ທ່ານ ບົວເກດ ແສນພູມີວົງ ຫົວໜ້າຂະແໜງປ່າໄມ້, ພະແນກກະສິກຳ ແລະ ປ່າໄມ້ແຂວງວຽງຈັນ ໄດ້ໃຫ້ສໍາພາດຕໍ່ນັກຂ່າວທ້ອງຖິນໃນຄັ້ງວັນທີ 20 ພະຈິກນີ້ວ່າ: ສຳຫຼັບປີ 2024 ພະແນກກະສິກໍາ ແລະ ປ່າໄມ້ ແຂວງວຽງຈັນ ໄດ້ສຸມໃສ່ໃນການປູກຕົ້ນໄມ້ຢູ່ພາຍໃນແຂວງເພື່ອເຮັດໃຫ້ເນື້ອທີ່ປ່າເພີ່ມຂຶ້ນໃນແຕ່ລະປີ ໂດຍໄດ້ເລັ່ງໃສ່ແຕ່ລະໜ້າວຽກ ດັ່ງນີ້: ວຽກງານເກັບແກ່ນ ພາກລັດ ສາມາດເກັບໄດ້ 107 ກິໂລກຣາມ, ປະຊາຊົນ ເກັບໄດ້ 2,688 ກິໂລກຣາມ, ລວມທັງໝົດ 2.795 ກິໂລກຣາມ; ວຽກງານກ້າເບັ້ຍໄມ້ ທາງພາກລັດ 33,226 ເບັ້ຍ, ພາກປະຊາຊົນ 1,619,574 ເບັ້ຍ ແລະ ບໍລິສັດ 55,000 ເບັ້ຍ, ລວມທັງໝົດ 1,707,800 ເບັ້ຍ, ວຽກງານປູກໄມ້ ພາກລັດປະຕິບັດໄດ້ 36.91 ເຮັກຕາ, ພາກປະຊາຊົນ ປະຕິບັດໄດ້ 2,015 ເຮັກຕາ, ບໍລິສັດ ປະຕິບັດໄດ້ 5.3 ເຮັກຕາ, ລວມທັງໝົດ 2,057.06 ເຮັກຕາ ແລະ ວຽກງານຂຶ້ນທະບຽນສວນປູກໄມ້ອຸດສາຫະກຳໄດ້ 6 ເມືອງ, ມີ 13 ຕອນ, ຈໍານວນ 5,549,183 ເຮັກຕາ, ມີຕົ້ນໄມ້ ຈໍານວນ 949,134 ຕົ້ນ, ການປູກໄມ້ຢູ່ພາຍໃນແຂວງວຽງຈັນ ແມ່ນເລີ່ມມາ ແຕ່ເດືອນພຶດສະພາ ຫາ ເດືອນກັນຍາ 2024. ສຳລັບແຜນປີ 2025 ຢູ່ແຂວງວຽງຈັນ ແມ່ນຈະເລັ່ງໃສ່ ວຽກງານເກັບແກ່ນໄມ້, ຜະລິດເບັ້ຍໄມ້, ປູກໄມ້, ຂຶ້ນທະບຽນປ່າປູກ ແລະ ຟື້ນຟູປ່າໃຫ້ໄດ້ ຄື: ວຽກງານເກັບແກ່ນໄມ້ໃຫ້ໄດ້ 940 ກິໂລກຣາມ; ຜະລິດເບັ້ຍໄມ້ ໃຫ້ໄດ້ 1,400,000 ເບັ້ຍ; ປູກໄມ້ໃຫ້ໄດ້ 3,653 ເຮັກຕາ; ຂຶ້ນທະບຽນສວນປູກ ໃຫ້ໄດ້ 1,330 ເຮັກຕາ; ຟື້ນຟູປ່າໃຫ້ໄດ້ 6,000 ເຮັກຕາ.
ທ່ານ ກ່າວອີກວ່າ: ປີ 2035 ແຂວງວຽງຈັນ ໄດ້ວາງຄາດໝາຍສູ້ຊົນຈະຟື້ນຟູປ່າໄມ້ທໍາມະຊາດ ທີ່ມີສະພາບຊຸດໂຊມໃຫ້ໄດ້ 2,500,000 ເຮັກຕາ ແລະ ປູກໄມ້ໃຫ້ໄດ້ 500,000 ເຮັກຕາ. ເພື່ອປະຕິບັດໃຫ້ໄດ້ຕາມຈຸດປະສົງລວມ ແລະ ສະເພາະຕາມຍຸດທະສາດປ່າໄມ້ ຮອດ ປີ 2035 ຍົກລະດັບຄວາມປົກຫຸ້ມປ່າໄມ້ ໃຫ້ໄດ້ 70% ຂອງເນື້ອທີ່ທົ່ວປະເທດ.
(ຂ່າວ: ແກ້ວອຸດົມ)
ຄໍາເຫັນ