ຂ່າວຕ່າງປະເທດລາຍງານ ເມື່ອບໍ່ດົນມານີ້, ສຳນັກງານສະຖິຕິແຫ່ງຊາດຂອງອິນໂດເນເຊຍໄດ້ເປີດເຜີຍບົດລາຍງານໂດຍລະບຸວ່າ: ໂຕເລກລວມຍອດຜະລິດຕະພັນພາຍໃນປະເທດ (GDP) ຂອງອິນໂດເນເຊຍ ຊຶ່ງມີຂະໜາດເສດຖະກິດໃຫຍ່ທີ່ສຸດໃນອາຊີຕາເວັນອອກສ່ຽງໃຕ້ຂະຫຍາຍຕົວ 5,05% ໃນປີຜ່ານມາ ໂດຍດີກວ່າເປົ້າໝາຍຂອງລັດຖະບານເລັກນ້ອຍ ແຕ່ຫຼຸດລົງຈາກສະຖິຕິຂອງປີ 2022 ຊຶ່ງ GDP ຂອງປະເທດໃນປີນັ້ນຂະຫຍາຍຕົວ 5,3%.
ຂະນະທີ່ການສົ່ງອອກຂະຫຍາຍຕົວພຽງ 1,32% ເມື່ອທຽບກັບໄລຍະເວລາດຽວກັນຂອງປີກ່ອນໜ້າ ດ້ານການສົ່ງອອກໃນໄລຍະເວລາດຽວກັນຫຼຸດລົງ 1,65%. ທັງນີ້, ບັນດານັກວິເຄາະຕ່າງກໍສະແດງຄວາມກັງວົນໄປໃນທິດທາງດຽວກັນວ່າ ເສດຖະກິດຂອງອິນໂດເນເຊຍອາດຈະຫຼຸດລົງອີກພາຍໃນໄລຍະເວລາອີກບໍ່ເທົ່າໃດເດືອນນັບຈາກນີ້ ເນື່ອງຈາກອຳນາດການປົກຄອງຈາກາຕາເພີ່ມລະດັບການຄວບຄຸມນະໂຍບາຍການເງິນ ແລະ ຄວາມຕ້ອງການຂອງສິນຄ້າສຳຄັນໃນປະເທດຍັງຢູ່ໃນລະດັບຕ່ຳ.
ບໍລິສັດເຕັກໂນໂລຊີລະດັບໂລກ ຮັບປະກັນຫຼັກການດ້ານຈັນຍາບັນໃນການພັດທະນາ AI
ຂ່າວສານຫວຽດນາມລາຍງານວ່າ: ໃນວັນທີ 5 ກຸມພາ ຜ່ານມາ, ບໍລິສັດເຕັກໂນໂລຊີລະດັບໂລກ 8 ແຫ່ງໃຫ້ຄຳໝັ້ນສັນຍາ ພັດທະນາເຕັກໂນໂລຊີປັນຍາປະດິດ (AI) ໃນລັກສະນະຮັບປະກັນການປະຕິບັດດ້ານຈັນຍາບັນ, ສອດຄ່ອງກັບຫຼັກຈັນຍາບັນ AI ທີ່ຮັບຮອງເອົາໂດຍອົງການສຶກສາ, ວິທະຍາສາດ ແລະ ວັດທະນະທຳ ສະຫະປະຊາຊາດ (UNESCO) ໃນປີ 2021.
ຂ່າວລະບຸວ່າ: ບໍລິສັດເຕັກໂນໂລຊີລະດັບໂລກ 8 ແຫ່ງ ລວມມີ: Lenovo, Microsoft, Mastercard, GSMA, INNIT, LG AI Research, Salesforce ແລະ Telefonica ໄດ້ຕົກລົງທີ່ຈະລວມເອົາບັນດາຄຸນຄ່າ ແລະ ຫຼັກການໃນຄໍາແນະນໍາຂ້າງເທິງຂອງສະຫະປະຊາຊາດໃນເວລາທີ່ອອກແບບ ແລະ ປັບປຸງການນຳໃຊ້ລະບົບ AI. ຄໍາໝັ້ນສັນຍານີ້ໄດ້ຈັດຂຶ້ນໃນກອງປະຊຸມເວທີປຶກສາຫາລືໂລກ ຄັ້ງທີ 2 ກ່ຽວກັບ AI ຈັດໂດຍ UNESCO ຢູ່ ສະໂລເວເນຍ.
ຂໍ້ຕົກລົງດັ່ງກ່າວ ໄດ້ກໍານົດວ່າ: ບໍລິສັດຕ້ອງສົ່ງເສີມບົດບາດຂອງຕົນຢ່າງເຕັມສ່ວນໃນການຮັບປະກັນສິດທິມະນຸດໃນການອອກແບບ, ການພັດທະນາ, ການຊື້, ການຂາຍ ແລະ ການນໍາໃຊ້ AI. ບັນດາບໍລິສັດຈຳເປັນຕ້ອງມີການກວດສອບສະຖານະເພື່ອໃຫ້ເປັນໄປຕາມມາດຕະຖານຄວາມປອດໄພ ແລະ ກໍານົດຜົນກະທົບທາງລົບຂອງ AI ແລະ ໃຊ້ມາດຕະການໃຫ້ທັນເວລາເພື່ອປ້ອງກັນ, ຫຼຸດຜ່ອນ ຫຼື ແກ້ໄຂຜົນກະທົບເຫຼົ່ານັ້ນ.
ທ່ານນາງ ອໍເດຣ ອາຊູເລ ຜູ້ອຳນວຍການອົງການ UNESCO ໄດ້ອະທິບາຍການເຄື່ອນໄຫວດັ່ງກ່າວເປັນ ບາດກ້າວອັນໃຫຍ່ຫຼວງໃນການບັນລຸຄຳໝັ້ນສັນຍາທີ່ຈະແຈ້ງຈາກບັນດາບໍລິສັດເຕັກໂນໂລຊີທົ່ວໂລກ. ທ່ານຍັງໄດ້ເນັ້ນໜັກເຖິງຄວາມສຳຄັນຂອງການຮ່ວມມືລະຫວ່າງພາກລັດ ແລະ ເອກະຊົນໃນການກໍ່ສ້າງ AI ເພື່ອຜົນປະໂຫຍດລວມຂອງໂລກ.
ຄໍາເຫັນ