 |
ທ່ານ ບຸນເພັງ ພຸດກັນຍາ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄດ້ຜ່ານບົດສະຫຼຸບການຈັດຕັ້ປະຕິບັດ ວຽກງານຄຸ້ມຄອງໄພພິບັດ ປີ 2024 ແລະ ວາງທິດທາງແຜນການ ປະຈໍາປີ 2025, ຊຶ່ງໄລຍະ 1 ປີ ຜ່ານມາວຽກງານໄພພິບັດ ແມ່ນເຫດການທີ່ເກີດຂຶ້ນເປັນໄພອັນຕະລາຍທີ່ຮ້າຍແຮງເປັນຕົ້ນເກີດຂຶ້ນຈາກທໍາມະຊາດ ຫຼື ມະນຸດສ້າງຂຶ້ນ ສ້າງຄວາມເສຍຫາຍຢ່າງຫຼວງຫຼາຍຕໍ່ສຸຂະພາບ,ຊີວິດ,ຊັບສິນ,ເສດຖະກິດ ແລະການດໍາລົງຊີວິດຂອງຄົນໃນສັງຄົມທັງໃນໄລຍະສັ້ນ ແລະ ໄລຍະຍາວ. ຜ່ານມາວຽກງານ ໄພພິບັດໄດ້ເກີດຂຶ້ນພາຍໃນ 7 ເມືອງ ທົ່ວແຂວງເຊັ່ນ: ອັກຄີໄພ (ໄຟໄໝ້ເຮືອນ) ລົມພະຍຸເຮືອນ, ນໍ້າຖ້ວມ, ເກີດພະຍາດລະບາດ, ສັດຕູພຶດລະບາດ ແລະ ອື່ນໆ ຊຶ່ງໄດ້ສ້າງຄວາມເສຍຫາຍທັງໝົດ 225,927,713,801 ກີບ. ໃນນີ້, ຂົງເຂດ ພະແນກແຮງງານ ແລະ ສະຫວັດດີການສັງຄົມແຂວງຜົນເສຍຫາຍ ທັງໝົດ 43,432,087,000 ກີບ. ເກີດອັກຄີໄຟ (ໄຟໄໝ້) ເຮືອນປະຊາຊົນ 2 ເມືອງຄື: ເມືອງບຸນເໜືອ ແລະ ເມືອງໃໝ່ ຈໍານວນ 5 ຫຼັງ, 5 ບ້ານ, 6 ຄອບຄົວ, ມີພົນລະເມືອງ 33 ຄົນຍິງ 15 ຄົນ ແລະ ມູນຄ່າເສຍຫາຍ 2,880,650,000 ກີບ; ເກີດນໍ້າຖ້ວມ ແລະ ດີນເຊາະເຈື່ອນ 7 ເມືອງ 96 ບ້ານ ທີ່ໄດ້ຮັບຜົນກະທົບ 19 ບ້ານ 1,028 ຫຼັງຄ່າ 2,540 ຄອບຄົວ, ພົນລະເມືອງ 10,333 ຄົນຍີງ 6,325 ຄົນ, ເນື້ອທີ່ສວນເສຍຫາຍ 257.07 ເຮັກຕາ, ລວມມູນຄ່າເສຍຫາຍ 30,259,620,000 ກີບ. ເກີດໄພພິບັດ (ລົມພະຍຸ) 5 ເມືອງຄື: ເມືອງຍອດອູ, ເມືອງຜົ້ງສາລີ, ເມືອງບຸນເໜືອ, ເມືອງ ສໍາພັນ ແລະ ເມືອງຂວາ ຈໍານວນ ບ້ານທີ່ໄດ້ຮັບຜົນກະທົບ 4 ບ້ານ, ມີ 1,348 ຫຼັງຄາ, ມີ2,789 ຄອບຄົວ, ມີ 10,507 ຄົນຍິງ 5,613 ຄົນ, ຫ້ອງການ 2 ຫຼັງ, ສຸກສາລາ 1 ຫຼັງ ແລະ ໂຮງຮຽນ 1 ຫຼັງ, ມູນຄ່າເສຍຫາຍ 10,292,177,000 ກີບ. ຂົງເຂດພະແນກໂຍທາ ແລະ ຂົນສົ່ງແຂວງຜົນເສຍຫາຍເສັ້ນທາງຫຼວງແຫ່ງຊາດ ແລະ ທ້ອງຖີ່ນລວມມູນຄ່າເສຍຫາຍທັງໝົດ 182,302,089,712 ກີບ ແລະ ຂົງເຂດອື່ນໆ.
 |
ໃນກອງປະຊຸມ, ຜູ້ເຂົ້າຮ່ວມໄດ້ຍົກໃຫ້ເຫັນຜົນງານອັນພົ້ນເດັ່ນ, ລວມທັງບັນດາຂໍ້ຄົງຄ້າງ, ພ້ອມທັງໄດ້ພ້ອມກັນປຶກສາຫາລື, ສົນທະນາ, ປະກອບຄໍາເຫັນຢ່າງສ້າງສັນ, ກົງໄປກົງມາ ຢ່າງພາວະວິໄສດ້ວຍຄວາມຮັບຜິດຊອບສູງ ເພື່ອເຮັດການຕອບໂຕ້ວຽກງານໄພພິບັດທີ່ອາດຈະເກີດຂຶ້ນໃນຕໍ່ໜ້າໃຫ້ມີປະສິດທິພາບ ແລະ ສາມາດຈັດຕັ້ງປະຕິບັດໃຫ້ມີປະສິດທິຜົນ.
(ພາບ-ຂ່າວ: ແສງຄໍາ ສາລີວັນ)
ຄໍາເຫັນ