ຜົ້ງສາລີ ແລະ ບໍ່ແກ້ວ ພົບປະແລກປ່ຽນບົດຮຽນຮ່ວມກັນ.

ກອງປະຊຸມພົບປະແລກປ່ຽນບົດຮຽນວຽກງານຈັດຕັ້ງ, ກໍ່ສ້າງພັກ-ພະນັກງານ ລະຫ່ວາງ ຄະນະຈັດຕັ້ງແຂວງຜົ້ງສາລີ ແລະ ແຂວງບໍ່ແກ້ວ ໄດ້ຈັດຂຶ້ນໃນວັນທີ 26 ກຸມພາຜ່ານມານີ້ ທີ່ຫ້ອງປະຊຸມຂອງຫ້ອງວ່າການແຂວງຜົ້ງສາລີ ໂດຍມີສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງຜົ້ງສາລີ, ທ່ານ ສົມພອນ ແກ້ວມະນີ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງບໍ່ແກ້ວ, ມີບັນດາຮອງຫົວໜ້າຄະນະຈັດຕັ້ງແຂວງ, ຫົວໜ້າ-ຮອງຫົວໜ້າຂະແໜງກ່ຽວຂ້ອງເຂົ້າຮ່ວມ.
    ກອງປະຊຸມຄັ້ງນີ້, ຕາງໜ້າທັງສອງແຂວງໄດ້ລາຍງານສະພາບການຈັດຕັ້ງປະຕິບັດວຽກງານກໍ່ສ້າງພັກ - ພະນັກງານ ແລະ ປັບປຸງກົງຈັກການຈັດຕັ້ງໃນໄລຍະທີ່ຜ່ານມາ ໃຫ້ກັນ ແລະ ກັນຮັບຊາບໂດຍຫຍໍ້ ພ້ອມກັນປະກອບຄຳຄິດ ຄຳເຫັນແລກປ່ຽນບົດຮຽນນຳກັນ ໂດຍສະເພາະວຽກງານການກໍ່ສ້າງພັກ, ການຄົ້ນຄວ້າພະນັກງານໄປບຳລຸງ-ກໍ່ສ້າງ, ການທຽບລະດັບທິດສະດີໃຫ້ພະນັກງານ-ລັດຖະກອນ, ການຍົກຍ້າຍສະມາຊິກພັກ, ການປັບປຸງກົງຈັກການຈັດຕັ້ງພັກ ຕິດພັນກັບການປັບປຸງກົງຈັກການຈັດຕັ້ງລັດ, ເປັນຕົ້ນການໂຮມວຽກງານ, ການຍຸບກົງຈັກການຈັດຕັ້ງຢູ່ຂັ້ນແຂວງ, ຂັ້ນເມືອງ, ການຂະຫຍາຍພັກ ແລະ ການກະກຽມບຸກຄະລາກອນໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ, ການກວດກາ ພິສູດຍັ້ງຢືນຄວາມຖືກຕ້ອງທາງດ້ານປະຫວັດຕົ້ນກຳເນີດ ແລະ ການຕິດຕາມສະມາຊິກພັກກ່ອນການເລືອກຕັ້ງ, ແຕ່ງຕັ້ງພະນັກງານເຂົ້າຮັບຕໍາແໜ່ງສຳຄັນ, ການປະຕິບັດນະໂຍບາຍຕໍ່ພະນັກ ງານທີ່ໄປຍົກລະດັບໄລຍະສັ້ນ, ໄລຍະຍາວ ຢູ່ພາຍໃນ ແລະ ຕ່າງປະເທດ ລວມໄປເຖິງບັນຫາດ້ານອ່ອນຂໍ້ຄົງຄ້າງທີ່ທັງສອງແຂວງພົບພໍ້ໃນໄລຍະຜ່ານມາ ເພື່ອແລກປ່ຽນບົດຮຽນເຊິ່ງກັນ ແລະ ກັນ ມີຄໍາຄິດຄຳເຫັນແກ້ໄຂຮ່ວມກັນກ່ຽວກັບບັນຫາຂໍ້ຄົງຄ້າງຕ່າງໆ ແນໃສ່ແກ້ໄຂບັນຫາຂໍ້ຫຍຸ້ງຍາກທີ່ພົບເຫັນໃນໄລຍະຜ່ານມາ ຍົກສູງຄຸນນະພາບ ແລະ ບົດບາດຂອງວຽກງານຈັດຕັ້ງ ກໍ່ສ້າງພັກ-ພະນັກງານໃຫ້ກ້າວເຂົ້າສູ່ລວງເລິກ ແລະ ມີຄຸນນະພາບໃໝ່.
( ພາບ-ຂ່າວ: ແສງຄຳ ສາລີວັນ )