ຜົ້ງສາລີ ຊຸກຍູ້ສົ່ງເສີມການລ້ຽງໄກ່ພັນໄຂ່ລ້ຽງໄກ່ຄົບວົງຈອນ 

ເມືາອບໍ່ດົນມານີ້, ທ່ານ ຄໍາຜອຍ ວັນນະສານ ເຈົ້າແຂວງຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂອງແຂວງ, ເມືອງ ລົງຕິດຕາມຊຸກຍູ້ສົ່ງເສີມກິດຈະການຟາມລ້ຽງໄກ່ພັນໄຂ່ຂອງບໍລິສັດສຸກຈະເລີນຟາມລ້ຽງໄກ່ຄົບວົງຈອນ ຈໍາກັດຜູ້ດຽວ ທີ່ເມືອງບຸນເໜືອ. ໂດຍມີທ່ານ ພອນໄຊ ແກ້ວສົມພັນ ເຈົ້າເມືອງບຸນເໜືອ ເຂົ້າຮ່ວມຕິດຕາມ.
ທ່ານ ຄຳຈັນ ສິດທິລາດ ຕາງໜ້າໃຫ້ ບໍລິສັດ ສຸກຈະເລີນຟາມລ້ຽງໄກ່ຄົບວົງຈອນ ຈຳກັດຜູ້ດຽວ ໄດ້ລາຍງານວ່າ: ບໍລິສັດ ສຸກຈະເລີນຟາມລ້ຽງໄກ່ໄດ້ສ້າງຕັ້ງຂຶ້ນໃນທ້າຍປີ 2021 ແລະ ໄດ້ດໍາເນີນກິດຈະການໃນຕົ້ນເດືອນກໍລະກົດ 2022. ໃນໄລຍະຜ່ານມາທາງບໍລິສັດໄດ້ມີການ ບຸກເບີກພື້ນທີ່ການກໍ່ສ້າງເສັ້ນທາງເຂົ້າຟາມ, ກໍ່ສ້າງຄອກລ້ຽງໄກ່ແບບເຄີ່ງຖາວອນ-ແບບຖາວອນ ແລະ ນຳເຂົ້າໄກ່ພັນໄຂ່ຈາກປະເທດໄທ (ເປັນໄກ່ພັນໄຂ່ໄຮບຮີດ) ໃນວັນທີ 24 ກັນຍາ 2022. ປັດຈຸບັນທາງບໍລິສັດພວມດຳເນີນກິດຈະການບຸກເບີກພື້ນທີ່ຕັ້ງຄອກໄກ່ໄຂ່ ແລະ ໄກ່ຊີ້ນສຳເລັດ, ສ້າງຄອກໄກ່ໄຂ່ແບບເຄີ່ງຖາວອນ ຂະໜາດ 8x25 ແມັດ ຈໍານວນ 1 ຫຼັງ ບັນຈຸໄກ່ໄດ້ 500 ໂຕ, ເປັນຄອກໄກ່ເພື່ອທົດລອງຄວາມເປັນໄປໄດ້ຂອງການໃຫ້ຜົນຜະລີດໄກ່ໄຂ່, ສຳເລັດການກໍ່ສ້າງຕັ້ງຄອກໄກ່ໄຂ່ແບບຖາວອນ ຂະໜາດ 15x85 ແມັດ ຈຳນວນ 1 ຫຼັງ ທີ່ສາມາດບັນຈຸໄກ່ໄດ້ 8-10 ພັນໂຕ. ຜົນການດໍາເນີນກິດຈະການລ້ຽງໄກ່ພັນໄຂ່ໃນຊ່ວງໄລຍະ 13 ເດືອນຜ່ານມາ (ແຕ່ວັນທີ 24 ກັນຍາ 2022 ຫາ ວັນທີ 16 ສີງຫາ 2023), ການໃຫ້ຜົນຜະລິດໄຂ່ແມ່ນຢູ່ອັດຕາສ່ວນປະມານ 88,5% ສະເລ່ຍ 11,700 ໜ່ວຍຕໍ່ເເດືອນ (ສະເລ່ຍໃຫ້ໄຂ່ 390 ໜ່ວຍຕໍ່ມື້) ສະເລ່ຍລາຍຮັບ 21 ລ້ານກີບຕໍ່ເດືອນ ແລະ ລາຍຈ່າຍສະເລ່ຍ 16 ລ້ານກີບຕໍ່ເດືອນ. ນອກຈາກນີ້ ທາງບໍລິສັດຍັງໄດ້ປູກພຶກພັກຊະນິດຕ່າງໆ ເພື່ອສົ່ງຂາຍພາຍໃນເທດສະບານເມືອງບຸນເໜືອ ຕື່ມອີກ.
ໂອກາດນີ້, ທ່ານ ເຈົ້າແຂວງ ໄດ້ເນັ້ນໃຫ້ອົງການປົກຄອງເມືອງ ຕ້ອງໃກ້ສິດ ແລະ ອໍານວຍຄວາມສະດວກທາງດ້ານຕ່າງໆໃນການຈັດຕັ້ງປະຕິບັດ ຕໍ່ກັບບໍລິສັດໃຫ້ສືບຕໍ່ຮັກສາອາຊີບ ທຸລະກິດທີ່ມີຢູ່ແລ້ວ ແລະ ສືບຕໍ່ເພີ່ມອາຊີບທີ່ເຫັນວ່າຍັງມີທ່າແຮງຕື່ມເປັນຕົ້ນການລ້ຽງໝູ ແລະ ປາ ເປັນສິ້ນຄ້າ, ຊ່ວຍສົ່ງເສີມປະຊາຊົນເຂດດັ່ງກ່າວມີວຽກເຮັດງານທຳ, ເພື່ອໃຫ້ເຂົາເຈົ້າມີອາຊີບທີ່ໜັ້ນຄົງ ແລະ ຖາວອນ, ສາມາດສ້າງລາຍຮັບເຂົ້າສູ່ຄອບຄົວເປັນປົກະຕິ ເພື່ອຫຼຸດຜ່ອນອອກຈາກຄວາມທຸກຍາກເທື່ອລະກ້າວ.
(ພາບ-ຂ່າວ: ແສງຄຳ ສາລີວັນ)