 |
ໃນພິທີ, ສະຫາຍ ພັທ ແສງເພັດ ສຸທໍາມະວົງ ຄະນະພັກຮາກຖານ ຮອງກອງບັນຊາການ ປກສ ເມືອງ ໄດ້ຂຶ້ນກ່າວຈຸດປະສົງສະເໜີແຂກ ແລະ ຜ່ານມະຕິຕົກລົງວ່າດ້ວຍ ການອະນຸມັດໃຫ້ຄະນະພັກຮາກຖານກອງບັນຊາການ ປກສ ເມືອງ ເປີດກອງປະຊຸມບັ້ນດໍາເນີນຊີວິດການເມືອງ, ການປະເມີນຜົນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2026, ເອກະສານເລກທີ 028/ຄປພ.ທຄ, ລົງວັນທີ 8 ຕຸລາ 2026. ບັ້ນດໍາເນີນຊີວິດການເມືອງທົ່ວກໍາລັງປ້ອງກັນຄວາມສະຫງົບ ເມືອງທຸລະຄົມ ໃນຄັ້ງນີ້ ຈະໄດ້ດໍາເນີນເປັນເວລາ 4 ວັນ (ວັນທີ 9-14 ຕຸລາ 2026) ຈຶ່ງຈະສໍາເລັດ.
 |
ການດໍາເນີນຊີວິດການເມືອງຄັ້ງນີ້, ຈະໄດ້ເຊື່ອມຊຶມ 5 ເອກະສານຄື: 1. ເສີມຂະຫຍາຍທາດແທ້ມູນເຊື້ອປະຕິວັດອັນສະຫງ່າງາມຂອງກອງກໍາລັງປ້ອງກັນຄວາມສະຫງົບປະຊາຊົນ; 2. ຕັ້ງໜ້າຝຶກຝົນຫຼໍ່ຫຼອມຄຸນສົມບັດສິນທໍາປະຕິວັດ ແລະ ປັບປຸງແບບແຜນວິທີເຮັດວຽກຂອງນາຍ ແລະ ພົນຕໍາຫຼວດ; 3. ຈັນຍາທໍາ, ຈັນຍາບັນຂອງນາຍ ແລະ ພົນຕໍາຫຼວດ; 4. ຂໍ້ຕົກລົງສະບັບເລກທີ 564/ປກສ, ລົງວັນທີ 3 ເມສາ 2019 ວ່າດ້ວຍຂໍ້ຫ້າມ ສໍາລັບນາຍ ແລະ ພົນຕໍາຫຼວດ; 5. ຂໍ້ກໍານົດສະບັບເລກທີ 31/ຄພ ປກສ ລົງວັນທີ 17 ສິງຫາ 2026 ວ່າດ້ວຍການຂະຫຍາຍພັກ ໃນກໍາລັງປ້ອງກັນຄວາມສະຫງົບປະຊາຊົນ.
 |
ໃຫ້ກຽດເຜີຍແຜ່ໂດຍ ສະຫາຍ ພັທ ສິນນະຄອນ ແສງສັກດາ ຫົວໜ້າ ປກສ ເມືອງ. ຫຼັງຈາກນັ້ນ, ສະຫາຍ ພັທ ແສງເພັດ ສຸທໍາມະວົງ ໄດ້ຂຶ້ນຜ່ານແຜນການຈັດຕັ້ງດໍາເນີນຊີວິດການເມືອງ, ໃນການຈັດຕັ້ງປະຕິບັດວຽກງານໃນໄລຍະຜ່ານມາ. ພ້ອມນີ້, ຍັງໄດ້ຜ່ານຂໍ້ຕົກລົງວ່າດ້ວຍການແບ່ງຈຸ, ແບ່ງໜ່ວຍເພື່ອດໍາເນີນການສໍາຫຼວດຕົນເອງ, ຈຸດປະສົງກໍເພື່ອເປັນການສໍາຫຼວດກວດກາຄືນສະຕິຄວາມຮັບຜິດຊອບຕໍ່ໜ້າທີ່ການເມືອງ, ການເຝຶກຝົນຫຼໍ່ຫຼອມຄຸນສົມບັດສິນທໍາປະຕິວັດ, ແບບແຜນວິທີເຮັດວຽກຂອງນາຍ ແລະ ພົນຕໍາຫຼວດ ຢູ່ໃນກອງກໍາລັງປ້ອງກັນຄວາມສະຫງົບ ເພື່ອປະຕິບັດນະໂຍບາຍຕ່າງໆໃຫ້ສອດຄ່ອງ ແລະທົ່ວເຖິງ.
 |
ການຜ່ານບັ້ນດໍາເນີນຊີວິດການເມືອງຈະເຮັດໃຫ້ນາຍ ແລະ ພົນຕໍາຫຼວດທຸກສະຫາຍ ມີການຫັນປ່ຽນຢ່າງຈະແຈ້ງ ຕັ້ງໜ້າເຝຶກຝົນຫຼໍ່ຫຼອມຄຸນສົມບັດສິນທໍາປະຕິວັດ ເພື່ອເຮັດໃຫ້ນາຍ ແລະ ພົນຕໍາຫຼວດ ມີຄຸນທາດການເມືອງໜັກແໜ້ນ, ມີຄວາມຮັບຜິດຊອບສູງ ໃນການປະຕິບັດໜ້າທີ່ຂອງຕົນ.
ພາບ-ຂ່າວ ແວວເງິນ ກອງມະນີ
ຄໍາເຫັນ