ເຈົ້າແຂວງໄຊຍະບູລີ, ມີອົງການປົກຄອງເມືອງແກ່ນທ້າວ, ເມືອງປາກລາຍ, ເມືອງບໍ່ແຕນ, ດ່ານສາກົນສາກົນ, ທະນາຄານທຸລະກິດ, ນັກທຸລະກິດຜູ້ປະກອບການ ແລະ ຊາວກະສິກອນຈໍານວນໜຶ່ງເຂົ້າຮ່ວມ.
ທ່ານ ສີຄານ ແກ່ນມະນີ ຮອງເຈົ້າເມືອງແກ່ນທ້າວ ໄດ້ລາຍງານກ່ຽວກັບການສົ່ງເສີມການປູກ ແລະ ການເກັບຊື້-ສົ່ງອອກມັນຕົ້ນຢູ່ພາຍໃນເມືອງ ວ່າ: ປີ 2024 ເມືອງແກ່ນທ້າວມີເນື້ອທີ່ປູກມັນຕົ້ນ ຕາມແຜນທັງໝົດ 18,000 ເຮັກຕາ, ປະຕິບັດໄດ້ຕົວຈິງ 17,600 ກວ່າເຮັກຕາ ເທົ່າກັບ 97.97% ຂອງເນື້ອທີ່ແຜນການ, ຜະລິດຕະພາບ 32.42 ໂຕນ/ເຮັກຕາ, ຄາດຄະເນຜົນຜະລິດ 571,700 ກວ່າໂຕນ. ມາຮອດປັດຈຸບັນສາມາດເກັບກູ້ໄດ້ທັງໝົດ 4,470 ກວ່າເຮັກຕາ ເທົ່າກັບ 25.40%, ຜົນຜະລິດທັງໝົດ 145,190ກວ່າໂຕນ. ຕໍ່ກັບການຊຸກຍູ້ສົ່ງເສີມການເກັບຊື້ ແລະ ສົ່ງອອກມັນຕົ້ນທາງເມືອງ ແລະ ນັກທຸລະກິດ-ຜູ້ປະກອບການ (ກຸ່ມສົ່ງເສີມການຜະລິດກະສິກຳເພື່ອສົ່ງອອກຂອງເມືອງ) ໄດ້ມີການປະຊຸມຮ່ວມກັນເພື່ອປຶກສາຫາລື ກ່ຽວກັບການຊອກຫາຕະຫຼາດທັງພາຍໃນ ແລະ ຕ່າງປະເທດເພື່ອຈຳໜ່າຍຜົນຜະລິດກະສິກຳ (ປະເພດມັນຕົ້ນ) ແລະ ປຶກສາຫາລືກ່ຽວກັບການກຳນົດລາຄາມັນຕົ້ນດິບ-ມັນຕາກແຫ້ງຕາມລາຄາທ້ອງຕະຫຼາດໃນແຕ່ລະໄລຍະ. ປັດຈຸບັນທົ່ວເມືອງແກ່ນທ້າວ ມີບໍລິສັດເກັບຊື້ຜົນຜະລິດກະສິກຳເພື່ອສົ່ງອອກທັງໝົດ 19 ບໍລິສັດ, ໄດ້ຈັດຕັ້ງເປັນ 1 ກຸ່ມ, ມີບໍລິສັດທີ່ເຂົ້າເປັນສະມາຊິກກຸ່ມ 18 ບໍລິສັດ, ທົ່ວເມືອງມີລານຕາກມັນຕົ້ນທັງໝົດ 23 ລານ. ນອກຈາກນັ້ນ, ຍັງມີບໍລິສັດຈາກຕ່າງເມືອງທີ່ມາປະກອບເອກະສານສົ່ງອອກສິນຄ້າຜ່ານສູນບໍລິການຜ່ານປະຕູດຽວຂອງເມືອງແກ່ນທ້າວຈຳນວນ 10 ບໍລິສັດ. ໃນໄລຍະຜ່ານມາ ໄດ້ປະຕິບັດຕາມນະໂຍບາຍຂອງພັກ-ລັດກ່ຽວກັບການແປຮູບຜະລິດຕະພັນຕ່າງໆກ່ອນສົ່ງອອກ ໂດຍສະເພາະແມ່ນມັນຕົ້ນຕ້ອງໃຫ້ມີການຕາກແຫ້ງຈຶ່ງສົ່ງອອກໄດ້. ໜຶ່ງປີຜ່ານມາເມືອງແກ່ນທ້າວໄດ້ສົ່ງອອກສິນຄ້າປະເພດມັນຕົ້ນແຫ້ງໄປຕ່າງປະເທດໄດ້ທັງໝົດ 310,960 ໂຕນ, ທຽບໃສ່ແຜນການປີປະຕິບັດໄດ້ 96.72%, ມູນຄ່າ 39,661,200ໂດລາ. ສຳລັບລາຄາຊື້ຂາຍມັນຕົ້ນຢູ່ພາຍໃນເມືອງ ໃນປີ 2024 ຜູ້ປະກອບການໄດ້ເກັບຊື້ມັນຕົ້ນນຳປະຊາຊົນ (ມັນດິບ) ລາຄາ 1,170 ກີບຕໍ່ກິໂລ ທຽບໃສ່ປີຜ່ານມາລາຄາຫຼຸດລົງ 130 ກີບ, ລາຄາມັນຕົ້ນຕາກແຫ້ງ 2,860 ກີບຕໍ່ກິໂລ ທຽບໃສ່ປີຜ່ານມາລາຄາຫຼຸດລົງ 1,040 ກີບ.
(ຂ່າວ: ແກ່ນທ້າວ)
ຄໍາເຫັນ