກອງກຽດຕິຍົດ, ທ່ານ ເສດຖາ ທະວີສິນ ກໍໄດ້ຂໍ່ານັບທຸງຊາດ ແລ້ວສືບຕໍ່ຍ່າງກວດແຖວກອງກຽດຕິຍົດ.
ໃນພິທີ, ທ່ານ ສອນໄຊ ສີພັນດອນ ຍັງໄດ້ນໍາພາ ທ່ານ ນາຍົກລັດຖະມົນຕີ ແຫ່ງ ຣາຊະອານາຈັກໄທ ທັກທາຍກັບຄະນະທາງການຝ່າຍລາວ ໂດຍມີ ກົມພິທີການທູດ ກະຊວງການຕ່າງປະເທດ ແຫ່ງ ສປປ ລາວ ເປັນຜູ້ແນະນໍາ. ໃນໂອກາດດຽວກັນ, ທ່ານ ເສດຖາ ທະວີສິນ ກໍໄດ້ນໍາພາ ທ່ານ ນາຍົກລັດຖະມົນຕີ ແຫ່ງ ສປປ ລາວ ທັກທາຍກັບ ຄະນະຜູ້ແທນທາງການຝ່າຍໄທ ໂດຍມີກົມພິທີການທູດ ກະຊວງການຕ່າງປະເທດ ແຫ່ງ ຣາຊະອານາຈັກໄທ ເປັນຜູ້ແນະນໍາ.
ຈາກນັ້ນ, ພິທີຕ້ອນຮັບຢ່າງເປັນທາງການ ກໍໄດ້ສຳເລັດ ແລະ ທ່ານ ນາຍົກລັດຖະມົນຕີ ພ້ອມດ້ວຍຄະນະທາງການຂອງສອງຝ່າຍ ລາວ - ໄທ ກໍໄດ້ກ້າວເຂົ້າສູ່ພິທີພົບປະ.
ຂ່າວ-ພາບ: ສຸກສະຫວັນ
ຄໍາເຫັນ