ເພື່ອເປັນການຊຸກຍູ້ສົ່ງເສີມອະນຸລັກປົກປັກຮັກສາວັດທະນະທຳຮີດຄອງປະເພນີອັນດີງາມຂອງຊາດໄວ້ໃຫ້ຄົງຢູ່ຄູ່ກັບຊາດລາວຄົນລາວຢ່າງຍືນຍົງ ເພື່ອເປັນການຊຸກຍູ້ສົ່ງເສີມການທ່ອງທ່ຽວລາວ ພວກເຮົາຄົນລາວສຸດທີ່ພູມໃຈໃນຄວາມເປັນລາວ ພູມໃຈໃນວັດທະນະທຳລາວ.
ແມ່ສະໝອນ ສຸກສຳລານ ປະຊາຊົນບ້ານຫົວເມືອງ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນ ໃນໂອກາດມາທ່ຽວງານບຸນນະມັດສະການພະທາດຫຼວງວຽງຈັນປະຈຳປີ 2024 ນີ້ວ່າ: ນັບແຕ່ຮຽນໜັງສືແລ້ວ ແມ່ກໍ່ໄປຢູ່ຕ່າງປະເທດ ແຕ່ກໍກັບມາຢາມເມືອງລາວທຸກໆປີ ເພາະມັກເມືອງລາວ ແມ່ຢູ່ແຄຣິຟໍເນຍ ສະຫະລັດອາເມຣິກາ, ໄປຢູ່ຕ່າງປະເທດໄດ້ 48 ປີແລ້ວກັບມາຢ້ຽມຢາມບ້ານເກີດເມືອງນອນເທື່ອນີ້ເຫັນວ່າປະເທດລາວມີຄວາມຈະເລີນກ້າວໜ້າຫຼາຍ ງາມກ່ອນເກົ່າ ໄປບ່ອນໃດກໍຈະເລີນຫູຈະເລີນຕາ.ເວົ້າສະເພາະການຈັດງານບຸນນະມັດສະການພະທາດຫຼວງວຽງຈັນຖືເປັນງານບຸນປະເພນີລາວເຮົາທີ່ເຄີຍປະຕິບັດສືບທອດກັນມາປະຊາຊົນລາວທັງຊາດຕ່າງກໍຮັກ ແລະ ຫວງແຫນໃນວັດທະນະທຳອັນສວຍງາມນີ້ໄວ້ໃຫ້ລູກຫຼານ ແລະ ໄດ້ມີການຈັດງານສະເຫຼີມສະຫຼອງບຸນພະທາດຫຼວງຂຶ້ນທຸກໆປີ. ພິເສດການຈັດງານບຸນປີນີ້ເຫັນວ່າຍິ່ງໃຫຍ່, ເປັນລະບຽບຮຽບຮ້ອຍ ແລະ ຈົບງາມຫຼາຍໆ ມີບັນຍາກາດຄຶກຄື້ນມ່ວນຊື່ນມີປະຊາຊົນເຂົ້າມາທ່ຽວງານຫຼາຍກວ່າທຸກໆປີທີ່ຜ່ານມາ. ຈຸດເດັ່ນແມ່ນການຮັກສາຮີດຄອງປະເພນີ ຊຶ່ງສະແດງໃຫ້ເຫັນເຖິງຄວາມສາມັກຄີ ຮັກເຊື້ອແພງຊາດຂອງປະຊາຊົນລາວຢ່າງແທ້ຈິງ ພາຍໃນງານບຸນເຫັນວ່າມີຫຼາຍກິດຈະກໍາທີ່ໜ້າສົນໃຈເພື່ອຊຸກຍູ້ສົ່ງເສີມປີທ່ອງທ່ຽວລາວ 2024 ໃຫ້ຮັກສາໄດ້ວັດທະນະທຳອັນດີງາມ ເປັນຕົ້ນການປະດັບປະດາຮ້ານຄ້າໄດ້ຕົບແຕ່ງເປັນເອກະລັກຂອງລາວ ໂດຍສະເພາະປະຕູໂຂງທາງເຂົ້າງານໄດ້ຕົບແຕ່ງປະດັບປະດາດ້ວຍແຄນຄຽງຄູ່ກັບກອງຫາງ ພ້ອມປະດັບປະດາດ້ວຍກະຕິບເຂົ້າໃຫຍ່ທີ່ເປັນເອກະລັກວັດທະນະທຳລາວຢ່າງສວຍງາມ ແລະ ອື່ນໆ. ການຈັດສັນຮ້ານຂາຍເຄື່ອງມີຄວາມເປັນລະບຽບຮຽບຮ້ອຍດີກ່ອນຄັ້ງຜ່ານມາ ການໄປມາກໍມີຄວາມສະດວກດີ.
ດັ່ງນັ້ນ, ແມ່ຂໍເຊີນຊວນຄົນທີ່ເຄີຍຢູ່ເມືອງລາວໃຫ້ມາຢ້ຽມຢາມເມືອງລາວ ເພາະເມືອງລາວມີຄວາມຈະເລີນກ້າວໜ້າຫຼາຍ ທຸກຢ່າງມີການພັດທະນາດີຂຶ້ນພວກເຮົາຄົນລາວຕ້ອງມາສະໜັບສະໜູນເມືອງລາວໃຫ້ມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ.
ຄໍາເຫັນ