ໝາຍຄວາມວ່າຂົງເຂດທີ່ເຮົາມີຄວາມຖະໜັດ ແລະ ຄຸກຄີຢູ່ແລ້ວ ໂດຍສະເພາະ ດ້ານກະສິກຳ ເນື່ອງຈາກຂ້າພະເຈົ້າ ເປັນປະທານສະມາຄົມນັກທຸລະກິດກະສິກຳລາວ ເຮັດ ທຸລະກິດດ້ານນີ້ໂດຍກົງ ແລະ ໄດ້ມີການຊຸກຍູ້-ສົ່ງເສີມຊາວສິກອນ ໃນການຜະລິດກະສິກຳເປັນສິນຄ້າຢູ່ແລ້ວ. ອີກດ້ານໜຶ່ງ, ໄດ້ເຄື່ອນໄຫວຮ່ວມກັບພັກ-ລັດ ໃນການນຳເອົານະໂຍບາຍ ແລະ ທິດທາງຂອງພັກ-ລັດ ມາຈັດຕັ້ງປະຕິບັດ ຊຶ່ງສຳຜັດໄດ້ວ່າ: ພັກ-ລັດ ມີຄວາມເປັນຫ່ວງເປັນໃຍຕໍ່ປະຊາຊົນ, ແຕ່ປະຊາຊົນ ກໍຍັງຕ້ອງການພາກທຸລະກິດ ເພື່ອເປັນຂົວຕໍ່ໃນການນຳເອົານະໂຍບາຍ ແລະ ວິທີການເຮັດທຸລະກິດໄປສົມທົບໃນການຊຸກຍູ້-ສົ່ງເສີມຮ່ວມກັບພາກລັດ. ພາກລັດເຮັດວຽກງານມະຫາພາກ, ສ່ວນພວກເຮົາເນັ້ນໃສ່ວຽກງານຈຸລະພາກ. ສະນັ້ນ, ຈະປະກອບສ່ວນ ເພື່ອຊ່ວຍໃຫ້ປະຊາຊົນນຳໃຊ້ທ່າແຮງ ເຂົາເຈົ້າທີ່ມີຜະລິດອອກມາເປັນສິນ ຄ້າ ແລະ ສ້າງລາຍຮັບໃຫ້ໄດ້ຫຼາຍຂຶ້ນ. ພວກເຮົາມີທ່າແຮງ, ມີໂອກາດ ແຕ່ ເຮົາພຽງແຕ່ຂາດບາງປັດໄຈ ແລະ ຍັງ ມີບາງຢ່າງຂໍ້ຄົງຄ້າງທີ່ຕ້ອງໄດ້ສຸມໃສ່ ແກ້ໄຂ. ຖ້າພວກເຮົາເຮັດໄດ້, ມີການ ຜະລິດ ປະຊາຊົນກໍຈະມີລາຍໄດ້, ສາມາດສ້າງລາຍໄດ້ຢູ່ບ້ານເກີດເມືອງນອນຂອງຕົນເອງ, ຖ້າມີຢູ່ມີກິນ ກໍບໍ່ ຕ້ອງຍ້າຍຖິ່ນຖານໄປທຳມາຫາກິນຢູ່ ບ່ອນອື່ນ. ພວກເຮົາຮູ້ແລ້ວວ່າຈະຜະລິດຫຍັງ, ຂາຍຢູ່ໃສ ແລະ ຈະເອົາທຶນມາຈາກໃສ ເພື່ອຊ່ວຍເຫຼືອຊຸກຍູ້-ສົ່ງເສີມ; ສໍາລັບ ແຮງງານແມ່ນວຽກທີ່ເຮັດເປັນອາຊີບ ຢູ່ແລ້ວທັງໃນການພັດທະນາແຮງງານ ແລະ ການຈັດຫາງານທັງພາຍໃນ ແລະ ຕ່າງປະເທດ. ເຊື່ອໝັ້ນວ່າ: ຈະສາມາດປະກອບສ່ວນຮ່ວມກັບກະຊວງແຮງງານ ແລະ ສະຫວັດດີການສັງຄົມ ໃນການຝຶກສີມືແຮງງານ ແລະ ຈັດຫາວຽກເຮັດງານທຳໃຫ້ເຂົາເຈົ້າ. ມີບາງທັກສະ ຫຼື ບາງອາຊີບທີ່ໃຊ້ເວລາຝຶກບໍ່ໄດ້ຍາກ ຕົວຢ່າງ: ຝຶກພາສາຈີນ, ເກົາຫຼີ, ຍີ່ປຸ່ນ ໃຊ້ເວລາພຽງ 4-5 ເດືອນ ກໍສາມາດສື່ສານໄດ້ ແລະ ເປັນທີ່ຕ້ອງການຂອງຕະຫຼາດແຮງງານທັງພາຍໃນ ແລະ ຕ່າງປະເທດ. ຖ້າພວກ ເຮົາສ້າງໂອກາດໃຫ້ຜູ້ທີ່ທຸກຍາກ ແລະ ດ້ອຍໂອກາດປ່ຽນຈາກລາຍຮັບ 0 ກີບ ມາເປັນ 30-40 ລ້ານກີບຕໍ່ເດືອນ, ຊີວິດຂອງເຂົາເຈົ້າກໍຈະດີຂຶ້ນ ແລະ ບໍ່ໄປເຮັດສິ່ງທີ່ຜິດຕໍ່ລະບຽບກົດໝາຍ.
ທ່ານ ບຸນທ່ຽງ ລັດຕະນະວົງ ຍັງກ່າວເຖິງແຮງບັນດານໃຈໃນການສະໝັກເປັນ ສສຊ ໃນຊຸດນີ້ວ່າ: ເຖິງວ່າຂ້າພະເຈົ້າຈະເປັນພາກທຸລະກິດ ແຕ່ກໍເປັນທຸລະກິດທີ່ເຄື່ອນໄຫວໃກ້ ຊິດຕິດແທດກັບພັກ-ລັດ ແລະ ເຫັນ ໄດ້ເຖິງຄວາມຫ່ວງໃຍຂອງພັກ-ລັດ ທີ່ມີຕໍ່ປະຊາຊົນ ແລະ ເຫັນວ່າປະຊາຊົນ ຍັງຂາດຫຼາຍຢ່າງບໍ່ວ່າຈະເປັນການຂາດຂໍ້ມູນ, ທຶນຮອນ ແລະ ເຕັກນິກວິຊາການ, ຖ້າໄດ້ເປັນອີກແຮງໜຶ່ງທີ່ເຂົ້າໄປຊ່ວຍເຫຼືອປະຊາຊົນກໍຈະເຮັດໃຫ້ປະຊາຊົນມີຊີວິດການເປັນຢູ່ດີຂຶ້ນ ໂດຍອີງໃສ່ພື້ນຖານທີ່ຂ້າພະເຈົ້າເຮັດວຽກໃກ້ຊິດກັບປະຊາຊົນ ແລະ ສະມາຊິກ, ເຮັດວຽກຮ່ວມກັບ ສ່ວນລວມມາໂດຍຕະຫຼອດຢູ່ແລ້ວ ບວກກັບຂ້າພະເຈົ້າເປັນຄົນທີ່ມີຈິດໃຈຮັກມັກໃນການຊ່ວຍເຫຼືອສັງຄົມ ກໍຄື ປະຊາຊົນ ພ້ອມທີ່ຈະປະກອບສ່ວນຢ່າງເຕັມທີ່ ເພື່ອໃຫ້ປະຊາຊົນມີຊີວິດການເປັນຢູ່ທີ່ດີຂຶ້ນ.
ຄໍາເຫັນ