ຕາມການລາຍງານຂອງ ທ່ານ ສົມຈິດ ວໍລະວົງ ປະທານສານປະຊາຊົນແຂວງເຊກອງ ໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງ (ສພຂ) ເຊກອງ ຊຸດທີ II ໃນວັນທີ 5 ມັງກອນ 2024 ວ່າ: ສານປະຊາຊົນແຂວງ ແລະ ເຂດໄດ້ເອົາໃຈໃສ່ຄົ້ນຄວ້າ, ພິຈາລະນາ ແລະ ແກ້ໄຂຄະດີ ຕາມຂັ້ນຕອນຂອງກົດໝາຍ ເພື່ອຮັບປະກັນຄວາມຍຸຕິທໍາໃຫ້ແກ່ສັງຄົມ, ຊຶ່ງໃນປີ 2023 ມີຄະດີເຂົ້າມາຍັງສານປະຊາຊົນແຂວງ ແລະ ສານປະຊາຊົນເຂດ I ທັງໝົດຈໍານວນ 161 ເລື່ອງ, ແກ້ໄຂແລ້ວ 139 ເລື່ອງ ເທົ່າກັບ 86,33%, ຍັງຄ້າງ 22 ເລື່ອງ. ໃນນີ້, ຄະດີເຂົ້າສານປະຊາຊົນແຂວງຈໍານວນ 131 ເລື່ອງ, ແກ້ໄຂແລ້ວ 119 ເລື່ອງ ເທົ່າກັບ 90,83%, ຍັງຄ້າງ 12 ເລື່ອງ ແລະ ຄະດີເຂົ້າສານປະຊາຊົນເຂດຈໍານວນ 30 ເລື່ອງ, ແກ້ໄຂແລ້ວ 20 ເລື່ອງ ເທົ່າກັບ 67,7%, ຍັງຄ້າງ 10 ເລື່ອງ.ພ້ອມນີ້, ກໍ່ໄດ້ເອົາໃຈໃສ່ສຶກສາອົບຮົມການເມືອງ-ແນວຄິດ ຕິດພັນກັບການບໍາລຸງ ແລະ ກໍ່ສ້າງພະນັກງານທາງດ້ານທິດສະດີການເມືອງ, ວິຊາສະເພາະຢູ່ພາຍໃນ ແລະ ຕ່າງປະເທດ ໃນປີ 2023 ຜ່ານມາ ສານປະຊາຊົນແຂວງ ແລະ ເຂດໄດ້ຈັດສົ່ງພະນັກງານໄປຍົກລະດັບທັງໝົດ 13 ຄົນ. ໃນນີ້, ຈັດສົ່ງໄປຍົກລະດັບວິຊາສະເພາະພາຍໃນປະເທດ 2 ຄົນ; ຍົກລະດັບທິດສະດີຢູ່ຕ່າງປະເທດ 2 ຄົນ ແລະ ຍົກລະດັບທິດສະດີພາຍໃນປະເທດ 9 ຄົນ.
ທ່ານ ສົມຈິດ ວໍລະວົງ ໃຫ້ຮູ້ຕື່ມວ່າ: ເພື່ອເຮັດໃຫ້ການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງ ຕິດພັນກັບ 2 ວາລະແຫ່ງຊາດ ໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດເປັນຜົນເປັນຈິງເທື່ອລະກ້າວ, ໃນປີ 2024 ສານປະຊາຊົນ ແລະ ເຂດ ຕ້ອງສືບຕໍ່ສຶກສາອົບຮົມການເມືອງແນວຄິດໃຫ້ພະນັກງານ ຕິດພັນກັບປັບປຸງລະບົບການຈັດຕັ້ງ,ແບບແຜນການນໍາພາ-ວິທີເຮັດວຽກ,ສືບຕໍ່ບໍາລຸງສ້າງພະນັກ
ງານໃຫ້ມີຄວາມຮູ້ຄວາມສາມາດ ແລະ ມີຄວາມຊໍານານງານ; ຄົ້ນຄວ້າພິຈາລະນາ, ແກ້ໄຂ ແລະ ຕັດສິນຄະດີໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທໍາ.ຂ່າວ: ສັນຍາພາບ: ສຸກກະສັນ
ຄໍາເຫັນ