MOHລະບຸໃນຖະແຫຼງການວ່າ: ພະຍາດໝາກແດງເປັນພະຍາດທີ່ເກີດຈາກເຊື້ອໄວຣັດ ຊຶ່ງແຜ່ລະບາດໄດ້ງ່າຍແລະໄວໂດຍຜ່ານທາງລະບົບຫາຍໃຈເຊັ່ນ: ໄອ ຫຼື ຈາມ, ພະຍາດດັ່ງກ່າວສາມາດເຮັດໃຫ້ເກີດອາການເຈັບປ່ວຍຮຸ່ນແຮງເຊັ່ນ: ຕາບອດ, ສ້າງຄວາມເສຍຫາຍຕໍ່ສະໝອງ ຫຼື ແມ້ກະທັ້ງເສຍຊີວິດ ໂດຍສະເພາະໃນເດັກນ້ອຍທີ່ຂາດສານອາຫານ.
MOHພົບວ່າ:ຈຳນວນຄົນເຈັບພະຍາດໝາກແດງໄດ້ເພີ່ມຂຶ້ນຢ່າງຕໍ່ເນື່ອງ. ໂດຍສະເພາະຢູ່ໂຮງຮຽນ ແລະ ບາງແຂວງຕາມຊາຍແດນ. ໂດຍຕັ້ງແຕ່ເດືອນມັງກອນຫາເດືອນທັນວາປີນີ້ ກຳປູເຈຍຢືນຢັນຈຳນວນຜູ້ຕິດພະຍາດໝາກແດງ 375 ຄົນຢູ່ 17 ແຂວງ.
ຖະແຫຼງການລະບຸວ່າ: ອາການຂອງພະຍາດໝາກແດງມັກຈະປະກົດຂຶ້ນຫຼັງຈາກໄດ້ຮັບເຊື້ອໄວຣັດພາຍໃນ 10-14 ມື້ ຄື: ໄຂ້ສູງ, ໄອ, ນ້ຳມູກໄຫຼ, ຕາແດງແລະນ້ຳຕາໄຫຼ, ມີຜື່ນຂາວນ້ອຍໆຢູ່ແກ້ມ. ຄົນເຈັບທີ່ເປັນພະຍາດນີ້ມັກຈະມີຜື່ນແດງຂຶ້ນຕາມຮ່າງກາຍ ໃນໄລຍະ7-18 ມື້ຫຼັງຈາກຕິດເຊື້ອ. ໂດຍເລີ່ມຕົ້ນຈາກໃບໜ້າແລະຄໍດ້ານເທິງ. ຫຼັງຈາກນັ້ນ, ແຜ່ລາມໄປສູ່ມືແລະຕີນ. ພ້ອມນີ້, ທ່ານຍັງໄດ້ເຕືອນພໍ່ແມ່ປະຊາຊົນໃຫ້ພາລູກທີ່ມີອາການໄຂ້ສູງ, ໄອ, ນ້ຳມູກໄຫຼ ແລະ ມີຜື່ນແດງໄປພົບແພດຢູ່ສູນສຸຂະພາບ ຫຼື ໂຮງໝໍໃກ້ບ້ານ.
MOHຍັງໄດ້ຮຽກຮ້ອງໃຫ້ພໍ່ແມ່ປະຊາຊົນພາລູກຫຼານທີ່ມີອາຍຸ 9-59 ເດືອນໄປຮັບວັກຊິນປ້ອງກັນພະຍາດໝາກແດງແລະໝາກແດງເຢຍລະມັນໂດຍບໍ່ໄດ້ເສຍເງິນ ຢູ່ສູນສຸຂະພາບທຸກແຫ່ງເພື່ອປ້ອງກັນການແຜ່ລະບາດຂອງພະຍາດ.
ກ່ອນໜ້ານີ້, ກຳປູເຈຍໄດ້ປະກາດວ່າຕົນເອງເປັນປະເທດປອດພະຍາດໝາກແດງໃນເດືອນມີນາປີ 2015, ແຕ່ໄດ້ພົບເຫັນຄົນເຈັບພະຍາດໝາກແດງຄົນທຳອິດໃນເຈັດເດືອນຕໍ່ມາ.
ຄໍາເຫັນ