ຜູ້ລະເມີດຕໍ່ກົດໝາຍ-ກົດລະບຽບການຄວບຄຸມຢາສູບຈະຖືກປັບໃໝ

ໂດຍ: ວັນເພັງ
ວຽກງານການຄວບຄຸມຢາສູບ ເປັນໜຶ່ງວຽກງານສຳຄັນຫຼາຍທີ່ລັດຖະບານໄດ້ເອົາໃຈໃສ່ໃຫ້ຄວາມສຳຄັນ ແລະ ເປັນຫ່ວງເປັນໃຍຕໍ່ສຸຂະພາບຂອງພົນລະເມືອງລາວ ຈຶ່ງໄດ້ອອກດຳລັດວ່າດ້ວຍການປັບໃໝແລະນຳໃຊ້ມາດຕະການອື່ນຕໍ່ການລະເມີດກົດໝາຍກົດລະບຽບການກ່ຽວກັບການຄວບຄຸມຢາສູບເລກທີ 52/ລບ, ລົງວັນທີ 21 ກຸມພາ 2019 ແນໃສ່ເພື່ອຫຼຸດຜ່ອນການຊົມໃຊ້ຢາສູບ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
ອີງຕາມດຳລັດດັ່ງກ່າວ, ໃນມາດຕາ 6 ການບໍ່ພິມສະຫຼາກ ແລະ ຄໍາເຕືອນສຸຂະພາບໃສ່ວັດຖຸຫຸ້ມຫໍ່ ຖ້າຫາກບຸກຄົນ ຫຼືນິຕິບຸກຄົນທີ່ຜະລິດ, ນໍາເຂົ້າຜະລິດຕະພັນຢາສູບໃນ ສປປ ລາວ ຫາກບໍ່ພິມສະຫຼາກ ແລະ ຄຳເຕືອນສຸຂະພາບເປັນຮູບພາບ ແລະ ຂໍ້ຄວາມໂຕໜັງສືໃສ່ວັດຖຸຫຸ້ມຫໍ່ຕາມການກໍານົດຂອງກະຊວງສາທາລະນະສຸກຈະຖືກປັບໃໝ ແລະ ນໍາໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກປັບໃໝ 10 ລ້ານກີບ, ຄັ້ງທີສອງຈະຖືກປັບໃໝ20 ລ້ານກີບ, ຄັ້ງທີສາມຂຶ້ນໄປຈະຖືກປັບໃໝຄັ້ງລະ 50 ລ້ານກີບ ພ້ອມທັງສະເໜີໃຫ້ຂະແໜງການກ່ຽວຂ້ອງພິຈາລະນາໂຈະ ຫຼືຖອນໃບອະນຸຍາດດໍາເນີນທຸລະກິດ. ພ້ອມນັ້ນ, ຈະຖືກຢຶດ ແລະ ທຳລາຍຖິ້ມ; ມາດຕາ 7 ການໂຄສະນາຜະລິດຕະພັນຢາສູບບຸກຄົນຫຼືນິຕິບຸກຄົນຫາກລະເມີດກົດໝາຍ ແລະ ລະບຽບການກ່ຽວກັບການໂຄສະນາຜະລິດຕະພັນຢາສູບຈະຖືກປັບໃໝ ແລະ ນໍາໃຊ້ມາດຕະການອື່ນໆດັ່ງນີ້: ຄັ້ງທີໜຶ່ງຈະຖືກປັບໃໝ 20 ລ້ານກີບ, ຄັ້ງທີສອງຈະຖືກປັບໃໝ 40 ລ້ານກີບ ແລະ ຄັ້ງທີສາມຂຶ້ນໄປຈະຖືກປັບໃໝຄັ້ງລະ 80 ລ້ານກີບ ພ້ອມທັງສະເໜີໃຫ້ຂະແໜງການກ່ຽວຂ້ອງພິຈາລະນາໂຈະຫຼືຖອນໃບອະນຸຍາດດຳເນີນທຸລະກິດ.ຕໍ່ມາດຕາ 8 ການບໍ່ຕິດປ້າຍໃນສະຖານທີ່ຫ້າມສູບຢາເຈົ້າຂອງສະຖານທີ່ຫຼືຜູ້ດໍາເນີນທຸລະກິດຫາກບໍ່ຕິດປ້າຍໃນສະຖານທີ່ຫ້າມສູບຢາທີ່ຢູ່ໃນຄວາມຮັບຜິດຊອບຂອງຕົນຈະຖືກປັບໃໝແລະນໍາໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກສຶກສາອົບຮົມແລະກ່າວເຕືອນ, ຄັ້ງທີສອງຈະຖືກປັບໃໝ 1 ລ້ານກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 2 ລ້ານກີບ. ຕໍ່ມາດຕາ 9 ການສູບຢາໃນສະຖານທີ່ຫ້າມສູບຢາບຸກຄົນຫາກສູບຢາລວມທັງຢາສູບເອເລັກໂຕຣນິກແລະ ຢາສູບຊິຊາໃນສະຖານທີ່ຫ້າມສູບຢາຈະຖືກປັບໃໝແລະນຳໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກສຶກສາອົບຮົມແລະກ່າວເຕືອນ, ຄັ້ງທີສອງຈະຖືກປັບໃໝ2 ແສນກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 4 ແສນກີບ. ໃນນັ້ນ, ບຸກຄົນຫຼືນິຕິບຸກຄົນທີ່ເປັນເຈົ້າຂອງສະຖານທີ່ຫາກເມີນເສີຍຫຼືປະປ່ອຍໃຫ້ມີການສູບຢາລວມທັງຢາສູບເອເລັກໂຕຣນິກແລະ ຢາສູບຊິຊາຈະຖືກປັບໃໝແລະນໍາໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກສຶກສາອົບຮົມແລະກ່າວເຕືອນ, ຄັ້ງທີສອງຈະຖືກປັບໃໝ1 ລ້ານກີບ, ຄັ້ງທີສາມຂຶ້ນໄປຈະຖືກປັບໃໝຄັ້ງລະ 5 ລ້ານກີບ.ຕໍ່ມາດຕາ 10 ການຂາຍຫຼືຈໍາໜ່າຍຜະລິດຕະພັນຢາສູບໃນສະຖານທີ່ເກືອດຫ້າມ: ບຸກຄົນຫຼືນິຕິບຸກຄົນຫາກຂາຍຫຼືຈໍາໜ່າຍຜະລິດຕະພັນຢາສູບໃນສະຖານທີ່ເກືອດຫ້າມຈະຖືກປັບໃໝແລະນໍາໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກສຶກສາອົບຮົມແລະກ່າວເຕືອນ, ຄັ້ງທີສອງຈະຖືກປັບໃໝ5 ແສນກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 1 ລ້ານກີບ. ຕໍ່ມາດຕາ 11 ການຂາຍຢາສູບໃຫ້ເດັກຫຼືໃຫ້ເດັກຊື້ຫຼືຂາຍຜະລິດຕະພັນຢາສູບບຸກຄົນຫຼືນິຕິບຸກຄົນຫາກຂາຍຢາສູບໃຫ້ເດັກທີ່ມີອາຍຸຕໍ່າກວ່າ18 ປີຈະຖືກປັບໃໝແລະນໍາໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກປັບໃໝ2 ລ້ານກີບ; ຄັ້ງທີສອງຈະຖືກປັບໃໝ4 ລ້ານກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 8 ລ້ານກີບ.ບຸກຄົນຫຼືນິຕິບຸກຄົນຫາກໃຫ້ເດັກທີ່ມີອາຍຸຕໍ່າກວ່າ18ປີຊື້ຫຼືຂາຍຜະລິດຕະພັນຢາສູບຈະຖືກບັບໃໝແລະນໍາໃຊ້ມາດຕະການອື່ນດັ່ງນີ້: ຄັ້ງທີໜຶ່ງຈະຖືກສຶກສາອົບຮົມແລະກ່າວເຕືອນ, ຄັ້ງທີສອງຈະຖືກປັບໃໝ1 ລ້ານກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 2 ລ້ານກີບ. ຕໍ່ມາດຕາ 12 ການຂາຍຜະລິດຕະພັນຢາສູບດ້ວຍເຄື່ອງຈັກອັດຕະໂນມັດບຸກຄົນຫຼືນິຕິບຸກຄົນຫາກຂາຍຜະລິດຕະພັນຢາສູບດ້ວຍເຄື່ອງຈັກອັດຕະໂນມັດຈະຖືກປັບໃໝ5 ລ້ານກີບຕໍ່ເຄື່ອງພ້ອມທັງຢຶດແລະທຳລາຍຖິ້ມ.ບຸກຄົນຫຼືນິຕິບຸກຄົນຫາກນໍາເຂົ້າ, ຂາຍຫຼືຈຳໜ່າຍເຄື່ອງຈັກອັດຕະໂນມັດຂາຍຜະລິດຕະພັນຢາສູບຈະຖືກປັບໃໝ10 ລ້ານກີບຕໍ່ເຄື່ອງພ້ອມທັງຢຶດແລະທຳລາຍຖິ້ມ. ຕໍ່ມາດຕາ 13 ການຜະລິດ, ນໍາເຂົ້າ, ຈໍາໜ່າຍຫຼືຂາຍຢາຊອງທີ່ບັນຈຸຕໍ່າກວ່າຊາວກອກ, ຢາຊອງຫຼືຢາກະປ໋ອງເປັນກອກແລະຜະລິດຕະພັນຢາສູບນອກລະບົບທຸກຮູບການບຸກຄົນຫຼືນິຕິບຸກຄົນຫາກຜະລິດ, ນໍາເຂົ້າຫຼືຈໍາໜ່າຍຢາຊອງທີ່ບັນຈຸຕໍ່າກວ່າຊາວກອກຈະຖືກປັບໃໝແລະມາດຕະການອື່ນດັ່ງນີ້: ຄັ້ງທີໜຶ່ງຈະຖືກປັບໃໝ10ລ້ານກີບ; ຄັ້ງທີສອງຈະຖືກປັບໃໝ20 ລ້ານກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 50 ລ້ານກີບພ້ອມທັງສະເໜີໃຫ້ຂະແໜງການທີ່ກ່ຽວຂ້ອງພິຈາລະນາໂຈະຫຼືຖອນໃບອະນຸຍາດດໍາເນີນທຸລະກິດ.ບຸກຄົນຫຼືນິຕິບຸກຄົນຫາກຂາຍຢາຊອງ ຫຼືຢາກະປ໋ອງເປັນກອກຈະຖືກປະຕິບັດມາດຕະການດັ່ງນີ້: ຄັ້ງທີໜຶ່ງຈະຖືກສຶກສາອົບຮົມແລະກ່າວເຕືອນ, ຄັ້ງທີສອງຈະຖືກປັບໃໝ2 ລ້ານກີບ; ຄັ້ງທີສາມຂຶ້ນໄປຈະຖືກປັບໃໝຄັ້ງລະ 5 ລ້ານກີບ.ບຸກຄົນຫຼືນິຕິບຸກຄົນຫາກຜະລິດ, ນໍາເຂົ້າຫຼືຈໍາໜ່າຍຢາສູບນອກລະບົບທຸກຮູບການຈະຖືກປັບໃໝແລະມາດຕະການອື່ນດັ່ງນີ້: ຄັ້ງທີໜຶ່ງຈະຖືກປັບໃໝໜຶ່ງເທົ່າກັບມູນຄ່າສິນຄ້າທັງໝົດ; ຄັ້ງທີສອງຈະຖືກປັບໃໝສອງເທົ່າກັບມູນຄ່າສິນຄ້າທັງໝົດ; ຄັ້ງທີສາມຈະຖືກປັບໃໝສາມເທົ່າຂອງມູນຄ່າສິນຄ້າທັງໝົດພ້ອມທັງສະເໜີໃຫ້ຂະແໜງການທີ່ກ່ຽວຂ້ອງພິຈາລະນາໂຈະຫຼືຖອນໃບອະນຸຍາດດໍາເນີນທຸລະກິດ ພ້ອມທັງຈະຖືກຢຶດແລະທຳລາຍຖິ້ມ.
(ຂໍ້ມູນຈາກ: ດໍາລັດວ່າດ້ວຍການປັບໃໝແລະນຳໃຊ້ມາດຕະການອື່ນຕໍ່ການລະເມີດກົດໝາຍກົດລະບຽບການກ່ຽວກັບການຄວບຄຸມຢາສູບເລກທີ 52/ລບ, ລົງວັນທີ 21 ກຸມພາ 2019)