ແລະ ການພິມຈໍາໜ່າຍ ຄົບຮອບ 74 ປີ ທີ່ຈະໝູນວຽນມາເຖິງນີ້ວ່າ: ວັນທີ 13 ສິງຫາ ເປັນວັນທີ່ມີຄວາມໝາຍ-ຄວາມສຳຄັນທາງປະຫວັດສາດຂອງຊາດ, ຂອງພັກ, ຂອງການປະຕິວັດ ແລະ ຂອງປະຊາຊົນລາວບັນດາເຜົ່າ. ເປັນວັນສ້າງຕັ້ງແນວລາວອິດສະຫຼະທັງເປັນວັນສ້າງຕັ້ງໜັງສືພິມປະຕິວັດສະບັບທຳອິດ ແລະ ເປັນວັນສ້າງຕັ້ງໂຮງພິມປະຕິວັດຂຶ້ນໃນວັນດຽວກັນຄືວັນທີ 13 ສິງຫາ 1950 ນັ້ນຄືທີ່ມາຂອງວັນສື່ມວນຊົນ ແລະ ການພິມຈຳໜ່າຍຂອງຊາດລາວຊຶ່ງປີນີ້ຄົບຮອບ 74ປີ ແຫ່ງການສະເຫຼີມສະຫຼອງມູນເຊື້ອການເຕີບໃຫຍ່ຂະຫຍາຍຕົວ ແລະ ພັດທະນາຂອງວຽກງານສື່ມວນຊົນ ແລະ ພິມຈຳໜ່າຍນັບແຕ່ມີການຕິດຕໍ່ພົວພັນສົ່ງຂ່າວທາງຈົດໝາຍ, ກ້າວຂຶ້ນມີໃບຂ່າວ, ໃບປີວ ແລະ ມີໜັງສືພິມ, ວິທະຍຸ,ໂທລະພາບຢູ່ປະເທດເຮົາຕາມລຳດັບຈົນກ້າວມາຮອດຍຸກສື່ເອເລັກໂຕຣນິກ ແລະ ການພິມຈຳໜ່າຍທາງເອເລັກໂຕຣນິກ(E-book)ສາມາດບໍລິການການອ່ານໄດ້ຢ່າງໄຮ້ຂີດຈຳກັດ.
ວຽກງານພິມຈຳໜ່າຍ ເປັນວຽກງານໜຶ່ງທີ່ມີບົດບາດຄວາມສຳຄັນໃນຂະແໜງວັດທະນະທຳ ແລະ ການສື່ສານ ຕອບສະໜອງຄວາມຮູ້ຊັບສິນທາງປັນຍາໃຫ້ແກ່ສັງຄົມເພື່ອພັດທະນາຊັບພະຍາກອນມະນຸດ.ກົມວັນນະຄະດີ ແລະ ພິມຈຳໜ່າຍ ໄດ້ເຮັດບົດບາດໜ້າທີ່ຄຸ້ມຄອງ, ປົກປັກຮັກສາ, ສົ່ງເສີມການປະດິດແຕ່ງວັນນະກຳ ພັດທະນາການພິມຈຳໜ່າຍ, ຫໍສະໝຸດ ແລະ ສົ່ງເສີມການອ່ານ. ໃນໄລຍະຜ່ານມາໄດ້ເອົາໃຈໃສ່ຢ່າງຕັ້ງໜ້າໃນການຊຸກຍູ້ສົ່ງເສີມວຽກງານວັນນະຄະດີ ແລະ ການພິມຈຳໜ່າຍໃຫ້ມີບາດກ້າວຂະຫຍາຍຕົວເລື້ອຍໆມາ. ປຶ້ມ, ສິ່ງພິມຕ່າງໆເປັນປັດໄຈຊຸກຍູ້ທີ່ແຂງແກ່ນ ໃຫ້ແກ່ການສ້າງວິໄສທັດ ສ້າງສາຍພົວພັນສັງຄົມ ສາມາດສຶກສາອົບຮົມຄຸນສົມບັດ, ແບບແຜນດຳລົງຊີວິດທີ່ປອດໃສໃຫ້ແກ່ຜູ້ອ່ານ, ສ້າງຮຸ່ນສືບທອດທີ່ມີລະດັບວັດທະນະທຳ ແລະ ການສຶກສາຢ່າງຮອບດ້ານ, ທັງສາມາດຈຳກັດບັນຫາ ແລະ ປະກົດການຫຍໍ້ທໍ້ທາງສັງຄົມ ເປັນການປະກອບສ່ວນເຂົ້າໃນການພັດທະນາຊັບພະຍາກອນມະນຸດ ປົກປັກຮັກສາ ແລະ ສ້າງສາປະເທດຊາດ.
ທ່ານກ່າວຕື່ມວ່າ: ຜົນງານທີ່ພົ້ນເດັ່ນໃນປີຜ່ານມາໄດ້ສໍາເລັດການປັບປຸງກົດໝາຍວ່າດ້ວຍການພິມຈໍາໜ່າຍ (ສະບັບປັບປຸງ) ເລກທີ 44/ສພຊ, ລົງວັນທີ 17 ກໍລະກົດ 2023 ນຳໃຊ້ເປັນເຄື່ອງມືແລະເປັນບ່ອນອີງທີ່ສຳຄັນທາງດ້ານຫຼັກການ, ລະບຽບການແລະມາດຕະການໃນການຄຸ້ມຄອງ, ຕິດຕາມ, ກວດກາວຽກງານການພິມຈຳໜ່າຍເຮັດໃຫ້ວຽກງານພິມຈຳໜ່າຍຂະຫຍາຍຕົວ, ພັດທະນາແລະເຄື່ອນໄຫວຢ່າງແຂງແຮງ.ປັດຈຸບັນ ມີເຖິງ 44 ໂຮງພິມ ແລະ 15 ສຳນັກພິມ, ມີຮ້ານຈຳໜ່າຍປຶ້ມ-ສິ່ງພິມເກີດຂຶ້ນ ແລະ ເຄື່ອນໄຫວຢ່າງມີຊີວິດຊີວາ, ມີຂະແໜງຄົ້ນຄວ້າຈັດພິມປຶ້ມການຮຽນ-ການສອນ, ມີປຶ້ມຜົນງານການຄົ້ນຄວ້າຂອງບັນດາຂະແໜງການວິຊາການ, ປຶ້ມແປ, ປຶ້ມວັນນະຄະດີປະເພດຕ່າງໆຈຳນວນຫຼາຍ, ມີອົງການຈັດຕັ້ງເຄື່ອນໄຫວເຮັດວຽກງານພິມຈຳໜ່າຍຄື: ສະມາຄົມການພິມ, ສະມາຄົມນັກປະພັນລາວ,ສະມາຄົມຫໍສະໝຸດລາວ ແລະ ກຸ່ມສຳນັກພິມເກີດຂຶ້ນເພື່ອສົ່ງເສີມຂະແໜງການພິມຈຳໜ່າຍແລະ ສົ່ງເສີມການອ່ານດ້ວຍຫຼາຍຮູບການ, ເປັນຕົ້ນແມ່ນໄດ້ມີການຈັດວາງສະແດງປຶ້ມ(ບຸນປຶ້ມໃຫຍ່) ໄດ້ 4 ຄັ້ງຢູ່ມະຫາວິທະຍາໄລແຫ່ງຊາດ ນະຄອນຫຼວງວຽງຈັນ ພາຍໃຕ້ຫົວຂໍ້ຕ່າງໆ ສາມາດສ່ອງແສງໃຫ້ເຫັນບົດບາດຄວາມໝາຍຄວາມສຳຄັນຂອງປຶ້ມ, ພ້ອມນີ້, ຍັງມີການຈັດງານບຸນມະໂຫລານປຶ້ມແລະສົ່ງເສີມການອ່ານຢູ່ນະຄອນຫຼວງວຽງຈັນ4 ຄັ້ງ, ຢູ່ແຂວງຈຳປາສັກ 1 ຄັ້ງ, ແຂວງຊຽງຂວາງ 2 ຄັ້ງລວມ 7 ຄັ້ງ, ໄດ້ມີການລະດົມປຶ້ມຈາກກຸ່ມສຳນັກພິມຈຳນວນຫຼາຍເພື່ອມອບໃຫ້ບັນດາໂຮງຮຽນຈຳນວນໜຶ່ງຢູ່ບັນດາແຂວງ ແລະມີແຜນຈັດຢູ່ແຂວງຫຼວງພະບາງ, ບັນດາແຂວງໃນທົ່ວປະເທດຕໍ່ໄປເລື້ອຍໆ. ນອກຈາກນີ້, ວຽກງານການພິມຈຳໜ່າຍຍັງໄດ້ມີການຮ່ວມມືກັບເພື່ອນມິດຍຸດທະສາດໂດຍສະເພາະສສ ຫວຽດນາມໃນການຈັດຝຶກອົບຮົມວຽກງານພິມຈໍາໜ່າຍສ້າງຄວາມເຂັ້ມແຂງໃຫ້ແກ່ພະນັກງານລາວ ແລະ ວຽກງານການແລກປ່ຽນ ຈັດພິມປຶ້ມແປດີເດັ່ນຂອງບັນດາສຳນັກພິມຂອງລາວ ແລະ ສຳນັກພິມ ສປຈີນຈຳນວນຫຼາຍຫົວເລື່ອງ, ພ້ອມທັງໄດ້ຮັບການຊຸກຍູ້ການຈັດພິມປຶ້ມນິທານ, ປຶ້ມອ່ານເສີມຂອງບັນດາອົງການຈັດຕັ້ງສາກົນທີ່ບໍ່ສັງກັດລັດຖະບານ ເພື່ອມອບໃຫ້ຫ້ອງສະໝຸດໂຮງຮຽນສາມັນໃນຂອບເຂດເປົ້າໝາຍຂອງໂຄງການ; ເຄື່ອນໄຫວວຽກງານສົ່ງເສີມການອ່ານຢູ່ບັນດາແຂວງ. ໃນປີ 2024, ວຽກງານການຈັດພິມປຶ້ມສາມາດອອກທະບຽນພິມປຶ້ມໄດ້ 704 ຫົວເລື່ອງມີຈໍານວນ 3.049.549 ຫົວ, ສິ່ງພິມອື່ນໆໄດ້ 319.900 ສະບັບ.ໃນແຕ່ລະປີມີບົດປະພັນວັນນະຄະດີ ປະເພດກະວີ, ເລື່ອງສັ້ນລົງພິມ ແລະ ໂຄສະນາໃນສື່ ແລະ ສິ່ງພິມຕ່າງໆປະມານ 2.000 ບົດ.
ສຳລັບປີນີ້,ໜຶ່ງໃນກິດຈະກຳສະເຫຼີມສະຫຼອງວັນສື່ມວນຊົນ ແລະ ການພິມຈຳໜ່າຍ ຄົບຮອບ 74 ປີຂະແໜງການພິມຈຳໜ່າຍໄດ້ຈັດກອງປະຊຸມແລກປ່ຽນບົດຮຽນການຈັດພິມ ແລະ ຈຳໜ່າຍຂຶ້ນໃນວັນທີ 25 ມິຖຸນາຜ່ານມາໂດຍມີບັນດາສຳນັກພິມຢູ່ພາຍໃນນະຄອນຫຼວງວຽງຈັນເຂົ້າຮ່ວມ. ໂດຍມີແຜນໂຄສະນາເຜີຍແຜ່ກົດໝາຍວ່າດ້ວຍການພິມຈຳໜ່າຍ(ສະປັບປັບປຸງ) ເລກທີ 44/ສພຊ, ລົງວັນທີ 17 ກໍລະກົດ 2023 ໃນລະຫວ່າງເດືອນກັນຍາ 2024 ໃຫ້ສັງຄົມໄດ້ຮັບຮູ້ຢ່າງກວ້າງຂວາງໃນຂອບເຂດທົ່ວປະເທດ.ຄຽງຄູ່ໄປກັບຜົນສຳເລັດ ແລະ ທ່າແຮງທີ່ມີດັ່ງກ່າວນັ້ນ, ຍັງມີສິ່ງຄົງຄ້າງ ແລະ ທ້າທາຍຄື:ປັດຈຸບັນໄດ້ມີຕົ້ນສະບັບປຶ້ມຄົ້ນຄວ້າວິຊາການຂະແໜງການຕ່າງໆ, ປຶ້ມບົດປະພັນວັນນະຄະດີ, ໜັງສືຜູກໃບລານ,ພັບສາ,ປຶ້ມເກົ່າແກ່ທີ່ບັນທຶກຫຼັກຖານທາງປະຫວັດສາດຂອງຊາດລາວເປັນຈຳນວນຫຼວງຫຼາຍຍັງບໍ່ທັນມີການຈັດພິມເຜີຍແຜ່ຍ້ອນຂາດທຶນພິມ; ຍັງຂາດການລົງທຶນໃສ່ການສ້າງລະບົບບໍລິການຫໍສະໝຸດດີຈີຕອນ ຫຼືບໍລິການ ການອ່ານດ້ວຍອີເລັກໂຕຣນິກເພື່ອຫຼຸດຜ່ອນງົບປະມານຈັດພິມເປັນເຫຼັ້ມ, ຫຼຸດຜ່ອນຄ່າຂົນສົ່ງ ແລະ ຫຼຸດຜ່ອນມົນລະພິດແລະອື່ນໆ.
ໃນຕໍ່ໜ້າວຽກງານພິມຈຳໜ່າຍ ຈະສືບຕໍ່ເອົາໃຈໃສ່ໂຄສະນາເຜີຍແຜ່ກົດໝາຍວ່າດ້ວຍການພິມແລະຈຳໜ່າຍໃຫ້ທົ່ວເຖິງ, ປະຕິບັດນະໂຍບາຍສົ່ງເສີມວຽກງານພິມຈຳໜ່າຍໃຫ້ເຕີບໃຫຍ່ຂະຫຍາຍຕົວດ້ວຍຫຼາຍຮູບແບບເພື່ອຜະລິດປຶ້ມ, ສິ່ງພິມແລະຈຳໜ່າຍດ້ວຍຮູບການຕ່າງໆລົງສູ່ທ້ອງຖິ່ນຢ່າງທົ່ວເຖິງ; ສືບຕໍ່ຊຸກຍູ້ນັກຄົ້ນຄວ້າ, ນັກປະພັນ, ນັກປະດິດແຕ່ງຄົ້ນຄວ້າຂຽນປຶ້ມ, ສິ່ງພິມຮັບໃຊ້ແກ່ຫຼາຍເປົ້າໝາຍຍິ່ງຂຶ້ນເພື່ອສະໜອງການຜະລິດຢູ່ໂຮງພິມຂອງພາກລັດ ແລະ ເອກະຊົນພາຍໃນ; ສືບຕໍ່ປັບປຸງນິຕິກຳລຸ່ມກົດໝາຍການຄຸ້ມຄອງວຽກງານການພິມຈຳໜ່າຍ ແລະ ຫໍສະໝຸດເພື່ອເປັນບ່ອນອີງໃນການຈັດຕັ້ງປະຕິບັດໃຫ້ສະດວກຂຶ້ນ; ສືບຕໍ່ເກັບກຳສະຖິຕິໂຮງພິມ, ຮ້ານພິມ, ຮ້ານຈຳໜ່າຍປຶ້ມ, ຫໍສະໝຸດ, ຫ້ອງສະໝຸດ, ຫ້ອງອ່ານນັບແຕ່ຂັ້ນສູນກາງຈົນຮອດທ້ອງຖິ່ນເພື່ອເປັນຂໍ້ມູນວາງແຜນວິໄຈ ແລະ ພັດທະນາວຽກງານການພິມຈຳໜ່າຍໃຫ້ສອດຄ່ອງເໝາະສົມກັບສະພາບການຂະຫຍາຍຕົວຂອງປະເທດເຮົາ.ເຖິງຢ່າງໃດກໍດີ, ເພື່ອເຮັດສໍາເລັດໜ້າທີ່ອັນສໍາຄັນດັ່ງກ່າວອົງການພິມຈໍາໜ່າຍກໍຍັງຕ້ອງການ ການຊ່ວຍເຫຼືອສະໜັບສະໜູນຈາກພາກລັດ, ພາກເອກະຊົນ, ທຸລະກິດ ແລະ ສັງຄົມ ເປັນຕົ້ນການມີນະໂຍບາຍຕໍ່ຂະແໜງການການພິມຈໍາໜ່າຍ ເພື່ອຜ່ອນຜັນຄ່າໃຊ້ຈ່າຍການນຳເຂົ້າອຸປະກອນການຈັດພິມ, ການຜະລິດຂອງບັນດາສຳນັກພິມ, ໂຮງພິມເພື່ອການຈັດພິມປຶ້ມ ແລະ ສິ່ງພິມໃຫ້ຫຼາຍ, ເຮັດໃຫ້ວຽກງານການພິມຈໍາໜ່າຍມີຄວາມເຕີບໃຫຍ່ຂະຫຍາຍຕົວ, ເຂັ້ມແຂງໄດ້ຮັບການພັດທະນາມີຄວາມຍືນຍົງ.
ໃນໂອກາດສະເຫຼີມສະຫຼອງວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ ຕາງໜ້າໃຫ້ພະນັກງານ-ລັດຖະກອນ, ກໍາມະກອນ, ຜູ້ປະກອບການດ້ານການພິມຈໍາໜ່າຍທຸກພາກສ່ວນຂະແໜງການ ການພິມຈໍາໜ່າຍຂໍສະແດງຄວາມຊົມເຊີຍ ແລະ ຂອບໃຈເປັນຢ່າງສູງຕໍ່ການນໍາພັກ-ລັດ ແລະ ທຸກພາກສ່ວນໃນສັງຄົມທີ່ໄດ້ປະກອບສ່ວນເຮັດໃຫ້ວຽກງານການພິມຈໍາໜ່າຍ ເຕີບໃຫຍ່ຂະຫຍາຍຕົວຮັບໃຊ້ສັງຄົມມາຕະຫຼອດ 74 ປີ. ຂໍອວຍພອນໄຊອັນປະເສີດແດ່ການນຳພັກ-ລັດທຸກຂັ້ນທຸກພາກສ່ວນ, ອົງການສື່ມວນຊົນ ແລະ ການພິມຈໍາໜ່າຍ, ພະນັກງານ-ລັດຖະກອນ, ກໍາມະກອນ, ຜູ້ປະກອບການດ້ານສື່ມວນຊົນ ແລະ ການພິມຈໍາໜ່າຍ ແລະ ປະຊາຊົນລາວບັນດາເຜົ່າ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ, ຄອບຄົວ, ປະສົບຜົນສໍາເລັດໃນໜ້າທີ່ວຽກງານອັນມີກຽດສະຫງ່າຂອງບັນດາທ່ານ ປະກອບສ່ວນໃນພາລະກິດປົກປັກຮັກສາ ສ້າງສາ ແລະ ພັດທະນາປະເທດໃຫ້ມີຄວາມຈະເລີນກ້າວໜ້າຂຶ້ນໄປຢ່າງບໍ່ຢຸດຢັ້ງ.
ຄໍາເຫັນ