 |
ທ່ານ ນາງ ວຽນວິໄລ ດີລະພັນ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອສະຫຼຸບການຈັດຕັ້ງປະຕິບັດວຽກງານຄຸ້ມຄອງໄພພິບັດໃນປີ 2025 ພ້ອມທັງຖອດຖອນບົດຮຽນ ຊອກຫາຂໍ້ດີ ແລະ ຂໍ້ຈຳກັດ ໃນການດຳເນີນວຽກງານ ທັງກໍານົດທິດທາງ, ເປົ້າໝາຍ ແລະ ແຜນການປີ 2026 ໃຫ້ສອດຄ່ອງກັບສະພາບການຕົວຈິງ ເພື່ອຍົກສູງປະສິດທິຜົນໃນການປ້ອງກັນ, ຮັບມື ແລະ ແກ້ໄຂຜົນກະທົບຈາກໄພພິບັດໃຫ້ມີຄວາມວ່ອງໄວ, ທັນເວລາ ແລະ ມີປະສິດທິພາບຍິ່ງຂຶ້ນ. ຈາກນັ້ນ, ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະກໍາມະການຄຸ້ມຄອງໄພພິບັດຂັ້ນແຂວງ.
 |
ທ່ານ ສົມບູນ ພົມມະປັນຍາ ຮອງຫົວໜ້າພະແນກ ຮສສ ແຂວງ ໄດ້ລາຍງານສະພາບຄວາມເສຍຫາຍ ຈາກໄພພິບັດທີ່ເກີດຂຶ້ນໃນໄລຍະຜ່ານມາ, ຊຶ່ງໄດ້ສ້າງຜົນກະທົບຢ່າງຫຼວງຫຼາຍຕໍ່ຊັບສິນ ແລະ ຜົນຜະລິດຂອງປະຊາຊົນ ໂດຍມີມູນຄ່າຄວາມເສຍຫາຍທັງໝົດສູງເຖິງ 431 ຕື້ 500 ລ້ານກວ່າກີບ. ໃນນັ້ນເນື້ອທີ່ທຳການຜະ ລິດເສຍຫາຍຫຼາຍກວ່າ 332 ເຮັກຕາ; ສັດລ້ຽງປະເພດງົວ, ຄວາຍ, ໝູ, ແບ້ ແລະ ສັດປີກເສຍຫາຍເປັນຈຳນວນຫຼາຍ; ໜອງປາ 157 ໜອງ ພ້ອມພັນປາກວ່າ 73,000 ໂຕ, ພື້ນຖານໂຄງລ່າງເສັ້ນທາງຄົມມະນາຄົມ 104 ເສັ້ນ, ຂົວ 2 ແຫ່ງ, ຊົນລະປະທານໄດ້ຮັບຜົນກະທົບ 134 ແຫ່ງ, ຫົວງານ 128 ແຫ່ງ, ຄອງເໝືອງຍາວ 9,900 ແມັດ; ລະບົບນ້ຳລິນ 17 ແຫ່ງ, ວິດຖ່າຍ 190 ຫົວ, ໂຮງຮຽນຖືກເສຍຫາຍ 100% ຈຳນວນ 7 ຫຼັງ, ເສຍຫາຍບາງສ່ວນ 6 ຫຼັງ, ອຸປະກອນການຮຽນ-ການສອນ ແລະ ຄອມພິວເຕີຈຳນວນໜຶ່ງ.
 |
ໃນພິທີບັນດາຜູ້ເຂົ້າຮ່ວມໄດ້ພ້ອມກັນແລກປ່ຽນບົດຮຽນ ແລະ ປະກອບຄຳເຫັນ ເພື່ອຮ່ວມກັນກຳນົດແບບ ແຜນຮັບມືກັບໄພພິບັດທີ່ອາດຈະເກີດຂຶ້ນໃນຕໍ່ໜ້າ ໃຫ້ມີຄວາມທັນການ ແລະ ສາມາດຫຼຸດຜ່ອນຜົນກະທົບໃຫ້ໄດ້ໜ້ອຍທີ່ສຸດ. ພາບ-ຂ່າວ: ທະນູສິນ ອິດທິພົນ
ຄໍາເຫັນ