ພົບປະກັບພະນັກງານທ້ອງຖິ່ນ ທີ່ເຮັດວຽກນໍາອົງການຕ່າງປະເທດ ຢູ່ ສປປ ລາວ

ໂອກາດນີ້, ທ່ານ ບໍວອນທັດ ດວງຈັກ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍທ່ານໄດ້ເນັ້ນເຖິງຄວາມໝາຍສໍາຄັນຂອງວຽກງານຄຸ້ມຄອງພະນັກງານທ້ອງຖິ່ນ (ແຮງງານລາວ) ທີ່ເຮັດວຽກກັບອົງການຕ່າງປະເທດ ທີ່ມີສໍານັກງານຕັ້ງຢູ່ ສປປ ລາວ ກໍຄືການປົກປ້ອງສິດ ແລະ ຜົນປະໂຫຍດຂອງແຮງງານລາວທີ່ເຮັດວຽກກັບອົງການຕ່າງປະເທດ ແລະ ການກະຕຸກຊຸກຍູ້ໃຫ້ທຸກໆອົງການຕ່າງປະເທດ ທີ່ມີສໍານັກງານຕັ້ງຢູ່ ສປປ ລາວ ປະຕິບັດຕາມລະບຽບຫຼັກການ ແລະ ກົດ ໝາຍຂອງ ສປປ ລາວ ຢ່າງເຂັ້ມງວດ ໂດຍສະເພາະບັນດານິຕິກໍາໃນຂົງເຂດແຮງງານ. ທ່ານຫົວໜ້າຫ້ອງການກະຊວງການຕ່າງປະເທດ ຍັງໄດ້ມີຄໍາເຫັນວ່າ: ການຈັດກອງປະຊຸມພົບປະພະນັກງານທ້ອງຖິ່ນ ແລະ ກິດຈະກໍາກິລາມິດຕິພາບຄັ້ງນີ້, ແມ່ນມີຄວາມໝາຍ ແລະ ຄວາມສໍາຄັນຫຼາຍຕໍ່ວຽກງານຄຸ້ມຄອງພະນັກງານທ້ອງຖິ່ນທີ່ເຂົ້າເຮັດວຽກນໍາອົງການຕ່າງປະເທດ ປະຈໍາ ຢູ່ ສປປ ລາວ ຊຶ່ງພະນັກງານທ້ອງຖິ່ນ ທີ່ເຮັດວຽກນໍາອົງການຕ່າງປະເທດເຫຼົ່ານີ້ ລ້ວນແຕ່ໄດ້ປະຕິບັດໜ້າທີ່ຂອງຕົນຕາມພາລະບົດບາດທີ່ແຕກຕ່າງກັນ ໃນແຕ່ລະອົງການຕ່າງປະເທດຕາມສັນຍາແຮງງານທີ່ເຊັນຮ່ວມກັນລະຫວ່າງ ອົງການຕ່າງປະເທດ ປະຈໍາ ສປປ ລາວ ກັບ ພະນັກງານທ້ອງຖິ່ນ (ແຮງງານລາວ).

ຄຽງຄູ່ກັນນັ້ນ, ພະນັກງານທ້ອງຖິ່ນເປັນສ່ວນໜຶ່ງທີ່ສໍາຄັນຕໍ່ການປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ, ສົ່ງເສີມສາຍພົວພັນ-ການຮ່ວມມືລະຫວ່າງ ສປປ ລາວ ກັບ ບັນດາສະຖານເອກອັກຄະລັດຖະທູດຕ່າງປະເທດ ປະຈໍາ ສປປ ລາວ, ບັນດາອົງການຈັດຕັ້ງສາກົນ, ອົງການເຄືອຂ່າຍ ສປຊ ປະຈໍາ ສປປ ລາວ ແລະ ບັນດາອົງການຕ່າງປະເທດທີ່ບໍ່ສັງກັດລັດຖະບານທີ່ມີສໍານັກງານ ຫຼື ພວມປະຕິບັດໜ້າທີ່ ຢູ່ ສປປ ລາວ ຊຶ່ງໄດ້ປະກອບສ່ວນເຮັດໃຫ້ການຮ່ວມມືເກີດດອກອອກຜົນ. ພ້ອມດຽວກັນນີ້, ທ່ານ ບໍວອນທັດ ດວງຈັກ ກໍຮຽກຮ້ອງໃຫ້ພະນັກງານທ້ອງຖິ່ນ (ແຮງງານລາວ) ເປັນເຈົ້າການໃນການຈັດຕັ້ງປະຕິບັດດໍາລັດ 456/ນຍ ລົງວັນທີ 1 ພະຈິກ 2010 ວ່າດ້ວຍການຄຸ້ມຄອງພະນັກງານທ້ອງຖິ່ນ ທີ່ເຮັດວຽກນໍາອົງການຕ່າງປະເທດປະຈໍາ ສປປ ລາວ ຊຶ່ງປັດຈຸບັນກໍາລັງຢູ່ໃນໄລຍະການປັບປຸງດັດແກ້ ເພື່ອໃຫ້ມີຄວາມຮັດກຸມ ແລະ ສອດຄ່ອງກັບສະພາບຕົວຈິງໃນໄລຍະໃໝ່ ແລະ ຄາດວ່າ ຈະຖືກນໍາໄປປຶກສາຫາລືໃນກອງປະຊຸມຄະນະລັດຖະບານໃນເດືອນກໍລະກົດ 2025 ນີ້.

ນອກຈາກນັ້ນ, ໃນກອງປະຊຸມຍັງໄດ້ຮັບຟັງການລາຍງານໂດຍຫຍໍ້ ກ່ຽວກັບວຽກງານຄຸ້ມຄອງພະນັກງານທ້ອງຖິ່ນໃນໄລຍະຜ່ານມາ, ໄດ້ມີການແລກປ່ຽນຄໍາເຫັນຈາກຜູ້ເຂົ້າຮ່ວມກອງປະຊຸມຢ່າງກົງໄປກົງມາ ແລະ ສ້າງສັນ. ຫຼັງຈາກກອງປະຊຸມໄດ້ສໍາເລັດ, ກໍໄດ້ຈັດກິດຈະກໍາແຂ່ງຂັນກິລາເປຕັງ ລະຫວ່າງ ພະນັກງານຫ້ອງການບໍລິການສະຖານທູດ ແລະ ພະນັກງານທ້ອງຖິ່ນທີ່ເຂົ້າເຮັດວຽກນນໍາອົງການຕ່າງປະເທດ ທີ່ ປະຈໍາ ຢູ່ ສປປ ລາວ ດ້ວຍບັນຍາກາດທີ່ສ້າງສັນ ມີໄມຕີຈິດມິດຕະພາບ ແລະ ເປັນຂະບວນຟົດຟື້ນ.

(ຂ່າວ : ກະຊວງຕ່າງປະເທດ, ພາບ: ແສງຈັນ)