ຜູ້ສະໝັກຮັບເລືອກຕັ້ງ ສສຊ ແຂວງຈຳປາສັກ​ ຢ້ຽມຢາມ​ໂຄງການຊົນລະປະທານອ່າງເກັບນ້ຳຫ້ວຍວັງເຫ

ໂອກາດນີ້, ທ່ານ ໄກສອນ ຈັນທະສອນ ໄດ້ລາຍງານກ່ຽວກັບໂຄງການໂດຍຫຍໍ້ວ່າ: ການຈັດຕັ້ງປະຕິບັດໂຄງການຊົນລະປະທານອ່າງເກັບນ້ຳຫ້ວຍວັງເຫ ປັດຈຸບັນ ເປັນໄລຍະທີ 2 ສືບຕໍ່ກໍ່ສ້າງລະບົບຫົວງານທີ່ຍັງເຫຼືອໃຫ້ສໍາເລັດ ແລະ ກໍ່ສ້າງຄອງເໝືອງຈໍານວນໜຶ່ງ ມີມູນຄ່າລວມ 130 ຕື້ກີບ ແລະ ຈຸຂຸ້ນຂ້ຽວຈັດຕັ້ງປະຕິບັດໃຫ້ສໍາເລັດ ເພື່ອສືບຕໍ່ໄລຍະທີ 3 ໂດຍສູມໃສ່ກໍ່ສ້າງລະບົບຄອງເໝືອງທີ່ຍັງເຫຼືອໃຫ້ສໍາເລັດທັງໝົດ ຊຶ່ງມີມູນຄ່າຕາມການປະເມີນໃນເບື້ອງຕົ້ນແມ່ນ 137 ຕື້ກີບ. ປັດຈຸບັນ ອ່າງເກັບນໍ້າຊົນລະປະທານ ອ່າງເກັບນໍ້າຫ້ວຍວັງເຫ ໄດ້ປິດປະຕູນໍ້າເພື່ອເກັບກັກນໍ້າໄວ້ຮັບໃຊ້ແກ່ການຜະລິດຂອງປະຊາຊົນ ຕາມຈຸດປະສົງເປົ້າໝາຍຂອງໂຄງການທີ່ວາງໄວ້ ເພື່ອສະໜອງນໍ້າໃຫ້ແກ່ເນື້ອທີ່ການຜະລິດຂອງປະຊາຊົນ ຈໍານວນ 2,500 ເຮັກຕາ (ໃນລະດູຝົນ) ແລະ 1,500 ເຮັກຕາ (ໃນລະດູແລ້ງ), ຄາດວ່າຈະມີປະຊາຊົນ 1,760 ຄອບຄົວ ໄດ້ຮັບຜົນປະໂຫຍດ. ສໍາລັບແຜນພັດທະນາໜ້າອ່າງເກັບນໍ້າຫ້ວຍວັງເຫໃນຕໍ່ໜ້າ ທາງບໍລິສັດ ຈະລ້ຽງປາເປັນສິນຄ້າ ແລະ ພັດທະນາດ້ານການທ່ອງທ່ຽວ. ນອກນີ້, ຍັງມີເງື່ອນໄຂເໝາະສົມ ໃນການນໍາໃຊ້ເປັນບ່ອນຕິດຕັ້ງແຜງໂຊລາ ເພື່ອຜະລິດໄຟຟ້າດ້ວຍພະລັງງານແສງຕາເວັນຕື່ມອີກ.

ທ່ານ ອາລຸນໄຊ ສູນນະລາດ ໄດ້ມີຄໍາເຫັນເຈາະ ແລະ ເນັ້ນໜັກໃຫ້ເອົາໃຈໃສ່ກ່ຽວກັບການກະກຽມຄວາມພ້ອມໃນການຕອບສະໜອງນໍ້າແກ່ການຜະລິດຂອງປະຊາຊົນ, ເອົາໃຈໃສ່ການຊົດເຊີຍເນື້ອທີ່ດິນຂອງປະຊາຊົນ ທີ່ໄດ້ຮັບຜົນກະທົບຈາກໂຄງການ. ນອກນີ້, ກໍເອົາໃຈໃສ່ມາດຕະຖານຄວາມປອດໄພຂອງອ່າງເກັບນໍ້າ ຕ້ອງຕິດຕາມກວດກາຢ່າງເປັນປົກກະຕິ ແລ້ວເຄື່ອນໄຫວໂຄສະນາເຜີຍແຜ່ໃຫ້ຄະນະພັກ - ອົງການປົກຄອງບ້ານ ແລະ ພໍ່ແມ່ປະຊາຊົນບັນດາບ້ານ ທີ່ນອນໃນພື້ນທີ່ຂອງໂຄງການ ໃຫ້ຮັບຮູ້ເຂົ້າໃຈກ່ຽວກັບຈຸດປະສົງ ແລະ ເປົ້າໝາຍຂອງໂຄງການ ເພື່ອມີຄວາມໝັ້ນໃຈໃນການທໍາມາຫາກິນ ກໍຄືການພັດທະນາຊີວິດການເປັນຢູ່ ໃຫ້ນັບມື້ດີຂຶ້ນເລື້ອຍໆ.

ໂຄງການຊົນລະປະທານ ອ່າງເກັບນໍ້າຫ້ວຍວັງເຫ ມີຄວາມສາມາດເກັບກັກນໍ້າໄດ້ທັງໝົດ 47 ລ້ານແມັດກ້ອນ.ໃນນີ້, ນໍ້າທີ່ສາມາດນໍາໃຊ້ເຮັດການຜະລິດໄດ້ປະມານ 37 ລ້ານແມັດກ້ອນ ແລະ ນໍ້າທີ່ເຫຼືອໄວ້ໃນອ່າງປະມານ 10 ລ້ານແມັດກ້ອນ.

(ຂ່າວ-ພາບ: ທູນທອງໃຈ)