ຜົ້ງສາລີ ເອົາໃຈໃສ່ພັດທະນາເຂດຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນ

 ໂດຍໄດ້ປັບປຸງ ແລະ ກໍ່ສ້າງພື້ນຖານໂຄງລ່າງຮັບໃຊ້ການຜະລິດ ແລະ ການດໍາລົງຊີວິດຂອງປະຊາຊົນ ໄປພ້ອມກັບການຈັດສັນພູມລໍາເນົາ ແລະ ອາຊີບຄົງທີ່ຢ່າງເປັນລະບົບຕໍ່ເນື່ອງ.

ໃນນັ້ນໄດ້ເອົາໃຈໃສ່ການປັບປຸງຍົກລະດັບຊີວິດການເປັນຢູ່ຂອງປະຊາຊົນໃນເຂດຊົນນະບົດຫ່າງໄກສອກຫຼີກ, ເຂດລຽບຕາມຊາຍແດນ ຊຶ່ງມາຮອດປັດຈຸບັນການຈັດຕັ້ງປະຕິບັດວຽກງານແກ້ໄຂຄວາມທຸກຍາກແລະພັດທະນາຊົນນະບົດທົ່ວແຂວງມີຄວາມຄືບໜ້າຄື: ມີ 6,767 ຄອບຄົວພັດທະນາກວມ18.16% ຂອງຈໍານວນຄອບຄົວໃນທົ່ວແຂວງ, ມີ 31 ບ້ານພັດທະນາກວມ6.11% ຂອງຈໍານວນບ້ານໃນທົ່ວແຂວງ, ໃນປີ 2024 ສາມາດແກ້ໄຂບ້ານທຸກຍາກໄດ້ 17 ບ້ານ ລວມບ້ານພົ້ນທຸກໄດ້ທັງໝົດ 183 ບ້ານ ກວມ 36.38%, ບ້ານທຸກຍາກຍັງເຫຼືອ 324 ບ້ານ (ມະຕິສະພາໃຫ້ຫຼຸດລົງຍັງເຫຼືອ 320ບ້ານ); ໃນປີນີ້ແກ້ໄຂຄອບຄົວທຸກຍາກໄດ້ 833 ຄອບຄົວ ເຮັດໃຫ້ຄອບຄົວພົ້ນທຸກທັງໝົດມີ17,407 ຄອບຄົວ ກວມ 46.73%, ຄອບຄົວທຸກຍາກຍັງເຫຼືອ 19,842 ຄອບຄົວ (ມະຕິສະພາໃຫ້ຫຼຸດລົງຍັງເຫຼືອ 27,876ຄອບຄົວ);ສຸມໃສ່ປະຕິບັດ 16 ມາດຖານເງື່ອນໄຂການສ້າງບ້ານໃຫຍ່ໃຫ້ເປັນຕົວເມືອງໃນຊົນນະບົດໄດ້ 2 ຈຸດຄື: ບ້ານຢໍ້ ເມືອງບຸນເໜືອ ແລະ ບ້ານສິນໄຊ ເມືອງຂວາ ພ້ອມນີ້ສາມາດແກ້ໄຂເມືອງພົ້ນທຸກໄດ້ 1 ເມືອງຄື: ເມືອງບຸນເໜືອ.

ມາຮອດທ້າຍປີ 2024 ບ້ານໃນທົ່ວແຂວງມີເສັ້ນທາງເຂົ້າເຖິງ100% ໃນນີ້ສາມາດທຽວໄດ້ 2 ລະດູເພີ່ມຂຶ້ນ 2 ບ້ານເຮັດໃຫ້ບ້ານທີ່ມີເສັ້ນທາງສາມາດທຽວໄດ້ 2 ລະດູມີ335ບ້ານ ກວມ66.6%ຂອງຈໍານວນບ້ານໃນທົ່ວແຂວງ, 7 ເທດສະບານເມືອງມີນ້ຳປະປາ ພວມສຸມໃສ່ກໍ່ສ້າງນ້ຳປະປາຊຸມຊົນເປົ້າໝາຍຕົວເມືອງນ້ອຍໃນຊົນນະບົດ 5 ຈຸດ, ມີບ້ານ 52 ທີ່ໄດ້ຊົມໃຊ້ນໍ້າປະປາກວມ10.34%ຂອງຈໍານວນບ້ານໃນທົ່ວແຂວງ, ມີ 7,794 ຄົວເຮືອນທີ່ໄດ້ຊົມໃຊ້ນໍ້າປະປາ ກວມ20.62% ຂອງຈໍານວນຄົວເຮືອນໃນທົ່ວແຂວງ;ກໍ່ສ້າງ-ສ້ອມແປງລະບົບຊົນລະປະທານໃຫ້ສາມາດຫົດນໍ້ານາໃນລະດູຝົນໄດ້8,068ເຮັກຕາ ເທົ່າກັບ99.42%ຂອງແຜນການ (ແຜນການ 8,115 ເຮັກຕາ)ແລະລະດູແລ້ງຫົດໄດ້4,396ເຮັກຕາ ເທົ່າກັບ82.17%ຂອງແຜນການ (ແຜນການ 5,350 ເຮັກຕາ);ມີ 362 ບ້ານທີ່ໄດ້ຊົມໃຊ້ຕາຂ່າຍໄຟຟ້າລັດ ກວມ71.97%ຂອງຈໍານວນບ້ານໃນທົ່ວແຂວງ;ມີ 25,335 ຄົວເຮືອນໄດ້ຊົມໃຊ້ໄຟຟ້າກວມເອົາ 68.02% ຂອງຈໍານວນຄົວເຮືອນໃນທົ່ວແຂວງ;ໄດ້ຊຸກຍູ້ຕິດຕາມໂຄງການທີ່ພວມຈັດຕັ້ງປະຕິບັດຕາມເສັ້ນທາງແລວ 11 ສ້າງຈຸດພັກລົດແລະສິ່ງອໍານວຍຄວາມສະດວກຕາມເສັ້ນທາງຫຼວງແຫ່ງຊາດທີ່ຜ່ານແຂວງລວມມີ9ໂຄງການ ມີຄວາມຄືບໜ້າສະເລ່ຍທັງໝົດ29.01%, ກໍ່ສ້າງເສັ້ນທາງຕາມແລວ 22 ລວມມີ9ໂຄງການມີຄວາມຄືບໜ້າສະເລ່ຍທັງໝົດ66.80% ແລະ ກໍ່ສ້າງເສັ້ນທາງຕາມແລວ 4 ທາງອອກສູ່ພາຍນອກລວມມີ 6 ໂຄງການມີຄວາມຄືບໜ້າສະເລ່ຍ 39.58%;ການພັດທະນາ ແລະ ຍົກຍ້າຍເທດສະບານແຂວງມາຢູ່ເມືອງບຸນເໜືອມີຄວາມຄືບໜ້າ 85% ພວມສຸມໃສ່ປະຕິບັດ 6 ວຽກໄດ້ແກ່: ສຸມໃສ່ປູກຈິດສຳນຶກ, ໄກ່ເກ່ຍຊົດເຊີຍ-ເວນຄືນຜົນກະທົບໃນໂຄງການ, ຈັດປະຕິບັດບັນດາວຽກທີ່ໄດ້ສັນຍາການຄ້າໃນ 200 ລ້ານໂດລາ ໂດຍມີການກຳນົດໜ້າວຽກຄັກແນ່, ພັດທະນາຕາມຜັງເມືອງທີ່ໄດ້ກຳນົດໄວ້, ຄຸ້ມຄອງການປຸກສ້າງທີ່ບໍ່ຖືກຕ້ອງຕາມຜັງເມືອງ ແລະ ພັດທະນາເທດສະບານເກົ່າຢູ່ເມືອງຜົ້ງສາລີ (ດ້ວຍການຫັນໄປສູ່ 3 ຮູບການຄື: (1) ຫັນເປັນສຳນັກງານຫ້ອງການເມືອງຜົ້ງສາລີ, (2) ຫັນໄປຂາຍສິດນຳໃຊ້ ແລະ (3) ໃຫ້ເຊົ່າ ແລະ ສຳປະທານ) ແລະ ກະກຽມເກັບມ້ຽນສິ່ງເສດເຫຼືອຂີ້ເຫຍື້ອຢູ່ເທດສະບານໃໝ່ ແລະ ອື່ນໆ.